السبت، 31 يوليو، 2010

وطني

ما أنا برضه بقول عنها
مهياش أم
و لا القمحي مهوش لونها
و لا حتى الطيبين ناسها
و لا كل اللي يتقال عنها
بيوصفها
دي بالنسبالي شئ تاني
دي أغلى من دشليون أم
دي مصبوغة بلون الدم
و ناسها تعبوا مالطيبة
خلاص الطيبة بطلناها 
من بدري
يا وطني عشانك مستعد أقتل
و أكسر 100 صورة فبرواز
و 100 تمثال و 100 خناس
و ألف صنم
منيش محتاج غير الله مدد
منيش محتاج معونة حد
منيش محتاج غير إنتي وطن
ما لما أصرخ و أتكلم
يقولوا ضد مصلحتك
و خاين أو منيش فاهم
خلي الفهم علشانكم
و لو إني أكون مصري 
بإني أسكت و متكلمش
و أشوف وطني قصاد عيني
بيتباع حتى مستفهمش
أو أبيعك و أبيع نفسي 
فأنا برفض لقب مصري

خواطر واحد مسافر بلدهم

* القطار لا يأتي في موعده إلا إذا تأخرت أنت .
* أحس أن جميع بائعي الترمس قد تخرجوا من مدرسة خاصة بهم بل و أحس أحياناً أنهم يملكون نفس الحنجرة .
* برغم أني لم أغب سوى عدة شهور إلا أنني وجدت أن الصغير صار شاباً و الشاب صار رجلاً و الرجل قد هرم و أغلبهم مات .
* ينظرون إليك كضيف يكلمونك كضيف يعاملونك كضيف إذاً فلتكن مجرد ضيف , صدقني هذا أسهل من أن تقنعهم بالعكس .
* من المحزن حقاً أن تتحول الأماكن إلى مجرد ذكريات .. الأصعب هي أن يتحول الأشخاص كذلك .
* أعجب حقاً عندما أجد أن لدي أصدقاءاً لم أكن أعلم حتى بوجودهم .
* الهدوء في مدينتي الصغيرة يقتلني حرفياً.
* سريري القديم مريح فعلاً لكن الذكريات المتعلقة به هي ما يمنعني من الإستغراق في النوم .
* الأشخاص كاللوحات الجميلة يجب أن تظل على مسافة كافية منهم كي ترى الصورة جميلة واضحة ... إن اقتربت كثيراً لن ترى سوى بقعاً من الزيت .
* أدركت الأن فقط خطأي عندما قمت بعمل جدول زمني لزيارتي ... لن أكرر هذا الخطأ  .
*في الشارع الذي أسكن به قططاً أكثر حتى من البشر - أنا أكيد من ذلك - من الغريب حقاً أن تلك القطط هي الشئ الوحيد الذي لم يتغير منذ تركت منزلي القديم .
* الأن فقط أدركت أن الوقت يمضي أسرع مما أظن .

الأربعاء، 21 يوليو، 2010

لسع مع الصيف



نوعاً ما أنا إنسان شتوي جداً مش بحب الصيف و لا الحر ولا الهدوم الخفيفة و لا البنات اللي وشها ملحوس ميك أب لأن الشمس بوظته و لا الحاجات دي كلها ... يعني الصيف بالنسبالي كارثة بكل المقاييس يعني بالنسبالي السنة فصل لذيذ إسمه الشتا و فصل وغد إسمه الصيف و فصلين بيستهبلوا في الوسط ما بين الصيف و الشتا إسمهم الربيع و الخريف يمكن من أيام حار جاف صيفاً مقطقط معتدل شتاءاَ و أنا مش بحب الأخ الحار الجاف ده تماماً ...

يمكن من اللي بيساعد الصيف على إنه يكون وغد إن عنده أحلى مساعدين في شقتي ... هحكيلكم بالتفصيل عن عذابي مع مساعدين الصيف

أولاً
 اللمبة بتاعة التلاجة
عندي تلاجة إيديال تمانية قدم بما إنها شقة عزاب أنا و صاحبي بس ساكنين فيها قالتلاجة التمانية شغالة و زي الفل المشكلة بقى لمبة التلاجة عندها حالة غريبة من الإستعباط يعني الواحد يقوم من أحلاها نومة علشان ريقه ناشف بفعل الوغد الصيف يروح يفتح التلاجة علشان يشرب اللمبة متشتغلش 
شوف الغلاسة بتاعة اللمبة يعني الصبح تبقى منورة و ملعلعة و بالليل تطفي و أرجع أقفل التلاجة و أخبط مشوار للكبس أولع النور و أروح أفتح التلاجة تاني علشان أشرب 
شوف يا أخي الإستعباط

ثانياً  
المروحة 
عندي إسم الله على مقامك مروحة أثرية وارثها عن الولية اللي مأجر منها الشقة -  أيوة والله أثرية - و سبحان الله مصنوعة من الحديد - أيوة والله من الحديد - بحيث إنها تسخن و تطلع هوا سخن إنما إيه ولا أجدعها دفاية ... المشكلة بقى إن المروحة نفسها مقتنعة إنها دفاية  يعني بتعمل أحلى شغل أحلى شغل يعني تشغلها مفيش مس دقايق تسن و تبقى نار حتى متعرفش تحركها 

ثالثاً 
بتاع الدليفري 
بما إن الجو حر و الواحد مش مستعد ينزل يتسلخ في الشمس ده فدايماً و أبداً بأطلب دليفري و الغريبة إن كل ما أطلب من أي مكان يجيلي يا إما الأوردر غلط يا إما ناقص يعني مثلاً إمبارح طلبت من محل سمك جنبي بوري مشوي و رز صيادية و طحينة 
بعد ما جه و حاسبته و الموضوع تمام بفتح الأوردر لقيت بلطي مقلي و عيش و مخلل كلمت المحل قاللي يا باشا سوري الشواية بايظة و محبيناش نبعت الدليفري مان بإيده فاضية و الله يا باشا رضاك هدفنا .. بعد ما كنت هشد في شعري أكلت و حمدت ربنا لأني كنت جعان بجد .- والله الموضوع بجد - 

و بعد ده كله ألاقي ناس بتحب الصيف ياخي يخرب بيت ده صيف

المروحة العبقرية الأثرية الحديدية

الثلاثاء، 20 يوليو، 2010

حداداً على بطل

فكرت كتير أكتب إيه حداداً على بطل بجد نفسي أبقى مكانه 
فكرت قلت يمكن أعرّف الناس اللي لسة معرفوهوش ... لقيت مصر كلها عارفة مين خالد 
قلت أحسن أحط الصور بتاعته ... بس مش كفاية و أنا شخصياً شايف إن ده إنتهاك حرمته كميت و كشهيد
في الأخر قلت إن خالد أكبر بكتير من كدة 
الموضوع متخر بس ربنا أعلم إني كنت عايز أعمل حاجة أو أكتب حاجة جديدة و مقدرتش 
في أربعينك يا خالد يا سعيد بدعيلك من قلبي ربنا يسكنك الفردوس الأعلى إنتا كنت الشرارة اللي صحت ناس كتير 
في أربعينك يا خالد ميهمنيش إنتا كنت إيه و ميهمنيش كل اللي قالوه عنك و ميهمنيش اللي هيتقال كمان أنا مش مستعد أصدق عنك حاجة  كفاية إن ربنا فوق بيك ناس كتير و نفسي بجد ربنا يجمعنا كلنا بيك شهداء فدا مصر

الأحد، 18 يوليو، 2010

تامر و الأغاني اللي بتقلع

لو لاحظت معايا أنا مش بحب الأخ تامر ده و لا بطيق خلقته بس بحترمه ... أه والله بحترمه بيعرف إزاي يخليني أضحك إلى حد السخسخة لا بجد عليه دماغ دماغ يعني
من يومين كدة كنت كاتب بتتريق على إن تامر بقى سفير الطفولة و هيروح يعغير للعيال بمبرز و كدة و مكنتش ناوي أكتب عن المقال اللي كتبه في الأهرام بس والله مش قادر أطاوع نفسي و لازم أخليكم تقروا مقالته العصماء اللي مفيهاش ولا خطأ لغوي واللي موضوعها هادف جداً وثقافية إلا حد بعييييييييييد ... كلامي بالأحمر زي العادة

كتبت تنبيها في ألبومي الغنائي الأخير بخصوص اغنية‏'‏ كام واحد فينا‏'‏ يقول‏'‏ الرجاء من كل من تنطبق عليه حالة الأغنية أن يتجنب سماعها مع شريكة حياته‏.
لا تشرب الدواء الدواء فيه سمٌ قاتل
لأنني لاحظت أن كلمات الأغنية شديدة الواقعية. فهي تتحدث عن شيء واحساس خطير بداخل الأشخاص خصوصا المتزوجين‏,‏ وهذا الاحساس لم يتحدث فيه صاحبه‏.‏ الأغنية كلامي ولحني‏..‏ والحقيقة كان إدراكي لحجم صراحة الأغنية كبير جدا ومقلق للغاية من عواقب سماع الأغنية‏.‏
كلامه و لحنه ... تبقى مسروقة 
و عايز أعرف حجم إدراكه بالصلاو عالنبي كدة قد إيه حيث لاحظت أن هذه الظاهرة الاجتماعية منتشرة حينما جلست مع شخص وتحدث عن زوجته وقال‏'‏ مش هي اللي كانت في خيالي‏'‏ والعكس أيضا‏,‏ وجمعيهم يؤكدون ان سبب استمرار العلاقة دون حب هو الابناء‏'‏ الخلفة‏'..‏ ووجدت نفسي أمام شريحة كبيرة من المجتمع تزوجت دون حباً فهناك من تزوج فتاة دون ان يحبها ولكنها من وجهة نظره تصلح أما وتنتمي لأسرة مشرفة‏.‏
أحد الأشخاص بقت ظاهرة منتشرة ؟؟ و أحد الأشخاص بقى جويعهم يؤكدون
ركز و النبي على تزوجت دون حباًوهناك أيضا من تزوجت شابا لا تحبه ولكنه مرتاح ماديا‏,‏ وهناك من تزوجا بشكل متسرع لمجرد احساسهم بأنهم سيكونون في منتهي السعادة وخصوصا في العلاقة الحميمة‏
علاقة حميمية يا كثوفي
يتفاجأ كلا منهما بعد فترة قصيرة أن الزواج لا يتعلق بهذه المسألة فقط ولكنه مسئولية كبيرة لكلا الطرفين واحترام متبادل بينهما‏..‏ وهات وخد‏.‏
يتفاجأ ثم يندهش فيستوعب و هات و خد يعني زي السكينة في الحلاوة
فقررت ان أكتب أغنية‏'‏ كام واحد فينا‏'‏ وتحديدا بعدما اكتشفت في معظم الحالات ان الزوج كان يتمني انسانة أخري والزوجة تتمني رجلا آخر بسبب الحب بالعقل وحسبة الأمور فتزوج كل منهما وبداخله مشاعر حب لشخص أخر بالقلب ولكن بسبب الأبناء فكل منهما يكتم سره بداخله‏.
قرر يكتب يعني جاب كوباية الشاي و قفل على نفسه الأوضة و قعد يفصل في الكلمات و لا اجدعها ترزي
وكلمات الاغنية تقول‏:‏
‏'‏ كام واحد فيناعاش مع واحد مكنش بيمتناه
واضطر يقبل حب مكنش في يوم ليه ولا كان علي هواه جوايا احساس بيموتني
ومشاعري اعمل ايه فيها احساس بيخنقني واعمل ايه دي حاجة مقدرش اتكلم فيها
وخصوصا بعد لما بقا بينا حاجات لازم نكمل ونعيش ليها
بيبقي في حضني وبين ايديه وعقلي وقلبي مش وياه
مع حد تاني كان نفسي هو مكانه وانا ابقا معاه
ودي اخرت اللي يحب بعقله ويلغي مشاعره ويحبسها
ومشاعري اعمل ايه فيها احساس بيخنقني واعمل ايه دي حاجة مقدرش اتكلم فيها
وخصوصا بعد لما بقا بينا حاجات لازم نكمل ونعيش ليها
في مرة حبيبي غلط في اسمي سالته ورد وقال مقصدش
مش يمكن برضه حاسس هو نفس الاحساس وانا معرفش
يلا اديني خرجت حاجات جوايا حاسسها ومبتشفش‏'‏
الحلزونة يما الحلزونة
وأذكر انني في أحد الجلسات مع الأصدقاء‏,‏ كنت أقول أني كتبت أغنية كلامها الذي سبق ذكره وكان بجواري صديق لي وزوجته وعندما بدأت أغني الأغنية وجدت الفتاة‏'‏ تبكي مر البكاء‏,‏ وشاهدها زوجها وقال لها في منتهي الغضب‏'‏ المفروض بقي انا الشخص اللي بتبقي في حضنه وتفكري في حد غيره وتتمني تكوني معاه؟‏'‏ وقامت مشاجرة كبيرة بينهما فشعرت بأني لابد أن أضع هذا التنبيه‏.‏
يا دين أمي عالنــــــــــــــــــــــــــــــــــــــــــتش
وعلي الجانب الآخر قمت بغناء أغنية‏'‏ اخترت صح‏'‏ وكان مضمونها انني أحببت بقلبي انسانة‏'‏ اخترتها صح‏'‏ واكتشفت انها جرحتني أكبر جرح في حياتي يعني أيضا منجرحتش إلا لما اخترت صح‏.‏
يعني بيقولنا عمو تمورة ولا كدة نافع ولا كدة نافع
وذلك يعني ان الذي يحب بعقله يعيش في جرح‏,‏ والذي يحب بقلبه يعيش أيضا في جرح آخر‏,‏ فغنيت الموضوعين لأنهما موجودان بشكل ملحوظ أتمني أن يقل عددهم ويزيد عدد المتزوجين السعداء الذين عبرت عنهم بأكثر من أغنية مثل‏'‏ لو هكون غير ليك‏,‏ اطمن‏,‏ قفلت قلبي‏,‏ يا أنا يا مفيش‏,‏ لأول مرة‏,‏ تعرفي‏'.‏
لا لا للللا دا دا دددا يا رومانسي يا أمور يا تمبورة
ولكني في النهاية فنان وأحاول أن أعبر عن قضايا المجتمع الخاصة بالمشاعر والاحاسيس في الأفراح والأوجاع آملا أن أكون منفذا لهم يتنفسون عن طريقه حتي لا يحدث اختناق وانفجار في المشاعر مثلما كتبت ولحنت وغنيت أغنية‏'‏ أنا مش عارف اتغير‏'.‏
فنان بيحط العيش في الفُن و يطلع الغيش من الفُن




و في النهاية أسيبكم مع فقرة من الفن الجميل مع تمورة الأمور أوي
 


السبت، 17 يوليو، 2010

عن الظابط اللي إتشرح

مقال شفته من شوية عن "6سائقين يمزقون ضابط شرطة حاول منعهم من اغتصاب فتاة" 


المشكلة بقى إن المقال إنتشر قوي و ناس دعت لتكريم الظابط و ناس قالت ده لازم يترقى لوا و ناس بتقول أدي الرجالة ولا بلاش


طيب أنا عندي سؤال بسيط جداً : هي مش دي مهنته برضه اللي بيقبض علشانها مرتب و بياكل منها عيش ؟؟؟


يا سيدي أنا معاك إن السواقين لازم يتعدموا في ميدان عام و إن الراجل عمل الصح بس ... هو الصح بقى غريب لدرجة إنه يتكرم ؟؟


و بعدين تعالى معايا إزاي واحد معاه طبنجته الميري - ولا كان ماشي من غير سلاح سعادته - و إتكتع تكتيعاً شديداً من 6 مسلحين بمطاوي ؟؟؟ و بعدين يعني هو مش قال نزل كل الركاب و إدالهم الأجرة ؟؟؟ أمال البنت دي قعدت ليه ؟؟ الخبر مفتكس تزوير أخر إفتكاس يعني من الأخر ميخشليش من عقل


إنت مصدق ؟؟؟ ده بقى يرجعلك إنتا و إفرض مصدق أنا معاك إسمع البوقين دول


كل إسبوعين يطلع فيديو لظابط بغتصب فتاة أو يبهدل اللي جابوها ضرب و يوم ما واحد يعمل شغله - اللي هو المفروض يعمله عادي يعني - تلاقي سبعتلاف واحد نقل الخبر و بقى بطل و مازنجر و ادهم صبري و الحاجات دي 


هتقولي مش في نوبتاجيته و مش وقت خدمته ... يبقى ليه الخبر بيتفشخر فشخرة شديدة إن الأخ ظابط ؟؟؟ يعني لمؤاخذة كدة أعذرني على غباوتي لما الموضوع يبقى في نفس فترة أربعين خالد سعيد يبقى المقصود إيه 


و الكومنتات اللي باينة أمن دولة جداً يراها الأعمى و البصير كأنهم بيقولوا نياهاهاها إحنا أمن دولة بس مستخبيين


مش عارف يمكن أنا دماغي بتشطح ساعات بس الخبر مش مبلوع بالنسبالي 






تحديث 
بعد ما كتبت الموضوع لقيت حد متناوله أحسن مني بألف مرة هو صاحبي برضه الحمد لله يعني الموضوع في بيته

الجمعة، 16 يوليو، 2010

كليب إيه يعني ؟؟

أنا بحب بلاك تيما و بموت فيهم كمان و بعتبرهم من الناس القليلة جداً في مصر اللي لسة بتقدم فن محترم لكن إيه اللي حصل ؟؟؟ إيه اللي حصل بجد من فترة الصحة في النازل و الحال مش تمام و اللي زاد الطينة بلة الكليب الجديد
تلخيص الكليب :
3 مزز + كاميرا ثابتة + شريط بلاستر عريض + ماكيتات نمر و غزال و أسد
الصلاة عالنبي
الكليب فكرة عادية مش مشكلة يعني ماهو كل الكليبات دلوقتي أفكارها عادية المشكلة في الأغنية نفسها كلمات وحشة جداً و توزيع مش ولا بد و مفيهاش ريحة بلاك تيما حتى ... يجد لو المقال ده وصل لبلاك تيما يا ريت يهتموا في الكليب اللي جاي إنهم يحافظوا على مستواهم في بحار مش في إيه يعني

الاثنين، 12 يوليو، 2010

تامر بتاع البامبرز

مش عارف أنا ليه بحرق في دمي و مصر أخد موقف من اللي بيحبوا الكائن ده يعني عادي سيبهم يتعايشوا مع تامر و نفضلهم ... أبداً لازم أول ما أسمع خبر عن تامر ده أقول كلام أبيح و أحرق في دمي .. ما هو عايش و حلو الراجل و في مراهقين كتير و عيال سيس كتير و معاقين ذهنياً كتير بيحبوه مال أهلي أنا بالموضوع مش عارف
يعني مثلاً إنهاردة الصبح بقول يا فتاح يا عليم يا رزاق يا كريم اللهم عدي اليوم ده على خير و متختموش بلفافة و لا إنهيار عمارة و لا أي نيلة ألاقي في وشي مقال بيقول إن تامر بقى سفير الطفولة في العالم العربي و قال إيه هيروحوا وراه مارينا يسلموه الدرع
يختشي كميلة يعني لسة من يومين مفقناش من مقالته العظيمة المظفرة - واكلة زفر يعني - بتاعة الأهرام اللي بينصح الرجالة فيها ميسمعوش واحدة من أغانية مع مراتاتهم - علشان الأغنية بتقلع في النص على رأي نوارة نجم - أصحى انهاردة ألاقيه بقى سفير الطفولة - *** - لأ كدة مقدرش أستحمل
قال إيه وصله جواب رسمي من الأخوة بتاوع جامعة الدول غنه بقى سفير الطفولة العربية - عربية هامر :/ - و قال إيه مش هيروح هو يستلمها لأ خالص هبروحوا عهما وراه لغااااااااية مارينا - ده على أساس إن الأطفال اللي هو مهتم بيهم دول أطفال مارينا - و قال إيه مقرر يعمل أعمال كارتون إرشادية للأطفال - الزغنطتين - تامر القدوة تامر المثل الأعلى هيعمل لهم كارتون تعليمي - الله يرحمك يا ماما سامية -

ومن جهة أخري أسست رابطة محبي الفنان تامر حسني في جميع دول العالم حملة خيرية بعنوان «تامر حسني جمعنا في حب الخير» -  *** - بالحب إتجمعنا يمكن قصدهم ؟؟

و قال إيه عمل حملة للتبرع بالدم - عنده دم طلع - في جميع أنحاء العالم

المهم هنا هو عمل حملة تبرع بالدم فاشلة و هيمل شوية حلقات كرتون للأطفال - و ماله - ده بقى إهتمامه بالطفولة العربية المعذبة المشردة - *** - - أنا قلت كلام أبيح كتير في البوست ده - 

المشكلة هنا هو هيبقى ماما تامر مثلاً ؟؟ هيروح يغير بامبرز للأطفال - الزغنطتين - هيعمل إييه يعني للأطفال بتاع الأغاني اللي بتقلع في النص ده ؟ 

وفاء


وفاء..."
طبعاً عارف وفاء؟؟ اللي هي نظام صاحبتك في الجامعة و عندك عالفيس و الماسنجر و معاك أرقام موبايلاتها ال12؟؟ اللي قالتلك إنتا الوحيد اللي بثق فيه علشان محاولتش تعاكسها؟؟ وفاء يا عم.. عرفتها؟؟ قشطة عليك
مش عارف إذا كنت لاحظت ولا لأ وفاء مرة واحدة بعد شهرين كدة أو تلاتة بتلاقيها برة دنيتك
حذفتك من على الفيس و الماسنجر و لو شافتك في الكلية ولا تعرفك ولو رحت كلمتها يبقى معندكش دم ولا ذوق ولا إخوات بنات طيب إيه اللي حصل يا سيدي؟؟ أنا هقولك يا عم نبدأ نحط الإحتمالات
1 وفاء بتحبك :
-إنتا هندي مش فاهم طبعاً وبتعتبرها أختك هتقولك إنتا غبي ومش بتفهم والكلام ده و تحذفك تاني يوم طبعاً هي منتظرة إنك تضيفها 45216 مرة و تعمل ريجيكت كنوع من القرابين على حساب كرامتك و تسوق عليها أمة لا إله إلا الله و برضه هتعمل نفسها شخصية و في الأخر خالص تصفح عنك و طبعاً بما إن إنتا هندي فمش هتعمل الكلام ده و هتقعد تسأل نفسك حذفتني ايه ؟؟
-إنتا حبيت واحدة تانية و قلتلها على أساس إنها أنتيمتك هتلاقي أي سبب علشان تسيبك و هتسيبك بطريقة مملة و طويلة علشان متحسسكش إنك جرحتها يعني هتقلل كلام معاك واحدة واحدة لغايةى في يوم تعمل ريموف لسيادتك
-فهمت و قولتلها بحبك هتعمل نفسها ولا بتفكر في الموضوع تماماً و تبطل تكلمك على أساس إنك فهمتها غلط و كدة إنتا عارف الشغل لازم برضه تسوق عليها أمة لا إله إلا الله و في الأخر ترضى عنك لو معملتش كدة هتزهق و تعمل لك ريموف

2 وفاء مش بتحبك
-إنتا كمان ولا بتفكر فيها هتصاحبك شهرين تلاتة أربعة بالكتير بعدين هتبطلوا تكلموا بعض واحدة واحدة لغاية ما في الأخر تبقى أقصى مدى لعلاقتكوا هاي عاملة إيه الحمد لله و بس كدة و بعد فترة ريموف كمان
-إنتا حبيت واحدة تانية وقلتلها بإعتبار إنها أنتيمتك هتعيش معاك دور الخبير العاطفي و كدة و ممكن تستمر معاك كدة شهر ولا حاجة و مرة واحدة يوزها الشيطان إشمعنى البنت دي حبها ما أنا كنت قدامه طول الفترة دي ولا انا مشبهش "طبعاً لو كنت حبيتها ما كنتش هتديك فرصة بس الغرور الأنثوي لازم يلعب لعبته" و ريموف يا معلم
-إنتا حبيتها و حاولت تقولها أولا هتهزقك و تبعتر كرامتك و بعدها ريموف و بعدها هتبقى النميمة بتاعتها هي و العصابة شفتوا الواد الغبي اللي ميعرفش يعني إيه صداقة محترمة بين ولد و بنت ده أنا أساساً كنت مصاحباه من باب الشفقة  لغاية ما يلاقوا موضوع غيرك طبعاً
3 وفاء اتحجبت أو كانت مجحبة و ابتدت تصلي أو كانت بتصلي و التدين زاد حبة المهم هيبقى حذفك من باب الطاعة و لو إعترضت تبقى فاسق و عاصي و ربنا يتوب عليك .. طبعاً إنتا عارف وفاء شهر بالكتير و هترجع ألعن من الأول بس مش هتضيفك تاني من باب الكرامة و الغرور الأنثوي
4 حبيبها قال إحذفي الولاد اللي عندك يا وفاء طبعاً حبيبها أهم منك بمراحل
5 حبيت أعز صحباتها
-صاحبتها حبتك و بيس عادي يعني وفاء هتغير و إشمعنى صاحبتي ما أنا كنت هنا و ريموف
-صاحبتها محبتكش و ساعتها هتقول لوفاء تحذفك و إنتا عارف صاحبتها أهم منك
من الأخر لو وفاء معملتلكش ريموف خلال 6 شهور اتطمن خالص أكيد نسيت الباسوورد بتا الأكونت أو نسيت إنك ندها أساساً


الجمعة، 9 يوليو، 2010

دماغي كدة

من أروع الكتب اللي قريتها في الفترة للي فاتت تحس كدة و إنتا بتقراه إنك عايش بجد جوة دماغ العبقري د.أحمد خالد توفيق يمكن في ناس شافت أغلب المقالات قبل كدة قبل تجميعها بس أنا عن نفسي كنت محتاج أشوفها تاني و تالت و رابع كمان
الكتاب تحفة بجميع المعايير
أنا برضه متأخر في الكتابة عند أنا إشتريته من زمان جداً و قريته في فترة المعرض
في البداية الغلافجميل جداً بيمثل صورة الكاتب و تمثال الحرية و عبد الناصر - أنا مش من محبي عبد الناصر بس ما علينا - المهم إن الغلاف كويس جداً

المحتوى جميل جداً في مقالات أضحكتي جداً على حالنا و مقالات أبكتني فعلاً يعني عندك الخماسية الجميلة مخلوقات كانت رجالاً لما إتكلم عن الطب الزائف لما إتكلم عن د. ياسر الجدي  لما إتكلم عن التحرش و عن التقليد في الفن المصري من الأخر إتكلم عن كل حاجة في مصر بطريقة توحي إنه إنسان دماغه عالية بجد


 إلا إن في شوية نقط ضايقتني جداً و كنت أتمنى إن د.أحمد ميكتبهمش بالطريقة دي يعني مثلاً إنه بيحاول يفهم الشباب بنفس الطريقة اللي غيره بيحاول بيها بالدعاية السينيمائية و الإعلانات و المسلسلات اللي بيشوفها يعني عن تامر :كلامه عن عمر و سلمى بتفكرني بالمسئول عن إختيار الأغاني في خير زمان أو الكابتن بتاع الجيم لما طلبت منه يغير بيونسيه لإني مش بحبها الإتنين حطوا سي دي لتامر حسني بإعتبار إنه هو بتاع الشباب و إن الشباب بيحبوه و الكلام ده

و طبعاً ده مش صح أنا منكرش إن في شوية بنات لسة المراهقة بتعمل معاهم شغل بيحبوه و شوية ولاد ولاد كانوا بيسمعوا شعبي بيحاولوا يبانوا فانكي بعد ما زهقوا من الشعبي فبيسمعوا صوت تامر المسرسع و طبعا مهما حصل فالشباب لسة عندهم دم و بيسمعوا لدياب و منير و فيروز و حليم و ناس كتير مش فرحانة بشعر صدرها  

زفالمعايير التلاتة اللي حكم بيها على الشباب بسس تامر الأول غلط و التاني غلط و التالت غلط

نبذة بسيطة عن تامر حسني  ::: (ممكن تسيب ال6 سطور الجايين دول لو مقتنع إن تامر مش قدوة للشباب و إنه مثال سئ لإنسان منحط خلقيا )
1 يعتبر أشهر لص حقوق ملكية فكرية بعد ما وصلت عدد سرقات الأغاني بتاعته ل30 (ولسة الجاي أكتر) (لو عايز أدلة ممكن أجيبهالك)
2 شاب منحل و خليع جدا و رغم كدة بيحط لنفسه لقب نجم الجيل (بذمتك إنتا عايز إبنك يبقى تامر أو بنتك تبقى مي ؟؟؟) معتقدش إنه نجم للجيل بأي حال لإن الجيل حتى ملحقش يبدأ
3 هارب من التجنيد و متهم بالتزوير في 3 قضايا تزوير (تزوير المؤهل الدراسي مرتين و تزوير شهادة الخدمة العسكرية لو عايز أدلة ممكن أجيبهالك)
4 مصاب بإنفصام في الشخصية (مش معقول واحد يتصور و هو بيصلي و بعدها ب40 بوم تتنشر له صور مع بنات في أوضاع حميمية جدا لو فاهم قصدي و أنا بصفتي خبير فوتوشوب ممكن أنفيلك بالدليل شبهة التزوير خصوصا إن واحدة من البنات دول إتصلت ببرنامج لبناني شهير و قالت إنها سهرة بريئة و إنتا عارف لو قلت أنا مسرقتش بنك مصر من غير ما حد يوجه الإتهام ده ليا معناه إني بثبت على نفسي التهمة )


ممكن نرجع بعد ما ال6 سطور خلصوا الحمد لله
هو في المقال ده شبه كابتن الجيم و شبه المسئول عن الأغاني في خير زمان مسألناش إحنا إذا كنا بنحب تامر ولا لأ بس سأل إنتاج افلامه اللي شافها هو و اللي في سنه مع أولادهم واللي اشترتها القنوات الفضائية علشان تعرضها 173133032 مرة متواصلة 


أنا شاب و شاب جدا إن جاز التعبير (19 سنة ) و زي 125 ألف شاب في جروب كارهي تامر حسني بنقول لأ للفن الهابط و اتحداك تجمع 20 ألف بيحبوا تامر في جروب واحد 



كما إن د.أحمد برضه بيخلط ما بين اللغة العربية و الحروف العربية بطريقة واحد مدرسش الإتنين و للأسف متحامل على الفرانكو بطريقة صعبة جداً و مصر إن الفرانكو هو المسئول عن كل حاجة غلط حتى هزيمة المنتخب يمكن 


و في غلطة مش مقصودة لما إتكلم عن فيلم أرض النفاق الفيلم من بطولة فؤاد المهندس 


في الأخر الكتاب جميل جداً و قوي جداً و أنصح أي حد يقراه طبعاً 


الأربعاء، 7 يوليو، 2010

ولد ضاف بنت

ولد و بنت على الفيس  
المعطيات : الولد بيجب البنت
العمل : الولد ضاف البنت*
المشاهدة 1 : البنت رفضت الإضافة
العمل 1 : الولد بيضيفها تاني أو يبعتلها مسجز بالعبيط 
المشاهدة : إحتمال من تلاتة 1 :البنت تشرشح لأمه في مسج
                                   2 : البنت تنفض لأمه
                                     3 : تفبل الإضافة "نفس خطوات مشاهدة 2 "
المشاهدة 2 : البنت عملت أكسبت للولد
الخطوات:
 1 الولد يقعد يعمل في لايكات و كومنتات لغاية ما يطلع دينه
  المشاهدة : إحتمال من تلاتة :
   1 : البنت متردش و الولد يكرر الخطوة دي لغاية ما يزهق و ينفضلها "نهاية "
   2: البنت ترد بالقطارة "و الولد يزهق و ينفضلها " "نهاية"
   3: البنت تدخل في حوار مع الولد  "تستمر خطوة 2"
 2 الولد يتكلم شات مع البنت 
              المشاهدة :
إحتمال من تلاتة :
  1 :البنت متردش 
          العمل : 1 الولد  يرخم أوي المشاهدة : البنت تحذفه 
                   2 الولد يقولها ليه مش بتردي 
                      المشاهدة : 1 البنت تنفض "نهاية "
                        2 البنت تقوله مش بكلم أولاد شات "نهاية"
                        3 البنت تكدب و تقول النت وحش و الكلام مش بيوصل**
                        4 البنت تكلم الولد "تستمر خطوة 3"
  3 الولد يرغي كتير مع البنت و يحدث تفاعل تبعاً لنوع الرغي
     المشاهدة : 1 الولد مثقف و البنت هايفة "إستمرار خطوة 4"
                  2 البنت هايفة و الولد هايف ***
                  3 الولد هايف و البنت مثقفة "البنت هتزهق و تزهقة بطرق البنات****"
                  4 الولد مثقف و البنت مثقفة "خطوة 6"
  4 الولد مثقف و البنت تافهة المشاهدة 3 إحتمالات:
    1  الولد يزهق من تخلف البنت و يعمل لها ريموف "مستحيل" 
    2 الولد يقول للبنت بحبك " تستمر خطوة 5"
    3 البنت تزهق منه و تعمل له ريموف "نهاية"
  5 الولد أحسن من البنت و قال لها بحبك
     المشاهدة :
      1البنت بتحبه : تطلع دينه لغاية ما تقوله بحبك "نهاية"
      2 البنت مش بتحبه : هتحذفه من غير نقاش "نهاية"
      3 البنت عايزة تركنه على الرف : مش بفكر في الموضوع ده *****
   6الولد هيكلم البنت فترة لغاية ما حسب قوانين علم الإجتماع هيقول لها بحبك
       المشاهدة : "إنظر خطوات الخطوة رقم 5"

ملحوظة :  ساعات و بدون أي سبب البنت بتحذف الولد في أي خطوة من الخطوات السابقة  حتى مع إتباع الخطوات الصحيحة


الإستنتاج : 1 في جميع الحالات الولد هيتزل و هيطلع دين أمه 
               2 في جميع الحالات الولد هو اللي بياخد الخطوة و البنت هي اللي بتحط الخط النهائي لسير خطوات الولد
               3 البنات المثقفين زي البنات التافهين الولد مش بيبص غير على الشكل ^_^
               
ملاحيظ "جمع ملحوظة"
* غالباً الولد هو اللي بيضيف البنت و رغم ذلك سجلت حالات معدودة البنات ضافوا فيها ولاد
** الحجة دي بقت مستهلكة بتستخدم لما البنت تكون منفضة للولد و عمر ما ولد إستخدمها و هذا إن دل على شئ فلأن النت عند الولاد أحسن بكتير^_^ و في الغالب الولد بيديها إيميله و تستمر المشاهدة مثل مشاهدة رقم 1 و 2 من الخطوة الاولى و 3 من الخطوة الثانية
*** هيحبوا بعض و ينزلوا كافيهات بقى و إنتوا عارفين ستايل سوسو و جيجي المشهور
**** المشاهدة 2 من الخطوة الأولى هي أشهر الطرق المستخدمة دولياً
***** مفيش بنت مش بتفكر تحب و ده كلام فرويد مش كلامي





اللهم خلي لنا جوجل و بارك لنا فيه

من فترة مش طويلة كنت كاتل إني بعشق جوجل راح واحد كتب كومنت بيقول ده موقع بحث غبي مش عايز أقولكم على اللي فكرت أقوله له لو حاولت تجمع أكبر مقدار أبحة عندك في كلمتين يبقى وصلت يا معلم لكن مقلتلوش حاجة حتى ميستاهلش أناقشة ما علينا المهم إنهاردة أنا جاي أقولكم أنا ليه بستخدم جوجل
أولاً كدة
جوجل محرك بحث عبقري بجد و الكلام ده هتبقى عارفه أحسن مني لو عندك موقع بيقدم أعلى دقة بحث و أعلى إمكانيات بحثية يعني مثلاً ممكن تبحث عن كلمة بعينها أو كلمات مشابهة أو كلمتين مع بعض أو جملة بنفس الترتيب أو مجموعة كلمات أو مجموعة كلمات بشرط الكلمة دي متظهرش أو أو أو إختيارات كتير بجد على فكرة ممكن لو عايز تعرف أكتر من هنا

ثانياً
جوجل ميل و ده بجد من أهم أسباب حبي لجوجل بجد جوجل ميل ده بريد إلكتروني عبقري أخف بكتير من الياهو أو الهوتميل وتطبيق الموبايل بتاعه سهل جداً في الإستخدام و من غير إعلانات زي ياهو و شات بيلت إن قبل ياهو بسنين الناس اللي بيقولوا حجمه صغير عندك سبعة جيجا يا عم بس إبقى خلصهم

ثالثاً
جوجل كروم
المتصفح الجميل السريع الخفيف الظريف اللي أنا عن نفسي بستخدمه من كتر من سنة و نص و بسببه إتخليت عن أوبرا و طبعاً مليان بالمميزات منها الإضافات اللي تضرب إضافات فايرفوكس بالجزمة - جرب بنفسك - و ان محرك بحث جوجل بيلت إن المتصفح نفسه مثلاً و طريقة فتح الصفحات السلسة جداً و حاجات جميلة جداً لو حكيتلك عنها مش هعرف أوصفها غير بعد التجربة

رابعاً
بلوجر
جوجل إشترت شركة بلوجر من ييجي 6 سنين و طبعاً إتغير كتير للأحسن و أديك شايف و أنا كمدوّن بأعشق جوجل

خامساً
يوتيوب
متتخضش كدة برضه جوجل إشترت يوتيوب من أربع سنين و أديك بتستخدمه يا بطل و زي الفل

سادساً
أخبار جوجل
تسيق روعة للأخبار من كل حتة و في نفس وقت صدورها و في مواقعها الرئيسية يعني بدل ما كنت بروح أقرا الأخبار في كل المواقع بتاعتها و أسبح في عالم من المرح دلوقتي جوجل نسقتلي الموضوع و بقى أسهل بكتير

سابعاً
جوجل تولبار : أا مشبستخدنه لأني بستخدم متصفح كروم بس اللي بيستخدموه بيقولوا هايل

ثامناً
جوجل ديسكتوب
مجموعة جامدة من الجادجتز بتنافس بقوة السايدبار بتاع ويندوز و صدقني بتهزمه

تاسعاً
جوجل رانك و أدوات مشرفي المواقع لو صاحب موقع هتفهمني لو مش صاحب موقع بقول لك بصفتي صاحب موقغع انا بحبجوجل بحب جوجل بحب جوجل

عاشراً
ترجمة جوجل و تشكيل جوجل
هما أينعم لسة بيتا و بيتأثروا جامد جداً بالمستخدم اللي ترجم الكلام بس بجد لو عايز ترجمة حرفية سريعة عليك و على جوجل

و في برضه تقويم جوجل و جوجل بيكازا و الباحث العلمي لجوجل و جوجل مستندات و مجموعات جوجل من الأخر أنا تعبت و إنتا ياللي بتقرا تعبت و برضه مجبناش أخر جوجل بجد بجد لو مش جوجل يبقى مين ؟؟؟؟

الثلاثاء، 6 يوليو، 2010

في بلد الولاد مش عاجبني

ده كان عنوان كتاب مصطفى فتحي قريته من فترة بسيطة
أنا معرفش مصطفى فتحي و مقابلتوش قبل كدة بس قريت له شوية و كان مستواه أحسن من كدة بكتير
أولاً الغلاف هو تصميم أحمد بدر بس مش عارف بريشة مين و غالباً رسوم جايبها من "مكان ما الله به أعلم " مش رسوم جديدة خاصة  بالكتاب رغم إعلان شباب بوكس في أول الكتاب على إن التصميمات ملك خاص للناشر و المؤلف "علشان كدة مش هحط صورة الكتاب وبدلها هحط صورة مصطفى" اللي مش منوه على نشرها أو عدمه


في الغلاف الخلفي نوع من المقدمة هو عارف إن الناس كلها هتبدأ بيها لأن الكتاب عامل ضجة و الناس جايباه بس علشان كدة
بعد كدة ندخل أول الكتاب
في مقدمة من دار النشر عن إن حقوق الكتاب للناشر و الكاتب و مينفعش نشر أو إقتباس من غير موافقة خطية "علشان كدة برضه مش هنشر أجزاء منه"
بعدها كمان مقدمة عن إن الدار ناشرة الكتاب بس عشان حرية التعبير و إنه يعبر عن وجهة نظر الكاتب بس "بيسيبوه للمدفع لمؤاخذة"
بعدها إهداء من الكاتب لكل إنسان يحترم الأخر
بعدها تنويه إن الأحداث خيالية بالكامل و إن أي تشابه محض مصادفة و ده هيرجعنا لجملة التنوير أول الكتاب "حكاية شبابية ... حقيقية" شفت الحيرة ؟؟ هي حقيقية ولا بيشتغلنا ؟؟؟
بعدها تقديم رائع من مروة رخا يمكن من الحسنات المعدودة للكتاب
بعد كدة مقدمة كمان لمصطفى فتحي عن موقف الناس متمثلين في والدته "أعتقد رمزاً مش قصة حقيقية برضه" من المثلية

نروح بقى للمحتوى "دا  دا  دا ددددم"
في البداية الكتاب ورقه أصفر قديم جداً و حجمه تقريباً في حجم كتب الجيب و مش مرقم "ليه مش عارف بصراحة" و ده بصراحة عيب للكتاب أوي يا مصطفى يعني كان لازمني بوكمارك علشان أقراه
الكتاب في مجمله - علشان حقوق النشر - بيحكي قصة شاب شاذ المفروض حسب التقديم و جملة التنوير إنها حقيقية رغم التنويه اللي بيقول إنها خيالية و لنهاية اللي بتبصملك بالعشرة إنها خيالية
بتبدأ حكاية عصام الشاب الشاذ ده من و هو صغير و أسباب إتجاه للمثلية الجنسية مروراً بجوانب حياته المختلفة و كان في تركيز أوي على محمد صديقه اللي بيلعب دور سنيد البطل الرئيسي نهاية بقرار الأخ عصام عن مثليته للمجتمع بحاله و مشي بلافتة مكتوب عليها إنه مثلي "و المجتمع سابه عادي كدة"
و بين السطور كلمات لأغاني منير علشان عصام البطل كان بيحبها ساعات كتير جداً مكنتش بتناسب الجو النفسي و ساعات أكتر كانت ملهاش أي علاقة بالموضوع "مش هحط أمثلة علشان حقوق النشر"
أولاً الكاتب جمع كل الأسباب اللي قرا عنها أو سمع عنها اللي ممكن تخلي شاب يتحول للمثلية و جمعها في عصام "الموضوع ده بينرفزني موت" و غير كدة حط لعصام طول فترة حياته أصدقاء مثليين "بوتوم" من مدرسته لغاية جامعته ده على أساس إن في مجتمعنا ده المثلي جنسياً هبقول لغيره إنه مثلي ببساطة "ده على أساس إنهم أكتر من الهم على القلب" و "برضه على أساس إن عقدة الذنب بسبب تدين الشعب ظاهرة غير موجودة من وجهة نظر مصطقى"

كمان كان لازم ينكت الدين في النص و بطريقة فجة و وقحة إنه خلا إمام مسجد مثلي جنسياً "توب" و عاشر البطل و تاني يوم ربنا تاب عليه و الموضوع ده لاقىإنتقاض حتى الإخوة المثليين اللي شافوا الكتاب

أنا قبل ما أكتب المقال ده سألت ناس متدينة شافوا الكتاب و ناس نوعاً ما عقلهم عالي و أكيد سألت ناس أعرفهم شواذ و كل نوع بيعتقد إنه بيقراه علشان يفهم التاني
الناس العادية اللي معندهمش خلفية بيحاولوا يفهموا الشواذ
المتدينيين فاكرين إنهم كدة بيفهموا وجهة نظر المجتمع  للشواذ
الشواذ فاكرين إن دي وجهة نظر المجتمع فيهم
و اللي دماغهم عالية شايفين إن مصطفى بجد غلط لما كتب الكتاب ده

على أي حال الكتاب كقصة ضعيفة جداً و مستحيل تكون بأي شكل من الأشكال حقيقية
و الكتاب ككتاب طبعة وحشة جداً و ميستاهلش الفلوس اللي إندفعت فيه
و موقف مصطفى من الشواذ يدل إنه بيقرا و يتابع اللي الناس بتقوله مش اللي الشواذ نفسهم بيقولوه
و عموماً في الأخر الكتاب يستحق 4 أو 5 من عشرة بالكتير أوي و واحد من ال4 على التقديم بتاع مروة رخا
الكتاب نصه مقدمة و مش مترقم و بيناقض بعضه و حبكته أوفر أوي عايزني أديله كام
الكتاب بجد خد ضجة أكتر من اللازم و وصل للناس فكرة غلط عن الشواذ جنسياً - حسب رأي بعضهم - و أغلب اللي أعرفهم إشترروه يا إما ده مصدرهم الوحيد لفهم الشواذ جنسياً - و بكدة مصطفى سبب لهم ضرر جامد جداً - يا إما يعرفوا أكتر عن الموضوع فمحبوش الكتاب أصلاً و ندموا على الفلوس
على أي حال ده رأي شخصي جداً و يا ريت محدش يعتقد إني بهاجم مصطفى لأ بالعكس خالص أنا بهاجم الكتاب بس

أنا عن نفسي مش ضد الشواذ و مش بحاكمهم علشان متفهمش نقضي للكتاب على أساس كدة أنا بتعامل مع الموضوع بحيادية تامة و برضه متفهمش غلط أنا ضد الشذوذ كسلوك لكن الشواذ كأشخاص دي حياتهم يعملوا فيها ما بدالهم

مصطفى فتحي مؤخراً صدر له كتاب إسمه هوم دليفري بصراحة مستوى الكتاب ده ميشجعنيش أقراله الكتاب الجديد

تحديث :
ده رد مصطفى فتحي ليا على الفيس بوك لما قلتله إني نشرت مقل بهدلت فيه الكتاب بهدلة الكفار و طبعاً إستأذنت قبل نشر الرد "كلامي باللون الأحمر"


"الغلاف تصميم ورسومات احمد بدر يعني مش جايبين الرسومات من فين الله اعلم

الله أعلم بس أنا شاكك في النقطة دي بصراحة و ده حقي بس عموماً يعني شكي مش هيقدم ولا يأخر و لا له فايدة أساساً

الشاب في نهاية الكتاب ما اعلنش عن نفسه للمجتمع ده كان تفسير للكابوس اللي بيجيله.. واضح انك قريت بسرعة لان ده حلم بيحلمه كتير

معلوماتي جمعتها من مثليين وممكن تدخل جروب الكتاب تشوف رأي المثليين ايه في الكتاب

انا عملت نفس اللي إنتا عملته و جمعت نفس المعلومات برضه من أشخاص مثليين و كانت النتيجة شبه مضادة و كان رأيهم زي ما أنا قلت في الكتاب بجد والله

الورق الأصفر القديم هو اغلى انواع الورق واغلى بكتير من الابيض ممكن تسأل حد بيفهم في الطباعة

مش عارف أنا ملييش في الموضوع ده بس كقارئ كنت أفضل الكتاب يبقى في طبعة أكبر و ورق أبيض و برضه ده حقي كقارئ

وجود امام مسجد مثلي حاجة واردة ومتنساش ان القصة حقيقية

رغم إني مش مصدق إن القصة حقيقية بس ما علينا

جملة الاحداث من وحي الخيال اشترطها امن الدولة على دار النشر

و هو كذلك

ترقيم الكتاب كان لاسباب امنية ممكن تقرا اللي اتكتب عن الموضوع ده في المصري اليوم

وفي النهاية اختلاف الرأي لا يفسد للود قضية
تحياتي





و ده مقال المصري اليوم* 
و سايب لكم الرأي بس برضه أنا عند رأيي

فانوس فتحي المسحور.



... يوم الجمعة اللي فات ... صحيت من النوم على صوت الراجل بتاع الروبابكيا أستنى مهما أستنى مش راضي يبطل زعيق شكله خلاص إختار بيتنا يقف تحته  ... بعد ما خلاص فقدت أملي في النوم قلت أنزل أشوف الراجل عنده إيه ... أصل أنا من هواة جمع التحف ... حاجات غريبة بجد ورق قديم و لعب أطفال و تقريبا نص عربية ... و فجأة لقيت الفانوس أيوة فانوس قديم نحاس من بتاع زمان أخدته من الراجل بعشرة جنيه و طلعت شقتي قلت أجرب أدعك الفانوس يمكن أطلع محظوظ ولا حاجة و طبعاً مفيش حاجة حصلت قمت أغسل الفانوس زي الشطار عندها و لقيتلك غبار طالع منه و حاجة كدة شعرها منكوش و بصديري قديم و يفصل الباب بتاع شقتي مرتين طالع منه ... مفيش وقت خالص لأني أخاف و أتخض و الحاجات قال لي : إيه ده يا عم هتغرقنا جوة ليه بتصحيني من النوم مش انهاردة الجمعة برضه قلتله هو حضرتك مين ؟؟؟ قال لي أنا ساكن المصباح ده عايز إيه يا عم
عايز فلوس ^_^
فلوس مين يا عم هو أنا لو معايا فلوس مش كنت حلقت شعري على الأقل و لا جبتلي هدمتين عدلين بدل الصديري اللي وارثه عن جدي ده
طيب عايز عربية  -_-
عربية ؟؟؟ مش مكسوف تقول عايز عربية ؟؟؟ طيب أنا لو عندي عربية مش كان أولى تلاقيني على عربية نص نقل حتى بدل عربية الروبابكيا دي
طيب عايز شقة تمليك بدل الإيجار اللي قطم وسطيT.T
بصلي بغضب و قال : يعني بتقول الكلام ده و ساكن في شقة أمال أنا اللي محشور أنا و المدام و العيال في الفانوس ده نعمل إيه ننتحر يا عم ده إنتا كنت هتغرقنا و سايب الواد مرعي تحت كان هيفطس بسببك
مدام و عيال و مرعي ؟؟؟
هو مش إنتا عفريت المصباح ؟؟
عفريت إيه يا عم ده المصباح إيجار جديدالعفريت ربنا تاب عليه و إحنا أجرناه من بتاع الروبابكيا محسوبك مستر فتحي مدرس إنجلش في المدرسة اللي أول الشارع
بصراحة صعب عليا إديته في إيده خمسة جنيه و رحت حاطط الفانوس جنب المدرسة 
مسكين يا فتحي
 

الاثنين، 5 يوليو، 2010

الضرب في الميت رووووووعة

أكيد أنا قصدي على كتاب الساخر الرائع أحمد الصباغ الضرب في الميت
أنا عارف إني متأخر جامد جداً
و عارف إني كان المفروض أكتب عن الضرب في الميت من زمان جداً
من ساعة ما قريته
 بس اللي حصل يللا إن شاء الله في الكتاب الجاي


أولاً كدة أنا الكتاب جبته من الكتب خان مش إهداء - دي فيها كلام و خناقة بإذن الله - و مش متوقع لسة - بس هخلي الصباغ يوقعهولي - إن شاء الله - .
أول حاجة هتشوفها الغلاف طبعاً و بجد ده من أروع أغلفة الكتب اللي شفتها في الفترة اللي فاتت مصري للغاية بتذكرة المترو بالراجل اللي بيشرب شاي بالإتوبيس بالميكروباص تحس كدة إنك شايف مصر كلها في لوحة واحدة متجانسة مع بعضها و بعد ما تخلص قراية هتتأكد إنها متجانسة مع المحتوى كمان

إقلب الكتاب و شوف الناحية التانية جزء من مقالة من وسط الكتاب إسمها "فيلم سكس عربي" للأسف يا صباغ كان ممكن بجد يبقى أحسن من كدة في مقالات تعبر عن المحتوى أكتر أو تشد أكتر الإختيار ده بالذات كان مش لطيف شوية

ندخل على المقدمة بيهدي فيها الكتاب للقارئ نوعاً ما شايفها تقليدية رغم إني حاسس إنه فعلاً من قلبه بيهديه ليا و ليك و لمصر كلها

شوف بعد كدة المحتوى و ده أهم حاجة

أولاً أحمد كان بعيد كل البعد عن "الأباحة" اللي بقت موضة الكتابة الساخرة بقالها فترة - يمكن هما كلمتين تلاتة و موظفهم أحسن توظيف - و لغته جميلة جداً سلسة و مستساغة و مش مبتذلة بالمرة  بيبدأ صوره الجميلة عن الإنسان بطريقة وصف بجد جميلة مشفتهاش غير منه "الإنسان البيضة و ديك البرابر و و و " و بعد كدة ألبوم ظريف للحاجات اللي بيحطها الإنسان في بقه " لي الشيشة و المعلقة و كدة " و بعدها يدخل على محلات الصباغ للتنمية البشرية بجد كان موضوع جميل و ظريف جداً  بعد كدة بياخدنا على معاناة الشعب الغلبان في الأتوبيس و الميكروباص و وسائل النقل المختلفة و إتكلم عن الشائعات بين المصريين و المسيحيين "أوبا منطقة لبش لبش يعني" و إتكلم و بعد كدة في قسم عن الإنترنت بصراحة منزليش من زور حسيت يمكن في حاجات فيه قديمة حبتين أو مش من جيلي كلام بيقولوه العواجيز الفتاة المصرية اللي سماها ليلى حسيت إنه موضوع إجباري "لازم علشان تبقى كاتب تكتب عن المرأة المصرية مش أكتر" بس بصراحة كان مميز و لو قريت كل مواضيعه عن ليلى في المدونة هتحس فعلاً إنه إتناول الموضوع بشكل مميز جداً و كان في قصتين عجبوني جداً قصة فتة الكشري و فتاة التليفون "بتاعة من فضلك ضع السماعة" و في قصص تاني في المدونة أعتقد أخرها كانت فتاة الحواوشي نيجي لأهم موضوع حبيته كان عن موضوع إنه خال للمخاليل مخاليله ربنا يخليهمله يا رب و موضوعه عن تجربة لم الغسيل و مواضيع كتير و الله بس يا أحمد بعيب عليك برضه تنظيم الكتاب كان المفروض القسم اللي بتتكلم فيه عن نفسك في الأول هو مش لايق غير كدة من وجهة نظري

في ختام مقالي عن الكتاب بحب أهنيه - متأخرة أوي أوي - الكتاب بجد روعة روعة  و ربنا يا رب يوفقك زي كدة و أكتر في الكتب الجاية - إن شاء الله - و بنصحك في الطبعات الجاية تحط في أخر الكتاب موضوع تاني غير الموجود دلوقتي ساعتها الكتاب هيبقى عشرة على عشرة يا عم أحمد

أماكن توفر الكتاب

الأحد، 4 يوليو، 2010

النيل لو راح هيفضل لمصر إيه ؟؟ خيبتنا لمؤاخذة



كنت بقلب في عناوين الجرايد من مدى لقيته بيقولك قال إن دول حوض النيل  بيخططوا يقللوا حصة مصر من النيل عنك و كمان يومين اسرائيل تمارس ألعاباً قذرة في الموضوع ده و قال إيه عايزة تبقى الدولة رقم 11 في حوض النيل بصراحة الموضوع زاد عن حده و مفيش أي تحرك جاد من الجهات المعنية قلت يا واد يا محمد لازم تحاول توصل الفكرة للناس عملت بوست عالفيس محدش إدى للموضوع همه و محدش شاف البوست غسر خمسة ستة غالباً قلت لازم تنزل و تفهم الناس أخدت بعضي و نزلت على قهوة بتاعة مثقفين و حاولت أفهمهم واحد واحد..

أول واحد قعدت جنبه بفتح معاه الكلام ألا مسمعتش يا عم بيقولك دول حوض النيل عايزين يقللوا حصة مصر ... زعق فيا و قال : أنا مليش في السياسة حلوا عنا الله يخرب بيوتكم ... إحم ... الراجل هزقني تمام و قام حتى من غير ما يدفع الحساب و محسوبكم اللي دفع 

تاني واحد كان ملتحي و شكله طيب و ابن حلال قلت كويس مفيش تهزيق قلتله با عم سمعت عن حكاية حصة مصر اللي عايزين يقللوها قال لي إنهم سمعوا و راحوا لشيخ المسجد و هندعي عليهم كلنا الجمعة الجامية إن شاء الله قلتله طيب يا عم مش نكلم المسئولين و لا أي حاجة ولا حتى تبقى قضية رأي عام ولا حاجة زي كدة قال لي يا عم هو في أقوى من ربنا نشكو إليه بصراحة انا إتاخدت في نفسي مش عارف أعمل إيه لو جادلت هيكفرني الراجل و لو مجادلتش هلقى بعت القضية بصراحة خدتها من قصيرها و قلتله ربنا يصلح حالنا و حالك و قمت من قدامه 

 رحت لجماعة عواجيز كدة قاعدين واخدين جنب قلت فرجت دي ناس كبيرة عاقلة و هتفهم قعدت جنبهم و قلت لواحد فيهم مسمعتش يا جدي عن اللي حصل دول حوض النيل هيقللوا حصة مصر و اسرائيل بتلعب ألعاب قذرة و شكلهم هيمنعوا النيل أساساً عنك و شخط فيا و قال لي إنتا بتقول إيه شوف يا حج محسن اللي بيقوله الواد ده قال هيشيلوا النيل قال . رد الحج محسن : و يا ترى هيشيلوه بعربيات نقل و لا إيه هعهعهع كح كح كح رد حج تالت معرفش إسمه بيضحكوا عالعيال الصغيرة روح يا بني مدرستك روح رد الحج الأولاني : ما تبطلوا اللي بتشربوه ده جاتكم وكسة 

قمت من جنبهم و أنا حالتي بالنيلة و قعدت على أخر تربيزة في القهوة قعد جنبي راجل شافني مهموم قال لي مالك يا بني قلتله النيل يا عم هيروح و لا حد حاسس قال لي سمعت يا بني و لا حد هيتحرك إلا لما يروح مننا قلتله طيب و العمل قال العمل عمل ربنا محدش هيسمع و لا يحس متضيعش وقتك و روح حوش مية من دلوقتي

من حيث لا أدري و لقتلك حد ماسكني من قفايا : نيل إيه ياض اللي هيروح ما تبطلوا نصب  يا ولاد الكلب مليتوا البلد ده أنا مش هسيبك غير في النيابةرجاي تعمل أوشاعة و ملقتش غير أهوتي يابن ال^%^%*

و مش هقولك نفدت منها إزاي ساعتها و ربنا لوحده أعلم إزاي مجرجرنيش من قفا اللي جابوني على النيابة و من ساعتها و أنا كافي خيري شري و لا بتكلم عن النيل و لا دياوله

النيل في جرجا "مدينتي"
ألا بالحق ملاقيش معاك جركنين ميا فاضيين

السبت، 3 يوليو، 2010

في الصبح بدري

" لا أتحمل فكرة أن أقتني طائراً في منزلي و لكني أسعد عندما أرى عصفوراً جميلاً على سور شرفتي بعد الفجر أكثر من أي شئ في الدنيا"
" أحب الجمال و أحترمه و لكن لا أفهمه مثل باقي الناس أو أفهمه بشكل مختلف "
" لطالما أعتقدت أنني لست ميسور الحال لأني لا أذهب للنادي و لا أركب هامر و لا أتمشى مع كلبي التنيني على الساحل ثم أدركت أنني ميسور الحال جداً حين رأيت أناساً لا يفعلون نفس الأشياء لعدم قدرتها على المشي أساساً "
" إعتدت على الغربة حتى أنني صرت أشعر بالغرابة في منزلي "
" أحس بالهدوء النسبي حين أستمع لمحمد منير و لكن المشكلة في أنني أستعيد نظرتي للكون بعد نزع السماعة من أذني "



الجمعة، 2 يوليو، 2010

تحشيش الجمهورية "الجزء الثالث" عودة الشبح ^_^

طبعاً بقت هوايتي التانية بعد إني أصوًر هي الكتابة عن الجمهورية و على رأي هاني شاكر بحبهم بحبهم و الله
و زي العادة مش هغير ولا كلمة من كلامهم و هكتب تعليقاتي باللون الأحمر
اللي هو لون الدم و النار و الحروب و الحاجات الجميلة دي

كتب : رئيس التحرير - باشا و الله باشا -

أحياناً تغطي الصحف بعض الأحداث وتهمل الربط بينها مع أن البحث عن علاقة بين الأخبار وبعضها يكون في احيان كثيرة أهم من الخبر نفسه وأكثر اثارة.. يوم 18 يونيو الماضي نظم تحالف جمعيات المصريين المقيمين بالولايات المتحدة مظاهرة بالملابس السوداء امام السفارة المصرية في واشنطن احتجاجا علي ما زعموا انه مصرع الشاب خالد سعيد علي يد الشرطة المصرية! 


زعموا شوف الكلمة دي زعموا بتحس كدة إنها ليها وقع خاص عليك زعموا طيب والله حلوة 
ب ب ب بببب باااااااطل 

وقف المتظاهرون بظهورهم أمام السفارة المصرية في حركة يفهم منها رفضهم لما تمثله الدولة المصرية من سلطات.. سواء كانت هذه السلطات دبلوماسية كالسفارة أو أمنية كالشرطة أو قضائية كالنيابة والطب الشرعي..
المتظاهرون المصريون في الولايات المتحدة اعطوا ظهورهم للسفارة المصرية تعبيراً عن رفضهم لأي سلطة من سلطات الدولة وارتدوا الملابس السوداء حداداً منهم علي وطن رأوا أنه انتهي!! 



و لا عزاء للسيدات

في الوقت ذاته ومع اختلاف التوقيت وفي نفس اليوم 18 يونيو اصطف أيضاًَ عدد كبير من شباب المعارضة والقوي السياسية علي كورنيش الإسكندرية في منطقتي الشاطبي وسان استفانو ومحطة الرمل. أعطوا ظهورهم للمدينة وشخصت أبصارهم إلي البحر في إشارة أيضاً إلي رفض الوطن.. ارتدي المتظاهرون اللون الأسود الذي ارتداه المتظاهرون في الولايات المتحدة امام السفارة المصرية في واشنطن.. وفعلوا أيضاً نفس الشيء في بورسعيد وكرروا نفس "الوقفة" وظهورهم للمدينة ووجوههم للبحر. 



بيترجموا براحتهم دول و المشكلة إنهم بيصدقوا نفسهم هم إدوا ضهرهم للسلطة مش للوطن و ده واضح من دعوتهم و مبادئهم براحتكم قولوا اللي تقولوه برضه بنحب مصر أكتر منكم بكتيييييير

ألم يلحظ أحد أن التوقيت في واشنطن وبورسعيد والإسكندرية وباقي محافظات مصر كان 18 يونيو!! من غير المعقول أن تكون المظاهرات في مصر وأمريكا مصادفة وبنفس الملابس السوداء وبنفس الوقفة ضد الدولة.. انه تفكير مرتب ومخطط أن يحدث في عدة أماكن لتظهر مصر وكأن ابناءها في الداخل والخارج قرروا أن يتظاهروا ضدها في يوم واحد. 



و هو المطلوب بتستغرب ليه يعني و إيه المشكلة وسائل الإتصالات بتخلي أصعب من كدة ممكن

والحقيقة أن طريقة التظاهر بإدارة "الظهر" للمدينة أو للسفارة مأخوذة عن رمز كراهية المدينة الذي ورد في أكثر من فيلم سينمائي أمريكي ومحلي.. فالذي يتجه إلي البحر ويشخص بانظاره إليه هو الراغب في التغيير الذي يمكن أن يأتي من المجهول أو البحر.. وهو ما ظهر مؤخراً في فيلم رسائل البحر للمخرج داود عبدالسيد. 



ما أنا قلت الراجل ده بتاع سينمات فوق يا عم و إرجع للواقع إحنا مش في فيلم و لو في فيلم فأراهنك النهاية هتنزل على رقبتكم كلكم


عودة الشبح

غير أن هذا المعني ظهر أول ما ظهر في الفيلم العالمي مدينة الملائكة أو City of angeles وقد سألت أحد أصدقائي المهتمين بالفن السابع فقال لي إن الفيلم يجسد فكرة رفض الحياة الأرضية ومن ثم فإن الخلاص يكون من خلال قصة حب بين فتاة بشرية "ميج رايان" وملاك "نيكولاس كيدج" الذي ظهر طوال الفيلم مرتدياً بدلة سوداء .. إنها فكرة جديدة لرفض المجتمعات وهي الاقتناع بأن التغيير سيجيء من خلال "قوة خفية".. هذه القوة الخفية "غير منظورة" وارتداؤها للسواد يرمز إلي أنها في حداد علي ما وصلت إليه أحوال الأرض.. ثم عندما يحدث المراد ويتم التغيير تنتقل البطلة إلي اللون الأسود مثل الملاك الذي أحبته أو ينتقل هو إلي اللون الآخر.. 



مين صاحبه ده يخرب بيته 

أرأيتم إلي أين وصلت القوي السياسية في سطحيتها.. مجرد نقل لأفكار الأفلام.. هؤلاء ليسوا سياسيين بقدر ما هم منجذبون إلي الفكر الأمريكي في "الإخراج" السياسي للأزمات والمشاكل.. الأمريكيون برعوا في السينما.. ومنها استعاروا ألقابا أطلقوها علي كل عملية يقومون بها.. قالوا عن تصفية عبدالناصر عسكرياً "عملية اصطياد الديك الرومي".. أطلقوا علي غزو العراق "ثعلب الصحراء".. وعلي محاصرة بن لادن في جبال أفغانستان "كمين للشبح".. 



بذمتك الوقفة الصامتة دي ليها علاقة بالفيلم أساساً ولا حتى من بعيد يا راجل إتقي الله و غير الصنف
و الخطط الأمريكية دي إيه علاقتها بالوقفة و لا إنتا شاطر بتحب تقول للناس إنك إتفرجت على أفلام كتير ؟؟

ويبدو أن قوي المعارضة المصرية قررت أن تقتدي بالأسلوب الأمريكي في ارتداء اللون الأسود عند الاحتجاج.. أمس الأول حدثت مظاهرة لإرهاب جريدة "الجمهورية" وترويع العاملين فيها. في إرهاب فكري واضح لجريدة تؤمن بالسلطات في مصر ومنها سلطة القضاء والنيابة التي تعتمد قراراتها في كثير من الاحيان علي تقرير الطب الشرعي.. 



أهو الجمهورية بتعتمد على القنب الشرعي

المظاهرة التي جاء بها معارضون إلي الرصيف المواجه "للجمهورية" استهدفت ترويع الصحفيين ليغيروا قناعاتهم ويشككوا في كل تقرير أو رواية رسمية باعتبار أن كل ما يصدر عن الدولة لا يعجب المعارضة.. المتظاهرون يريدون ممارسة "ديكتاتورية الأقلية" علينا.. يريدون فرض قانون الشارع علي المؤسسات!! 



د ي ك ت ا ت و ر ي ة ؟؟؟  ديكتاتورية ؟؟ ماشي هعتبر نفسي مسمعتش أخر جملة علشان مرارتي


الأعلي صوتاً يكون أكثر اقناعاً..


الأعلى كفاً - المخبرين لمؤاخذة - مش بيسيبوا فرصة لحد أساساً


 نها دعوة لعدم الثقة في أي سلطة في مصر.. لا قضاء ولا أمن ولا أحزاب ولا حكومة.. الشارع يجب أن يحكم بكل غوغائيته وتطرفه ومصالحه وارتباط بعض القوي فيه بالخارج.. لكن هذا لن يحدث طالما أن هناك عقلاء ومستنيرين في هذا البلد فلابد أن يكون هناك "رأي" و"رأي آخر".


رأي الحكومة و رأي الحكومة اللي عامل نفسه ضد الحكومة غير كدة مينفعش معاهم


. لن تخضع مصر لرأي لا يعترف بالشرعية ولا بالقانون ولا بالدولة..


و بجنيه لمون


لن يخاف الصحفيون والكتاب من إرهاب المعارضة التي تنادي بالحرية لنفسها فقط وترفض الاعتراف بأي قانون سوي ما يتفق مع مصالحها ومزاجها.. 


تباً لكم






طبعاً أنا هروح أكشف على مرارتي بسبب المقال ده لو حد ساب كومنت يستنى لما أرجع و أتمنى إنهم ميشدوش حيلهم أوي كدة إحنا غلابة و مش قادرين نستحمل






الجزء الأول تحشيش الجمهورية ----> المظاهرة و المرسيدس
الجزء التاني نحشيش الجمهورية ---> الحقيقة وراء الجمهورية

نعم للفرانكو

** حسب أخر 500 واحد قروا الموضوع في حوالي 30% وصلوا هنا بالغلط و هما بيدوروا على طريقة يتعلموا بيها الفرانكو ممكن تتفضل هنا لو عاوز تتعلم فرانكو زيهم **


أما لو كنت عايز تقرا أكتر عن الفرانكو فممكن تكمل قراية :)

       في البداية أنا مش جاي أتخانق معاك و مش جاي أطلب منك كشخص حاجة خاالص غير إنك تقرا المقال للأخر قبل أي رد و أعتقد ده من حقي ولا إنتا رأيك إيه ؟؟

       أنا قبل ما أكتب المقال ده لفيت و دخت السبع دوخات علشان أجمع مصادر و أترجمها لأن الموضوع ده مفيش حد عربي بيناقشه إعلامياً أبداً ... يا ريت مقالي ده يكون بداية معقولة و يلفت نظرك على الأقل و هحاول أرفق مصادر بعد كل إقتباس ممكن ترجعله لو معاك وقت


في البداية عايزين نشيل من مخك فكرة قداسة الحروف العربية الحروف دي مش مقدسة ولا حتى تقترب من القداسة أساساً.
 إزاي بقى؟؟؟؟؟؟؟؟؟؟؟؟؟؟؟
 هي مش مكتوب بيها القرأن ؟؟؟
في البداية عايزك تفرق ما بين اللغة و طريقة كتابتها :

يعني لما تكتب كلمة تليفزيون دي إيه ؟؟؟ عربية ؟؟ غلط دي كلمة فرنسية مكتوبة بأحرف عربية .
لما تكتب كلمة al qalam دي بقى عربية مكتوبة بأحرف لاتينية 
عرفت الفرق بين اللغة نفسها و طريقة الكتابة ؟؟

اللغة اللي إنتا بتتكلمها دي إسمها اللغة العربية و الكتابة اللي بنكتب بيها إسمها الكتابة العربية الحديثة :


القرأن بقى متكتبش بالكتابة اللي إنتا بتستخدمها دلوقتي شوف معايا كدة الصورة دي


أهو ده مصحف سيدنا عثمان -رضي الله عنه - و زي ما إنتا شايف   "بذمتك عارف تقرا حاجة ؟؟؟"
أكيد مش عارف تقرا مظبوط ؟
بس دي لغة عربية على فكرة


إقرا بقى الفقرة دي و ركز :
"يمكن إرجاع أصل الأبجدية العربية إلى الأبجدية النبطية التي كُتِبَ بها اللهجة النبطية في اللغة الآرامية.و أول نصٍ معروفٍ بالأبجدية العربية هو نقشٌ من القرن الرابع الميلادي موجود عند جبل رم (شرق مدينة العقبة بخمسين كم)، ولكن أول نصٍ مؤرخٍ بالأبجدية العربية هو نقشٌ بثلاثة لغاتٍ في زبد في سوريا عام 512 ميلادية.و لكن السجل المكتوب بالأبجدية العربية سجلٌ شحيحٌ للغاية، فلا توجدُ إلا خمسةُ نقوشٍ من عصر ما قبل الإسلام بيقين، وبعض النقوش الأخرى التي ربما تكون من قبل الإسلام. في وقتٍ لاحق، تم إضافة النقاط فوق وتحت الحروف لتمييزها. (كانت الصوتيات الموجودة في اللغة الآرامية أقل بكثير من اللغة العربية، وأصبح من الصعب تمييز بعض الحروف الآرامية المميزة سابقا. فقد احتوت الكتابات المبكرة 15 حرفا مميزا تقوم مقام 28 صوتا؛ راجع مثلا أبجدية بهلاوي الغامضة). فكانت أول الوثائق الحية إلى الآن التي استخدمت هذه النقاط أيضا أول برديةٍ عربيةٍ (PERF 558)، والتي يعود تاريخها إلى أبريل من عام 643 ميلادية، مع أن هذه النقاط لم تكن واجبة الاستخدام إلا في وقتٍ لاحقٍ جدا.كانت النصوص المهمة كنص القرآن الكريم مثلا تحفظ كثيرا؛ وربما نشأت هذه العادة التي ما زالت رائجةً في المجتمعات الإسلامية اليوم من الحاجة الماسة لتجنب الإبهام الناتج عن عدم وجود النقاط." *


و طبعاً بالنسبة للغة العربية فالأصول التاريخية بتاعتها مبهمة بس على أصدق الأقوال ممكن ناخد بحديث الرسول "ص" إن سيدنا إسماعيل أول من تكلم العربية لما كان عمره 14 سنة لأنه نسي لسان والده سيدنا إبراهيم يبقى شوف معايا الفرق بين وقت كتابة العربية و الحقبة اللي عاش فيها سيدنا إسماعيل 


اللغة العربية بدأت سماعية و بعدها بكتير كتبت
الله وحده أعلم بدأت كتابتها باللغة السامية الأم و لا بالأرمية و لا بالسيريانية
و بعدها بكتير برضه بدأت كتابتها بالعربية القديمة جداً اللي هي بعيدة جداً عن شكل حروفنا " كانت بتتكون من 15 حرف ليهم نطق 28 حرف زي عدد حروفنا"
و بعدها بمراحل برضه كتبت بالحروف اللي إحنا بنكتبها بيها دلوقتي شوف بقى النقطة التانية 

الحروف الحديثة نفسها اللي بنكتب بيها حالياً أول ما كتبت كانت غير الشكل ده خالص  شوف كدة الصورة دي
طبعاً ملاحظ الفرق بين 1 و 4 
"مثال على تطور نظام الكتابة العربية منذ القرن التاسع إلى القرن الحادي عشر،
 1) البسملة كتبت بخط كوفي غير منقط ولا مشكّل.
 2) نظام أبي الأسود الدؤلي المبكر ويَعتمد على تمثيل الحركات بنقاط حمراء تكتب فوق الحرف (الفتحة) أو تحته (الكسرة) أو بين يديه (الضمّة)، وتُستعمل النقطتان للتنوين.
 (3) تطور النظام بتنقيط الحروف.
 (4) نظام الخليل بن أحمد الفراهيدي المستعمل إلى اليوم، وهو وضع رموز مختلفة للحركات فيما تبقى النقاط لتمييز الحروف."*



كدة إنتا وصلت لفكرة إن اللغة العربية تختلف عن الكتابة العربية ؟؟؟
 اللغة العربية نفسها لغة مقدسة و المفروض نحافظ عليها لأن القرأن ربنا أنزله بيها 
أما الكتابة فإتغيرت كتيير جداً و مفيش مانع تتغير و أكيد هتتغير مع الإستخدام و ده في حد ذاته مش مشكلة 

وصلتلك النقطة دي ؟؟؟
كويس 
الفرانكو بقى ملوش خالص في موضوع اللغة الفرانكو حسب تعريف ويكيبديا :

"الفرانكو أرابيك هي أبجدية مستحدثة غير رسمية ظهرت منذ بضعة سنوات, تستخدم هذه الأبجدية علي نطاق واسع بين الشباب في الكتابة عبر الدردشة على الإنترنت في المنطقة العربية، ونتنطق هذه اللغة مثل العربية تماما إلا أن الحروف المستخدمة في الكتابة هي الحروف والأرقام اللاتينية بطريقة تشبة الشيفرة. وتعتبر الأوسع انتشارا في الكتابة علي الإنترنت أو عبر رسائل المحمول"*

يعني مش لغة زي ما الإخوة أعداء الفرانكو بيسموه لأ ده بالكامل كدة طريقة كتابة للغة العربية و مش بس العربية الكتابة بالأحرف اللاتينية مش مقتصرة على العربية لأ كل لغات العالم في ناس بتكتبها بالأحرف اللاتينية و بل في دول معترفة بالموضوع ده رسمياً زي الصومال و اليابان "المصادر تحت"

و علشان تعرف مش بس الفرانكو اللي بيتكتب بيه العربية في طريقة كتابة إسمها الكرشانية دي إتكتبت بيها اللغة العربية بحروف سيريانية * في سوريا  من 13 قرن و طبعاً كانت بتأدي الغرض و إستخدامها كان تقريباً قاصر على الكهنة و مازالت مستخدمة بشكل ضيق بين رجال الدين المسيحي 

و بعدين ليه بنربط الكتابة العربية للدرجة دي باللغة العربية ما الفارسية و التركية و الكردية و الكازاخستانية و أغلب اللغات دي بتتكتب بطرق تانية و لغات كتير بتتكتب بنفس الحروف عادي يعني



و يعدين الناس اللي بتاخد تركيا كمثال و بيقولوا إن لو إستخدمنا الفرانكو هنحكم على الكتابة العربية بالإندثار زي ما تركيا إتحولت لإستخدام الحروف اللاتينية دول قروا التاريخ غلط تركيا مرت بحالة ثورة تغريبية علمانية شديدة جداً بعد إنهيار الخلافة قبلها الناس  حتى مكنتش بتستخدم الفرانكو بس واحدة من صور الثورة هي تغيير طريقة الكتابة مش لأنهم إستخدموا الفرانكو فإتعودوا عليه و بقى إستخدام العربي تقيل عليهم

و بعدين خد عندك مثال اللغة الصومالية بتتكتب بالعربية و اللاتينية على حد سواء*الناس معندهاش مشكلة و لا اليابان تعرف إن اليابان بيكتبوا اللغة اليابانية بأربع كتابات مستقلة بالكامل يعني مفيش حتى أحرف مشتركة بين كتابة و التانية
الاولى : الكانجي و دي بتعتبر أحرف مستعارة من الصينية *
التانية : الهاراجانا *
التالتة  : الكاتاكانا  *
و التانية و التالتة دول تطوير عن الكانجي
و الرابعة : الروماجي : اللي هي الفرانكو بتاعتهم *
و طبعاً إستخدام الروماجي قانوني و الدولة بتدرسة في المدارس


تعالى كدة خد الكلمتين دول مهمين أوي
الروماجي بيستخدم في اليابان من أيام الإحتلال البرتغالي من خمس قرون إلا حاجة بسيطة و من بعد اليابان ما اتهزمت في الحرب العالمية  التانية ابتدوا يعلموه لعيالهم في المدارس و رغم كدة و بعد ما يقرب من قرن ده مأثرش أبداً على الكتابات الأصيلة بتاعتهم لأ بالعكس ده كان سبب لدفع ناس كتير لتعلم اليابانية و لك أن تعرف إن عدد غير اليابانيين اللي بيتكلموا اليابانية بطلاقة حوالي عشرين مليون ده غير الملايين اللي بيجيدوها نصف إجادة و الملايين برضه اللي بيحاولوا يتعلموها و أغلبهم بيبدأ تعليم بالروماجي .


إيه بقى الفرق بين الروماجي و الفرانكو عربي بتاعنا ؟؟؟؟؟؟؟؟؟؟؟؟

أهو ده أهم سؤال بجد في المقال و إجابته :
 إن اليابان قننت إستخدام الروماجي يعني كنت بكلم واحد صاحب ياباني و غلطت في كلمة بدل حرف u كتبت o راح قعد نص ساعة يشرحلي غلطتي الفادحة يعني الفرانكو بتاعهم واحد مش حد يكتب  assalamu alikum و و احد يكتب al slam 3likom و واحد تاني يكتب alslamo 3likum لأ عندهم كتابة واحدة بيكتبها الجميع 

و ده أساس كلامي لازم كهنة اللغة العربية يعترفوا بكتابتها بالأحرف اللاتينية و يحاولوا يقننوها 
و ده هدفي التاني من المقال 
بص بقى بيني و بينك عايزين نحط الخطوط العريضة لأهمية الفرانكو
أولاً : العالم كله بيعرف يقرا الأحرف اللاتينية و ده هيسهل جداً تعليم العربية لغير العرب 
ثانياً : جميع الإجهزة الحديثة اللي بنستخدم فيها الكتابة بتتعامل أحسن مع الأحرف اللاتينية " الكمبيوتر و الموبايل و و و "
ثالثاً : أسرع و أسهل من الكتابة العربية علشان مفيهاش تشكيل

أنا بتمنى لو كنت وصلت للنقطة دي من المقال تكون عرفت أهاف المقال نفسه
أولا : لازم تعرف إن الفرانكو مش عدو للغة و إنه ملهوش علاقة أبداً بيها هو ما هو إلا وعاء ليها زي الأحرف العربية بالظبط
ثانياً : بطلب من الإخوة بتوع المجمع اللغوي يحاولوا يدرسوا الموضوع و يقننوه
ثالثاً : قبل ما تقرا لواحد من الإخوة الأفاضل اللي بيكتبوا ضد الفرانكو عايزك تسأله مصادرك إيه ؟؟؟ و أمثلتك التاريخية إيه ؟؟؟
رابعاً : تحاول قد ما تقدر تشيل التابو الفكري المحيط بالكتابة العربية لأنها مش مقدسة ولا حاجة المقدس فعلياً هو اللغة السماعية مش كتابتها اللي إتغيرت كتير جداً.



يا ريت بعد ما قريت المقال تكون غيرت نظرتك للفرانكو على إنه عدو للغة لأ خالص هو ما هو إلا وعاء حاوي ليها زيه زي السريانية و زي العربية القديمة و الأرامية و العربية الحديثة