الأحد، 28 فبراير 2010

حكاية كلبة

شايف معايا العمارة اللي قصادك دي ؟
مش شايف طيب تعالى إنزل معايا شوية
الشقة اللي في الدور الرابع على إيدك اليمين
المطبخ
الست التخينة و البنت الصغيرة السمرة
بقى ده غسيل كويس يا كلبة
أنا هوريكي
علشان أبقى صادق مش لازم الضربة اللي بين لوحين الكتف علشان الموقف يبقى نموذجي
بس ده اللي حصل
عرفت بقى إيه حكاية الكلبة ؟
يللا نرجع تاني

السبت، 27 فبراير 2010

الرفيق كلب

عمرك فكرت في يوم في اللي هيحصل لو كان المعسكر الشرقي هو اللي فرض سيطرته مش الغربي يعني لو كانت الثقافة السايدة السوفييتية مش الأمريكية
تعالى نتخيل ده
ده يوم من حياة شاب مصري لو كان عاش في الثقافة دي
"صحيت انهاردة متأخر 5 دقايق و ده ازعجني جدا في البداية نزلت أفطر
"مرحبا يا رفيق بابا "
غمغم الرفيق بابا بكلام غير مفهوم ثم سحب نفسا عميقا من سيجارته ذات الرائحة الكريهة
رحت أفطر في المطبخ
"مرحبايا رفيقة الحجة ماما "
"مرحبا يا رفيق ابني "
ثم غممت بكلام غير مفهوم و هي تسحب نفسا عميقا من سيجارتها كريهة الرائحة
فطرت و رحت أحط الفطار للرفيق الكلب
نظر إلي الرفيق كلب منزعجا لأني إتأخرت عليه أكتر من 5 دقايق
ثم غمغم بكلام غير مفهوم و سحب نفسا من سيجارته كريهة الرائحة
رحت للكلية و وصلت في معادي مظبوط و قابلت كل من الرفيق هانيوف و الرفيق شيكو أوف عند مدخل مدرج المحاضرات و دار بيننا الحوار التالي
-مرحبا رفيق أيمنوف
-مرحبا رفيق هانيوف
-مرحبا رفيق أيمنوف
-مرحبا يا رفيق شيكو أوف
غمغمنا إحنا التلاتة بكلام غير مفهوم و إحنا بنسحب نفس من سجايرنا كريهة الرائحة

محاضرة في اللغة الروسية
محاضرة في فوايد المعتقلات و مثال لها معتقل سيبيريا
محاضرة شتيمة في المعسكر الغربي

بعد الجامعة روحت على البيت
اتفرجت على فيلم سلام يا رفيقي للرفيق عادلوف إمام
و بعدها ابتديت تماريني العسكرية و درس النشان من 4 ل7
بعد كدة الغدا 7 ل 7:30
مذاكرة من 7:30 ل 11
كتابة مذكراتي من 11 ل 11:10
نوم 11:15 ل 7:15

الأحد، 21 فبراير 2010

إزازة بيرة

1
إزازة بيرة
و بنت قتيلة
على كرسي ب3 رجلين
و تذكرتين لفيلم جديد
و دفتر شكله فيه مواعيد
و قلب وحيد
...
2
وحيد جدا و مش قادر
يكمل فيلمه للأخر
خرج منه
مشي مسهم
طريقه منين مهوش عارف
لكن خايف
...
3
خايف من بكرة ليجيله
خايف ليعدي من ليله
بيحلم لو ينام مقتول
أو يسهر مع العشاق
لكن في دماغه طن هموم
مهوش شاطر في عد نجوم
و لا عارف يروح في النوم
....
4
وليله طويل يفكر فيه
في الكاس اللي مشربهوش
في تذكرة السيما التانية
في دفتر مرمي عالمكتب
في بنت قتيلة عالكرسي
في قلب أخد على المشاوير
و باقي إزازة البيرة

الخميس، 18 فبراير 2010

عالكمدينو

عالكمدينو
البوم صور
صفحات قديمة متربة
ذكريات متهربة
من بير كبير اسمه الزمن
البوم صور
الصورة الأولى ليا أنا
بضحك
أكيد ده من زمن
أصلي نسيت معنى الفرح
الصورة التانية ليا أنا
واقف بعيد
أبعد من إني أتجرح
الصورة التالتة ليا أنا
كل الصور دي ليا أنا
أصلي إتضحلي إن أنا
عايش وحيد
حتى الونس في وحدتي
ألبوم صور
عالكمدينو

الأربعاء، 17 فبراير 2010

الجماعة الويرلسية

طيعا بعد ما رجعت من سوهاج لبيتي حبيبي في شبرا أول حاجة فكرت فيها إني أوصل نت أجازة بقى و كدة
ابتيت رحلة البحث و التنقيب و الذي منه أول ما شغلت الويرليس لقيت مجموعة كبييييرة من الشبكات و كلها متشفرة ده الطبيعي حاولت بكل الطرق أوصل لأصحاب الشبكات دي ابتديت بوضع خطة مدروسة جداً
1-ادور ما بين أسامي الشبكات على رقم تليفون
2-أصحاب المحلات القريبة
3-الجيران
4-مفيش 4 هو 3 كويس جداً

ابتديت في تنفيذ خطتي و للأسف مفيش ولا رقم تليفون
ميأستش
2- أصحاب المحلات ميعرفوش حاجة تماماً
ميأستش
3-و لأن علاقتي بالجيران مش ولا بد لأني في حالي و محدش يعرف حتى إسمي ، حطيت إعلان صغير تحت على باب العمارة نصه كالأتي
(بسم الله الرحمن الرحيم
سكان العمارة الأفاضل ، أبحث عن شبكة ، يا ريت اللي يعرف يساعدني يكلمني ، أيمن "شقة 8 ")

لحد هنا عادي جدا صح ؟
تاني يوم لقيت حد بيخبط على الباب
كويس الإعلان جاب نتيجة
فتحت الباب ،لقيت كتيبة من ظابط و 3 عساكر لابسين أبيض في أبيض
نهارو أبيض
-إنتا أيمن ؟
-أيوة يا باشا
-هاتوه

موعتش على نفسي غير و أنا قدام ظابط كبير في الرتبة (مبفهمش في الرتب الصراحة)

س: إسمك و سنك و وظيفتك من واقع بطاقتك الشخصية
ج : محمد أيمن أحمد - 18 في أكتوبر اللي فات - طالب
س: إنتا اللي كتبت الورقة دي ؟
(ناولني في إيدي الإعلان إياه)
ج: أيوة يا فندم
س:إنت مين وراك يلا
(سؤال غريب بصيت ورايا ملقتش حد)
-يظهر البعيد غبي أو بيستهبل
ج : معرفش حد بالإسم ده
س: إسم الشبكة اللي بتدور عليها إيه ؟
ج : أي شبكة إنترنت حضرتك
س : يعني ليكم نشاط على الإنترنت إحنا مش كنا سبق و لميناكم يا بتوع الإنترنت إنتوا ؟
ج : حضرتك هو الإنترنت بقى جريمة ؟
س : تعرف إحنا هنوديك فين
ج : السجن يا فندم ؟
- لا لا سجن إيه ده إنتوا مقامكم غالي شبكات و إنترنت ده إنتا وقعتك منيلة إنتا هتروح مارينا يا حبيبي
- يا فندم مارينا إيه دي اللي في شهر فبراير ده أنا كنت أموت
ضحك و بصلي و قال : لا متخفش دي هتعجبك جداً
- و من ساعتها و أنا بدعي على الشبكات و اللي إخترع الشبكات

الأحد، 14 فبراير 2010

عزيزي الراكب تبا لك

"حد فيكم جرب يسافر بالسكة الحديد , كتير ؟
عارف والله , بس في ناس مجربتش , أو على الأقل مجربتش المسافات الطويلة , أنا بقى بسافر المسافات الطويلة دي لما بروح بيتنا في سوهاج مشوار لذيذ 9 ساعات كدة على الأقل , انهاردة كنت راجع من سوهاج , في القطر الأسباني زي ما بيسموه بتوع المحطة , او القطر المكيف زي ما باقي الناس بتسميه , أول ما ركبت رحت أقعد مكاني اللي جنب الشباك زي ما وصيت الراجل اللي بيقطع التذكرة و غمزته بخمسة جنيه علشان ميحجزش كرسي الممر لقيت الراجل اللي جنبي قعد مكاني و نام :@ اضطريت أقعد في كرسي الممر و قعدت و طلعت اللاب توب و حاولت أقرا شوية مقالات كنت جايبهم لنبيل فاروق و طبعا لأني نحس جدا نسيت أطفي اللان و البلوتوث و اوطي الاضاءة فالشحن مكملش نص ساعة و خلص , مش مشكلة , فتحت شات من الموبايل و حاولت أكلم أي حد بس علشان القطر ماشي بسرعة و الشبكة وحشة جدا عادي بالنسبة لأي قطر بيحترم نفسه المصيبة إن الكلام بتاع الناس بيوصل و كلامي أنا لأ فاكرين إن أنا منفضلهم قفلت الشات علشان محدش يظن فيا ظن السوء , مش مشكلة , شغلت اغاني , الله عليك يا عمرو أغنية راحل بتحسسني بموقفي قعدت أسمع أغاني و منسجم بس حاسس إن أنا مش مستريح ل3 أسباب
1- الراجل بتاع البوفيه اللي مصمم إنه يخبطني
2- قعدة كرسي الممر وحشة جدا للي جربها
3- الراجل اللي نايم ده حاطط إيده على المسند اللي بيننا و طبعا ده بيايق جدا (أكيد جربتوها في السينما شوف ساعتين و صعبة جرب بقى 9 ساعات )
الراجل صحي إتتاوب و بصلي بقرف (عادي هما الناس اللي فوق الستين بيبصوا بقرف ليا دايما لسبب أتمنى إني أعرفه)
و بص من الشباك منعا لأي حديث ممكن أوحههوله ,مش مشكلة ,راجل شرير لسة حاطط إيده على المسند غلاسة جدا :@ بعد شوية إكتشفت إني كل ما أبص في الموبايل يبص هو في معايا أو يبص عليا (شعور غير محبب) مرة لفيت دماغي بسرعة إتأكدت إنه كان باصصلي راح بصلي بقرف و دور دماغه للشباك , مش مشكلة , أنا مش متضايق أهه أعتبره معجب مع محطة أسيوط البطارية لفظت أخر أنفاسها , مش مشكلة أقعد أتفرج على الناس , الكرسيين اللي جنبي واحدة ست منقبة رافعة نقابها علشان الحر و الكتمة و كدة و طبعا بصالي بغضب و حقد و كره و كدة يعني علشان أتوكس و أبص الناحية التانية و جوزها اللي شغال يقزقز لب , مش مشكلة , الكرسي اللي قدامهم في راجل ييجي حاجة و خمسين كدة و بنته اللي يا دوب تدي شبه ليا و أنا مش حالق دقني بس الراجل قاعد بالجنب عالكرسي و باصصلي أنا بالذات و شكله عايز يلبسني قضية تحرش و يحبسني سنة , مش مشكلة , أبص في الأرض لاحظت كومة قشر اللب اللي غطت المكان (الكومة شكل مخروطي شبه منتظم ) منظر مش لطيف بصيت تحت رجليا الراجل اللي جنبي قلع جزمته طبعا لازم بعد ما شفت الجزمة ابتدي أشم ريحتها حتى لو مكنتش ملاحظها قبل كدة العامل النفسي الله يجازيه بالخير الجورنال الحل الأخير كنا قربنا نخش على المنيا و ده معناه إن الأخوة الباعة الجائلين على وصول ربنا يجيبهم بالسلامة حد عايز شاااااي شاااااااااااي شااااااااااااي بجنيه واحد ... أه ده الراجل بتاع الشاي , واحد مشلول بيبيع سورة ياسين و بيلف على العربية كلها و بعد ما خلص الغربية مشى منها عادي خالص و هو بيعد الفلوس , و ست بتشحت بالطريقة الكلاسيك النبي يا بني ست عجوزة بجري على يتامى النبي ينورلك طريقك و يسترك و يوصلك سالن النبي يا بنتي معايا بنت في سنك و مش عارفة أجوزها و هكذا عدت و جه بعدها حبيبي اللي مستنيه من أسيوط الدستور يا عم مفيش والله طيب الأهرام مفيش والله الأخبار ؟ الجمهورية النبأ الشروق أي نيلة ؟ عندي الأفوكاتو و أخبار الحوادث و عالم الجريمة :/ خاب أملي , مش مشكلة كنت شوية و هبكي بصيت للسما (السقف ) و قعدت أدعي ربنا لقيت تليفزيون بس مش شغال فرجت أغمز الواد بتاع البوفيه ب5 جنيه (عملة مصر الموحدة ) و يشغلهولي بعد ييجي نص ساعة عدى الواد بتاع البوفيه ... شاي حاجة ساقعة سندوتشات ... واحد شاي يا بني .... إداني الشاي ناولته 5 جنيه و قلتله هو التليفزيون ده مش شغال ؟؟ (سؤال وجيه ) قاللي لأ يا أستاذ خربان قلتله يا عم في 6 تليفزيونات في سقف العربية قال كلهم بايظيين ... طيب لو سمحت ممكن توطي الدفاية بتاعة العربية شوية الدنيا حر جدا ... لا والله المهندس مش قاعد ....قلتله طيب الباقى قال لي لأ ماهو الشاي ب 5 جنيه ... اتغظت جدا جدا من كل حاجة و قعدت متغاط من المنيا لبني مزار تقريبا
لسة الراجل الشرير حاطط إيده على المسند
و لسة الست بصالي بصة يا منحط بص الناحية التانية
ولسة الراجل اللي قاعد بالجنب بيبصلي بقرف
و كومة قشر اللب بتتكوم أكتر و أكتر
و الدنيا حر
ريحة الجزمة وحشة جدا
مع بني مزار إكتشفت إني مش بستحمل السفر و إني محتاج أرجع اللي في بطني ضروري طبعا ساهم في الشعور ده الدفاية و الجزمة و إني قاعد في الممر رغن إن الشباك مقفول و مش بيجيب هوا بس لما بقعد جنبه بتكون حالتي أحسن (أيوة هو العامل النفسي )
لسة الراجل الشرير حاطط إيده على المسند
و لسة الست بصالي بصة يا منحط بص الناحية التانية و شوية و تقتلني
ولسة الراجل اللي قاعد بالجنب بيبصلي بقرف لو النظرات رصاص كان زماني مصفاية
و كومة قشر اللب بتتكوم أكتر و أكتر و قربت توصل لركبي
و الدنيا حر جدا جدا جدا
ريحة الجزمة وحشة جدا الراجل ده كان حاطط رجله فين ؟
االمهندس مش موجود ربنا ينتعه بالسلامة
دروب
الكرسي اللي قدامي بقى على حجري فجأة
هو مستغرب و مش عارف اللي حصل
فين الكمسري ؟
الكمسري جه و قال استحملوا المهندس مش قاعد و خلاص فال ساعتين بس
اسمه شنودة و من نجع حمادي و خلاص تقريبا نام على حجري ,مش مشكلة
لسة الراجل الشرير حاطط إيده على المسند و تقريبا لزقت في المسند
و لسة الست بصالي بصة يا منحط بص الناحية التانية و شوية و تقتلني و تقريبا طلعلها أنياب
ولسة الراجل اللي قاعد بالجنب بيبصلي بقرف لو النظرات رصاص كان زماني مصفاية و تقريبا اللي في جيبه ده مسدس
و كومة قشر اللب بتتكوم أكتر و أكتر و قربت تغرقنا
و الدنيا حر جدا جدا جدا جدا جدا جدا
ريحة الجزمة وحشة جدا الراجل ده كان حاطط رجله فين ؟ غالبا الجزمة دي بتتحلل
االمهندس مش موجود ربنا ينتعه بالسلامة و يسمي الواد على إسم جدته
عايز أرجع على الأخ شنودة
الجيزة
طبعا نزلت و أنا بلعن كل مسئول عن السكة الحديد و كل اللي شغالين فيها و خصوصا المهندس المفقود .

السبت، 13 فبراير 2010

خلاص

خلاص
ريحة الفورمالين مبقتش تضايقك
و لا لونك اللي بقى أسمر جدا
ولا العضم اللي متنتور في كل حتة
حتة الجلد اللي هناك دي
كانت من جلدك
قلبك؟
مش مقبوض ؟؟؟
خلاص
إنتا ميت

الثلاثاء، 9 فبراير 2010

البنت اللي واقفة هناك دي

مالك كدة بتبصلها
عايز ترسمها
طيب متنساش ضحكة عينيها
أوضح من ضحكة شفايفها
و متنساش النمش في وشها
ده اجمل حاجة فيها
رسمتها
استريحت
قطع الورقة بقى
لأن عمرها ما هتكون لي

اتنين


اتنين
باصين لبعض بتاع ساعتين
و مفيش كلام
نضارتين
نضارة سودة على عينيها
بتداري بيها انها عاشقة
نضارة خضرة بلون روحه
الواد ده دايب على روحه
لكن جبان !




السبت، 6 فبراير 2010

حكاية ولد

الواد بيرسم حلو
الواد بيكتب شعر
الواد فاكرها بجد
و كل شئ له حد
الواد بيرسم بيت
رافض يدخل حذ
ناوي يفضل بعيد
ناوي يكمل وحيد
2
الواد بيرسم سور
بينه و بين الناس
بيعلي فيه برسمه
والناس تقول فنان
يرسم كمان و كمان
و السور يلم الناس
لكن لساه سور
3
الواد بيرسم بيت
و سقفه واقع فحت
والواد باصص لتحت
و البيت غريب
بياضه ناشع
و سقفه واقع
مرسوم بلون اسود كئيب
4
الواد وقع
محدش سمى عليه
تصدق !!?
محدش حس بيه
بجد والله
ولا حد خاف عليه
حتى لو قلبه انخلع
5
الواد بيرسم حفرة
باللون الأسود
ورا السور
في ركن البيت
جنب قلمه
ده قبره
6
مات...
كان نفسه يبدع
كان نفسه يبقى
صلاح جاهين
بس كان ولد بيكتب على قده

الأربعاء، 3 فبراير 2010

شكرا

"...جميلة جدا ... وشها رقيق ... و بنضارة... اسمها? ...اسمها? البادج على صدرها ...إيمي...
"الحاجات دي مع حضرتك?"
"أه..."
... صوتها رقيق جدا ... خلاني أحلم... سرحت ...
"كريديت?"
"فيزا"
""توقيع حضرتك"
"..."
ايدها ??
...دبلة!
"أي خدمة تانية حضرتك?"
لأ!
"لأ شكرا..."

الاثنين، 1 فبراير 2010

شرق الوادي معاك لحد باب الحمام !!!


الساعة 12 راجع من الكلية بفتح الباب لقيته قصادي "حضرتك أكيد هتسأل أنا إزاي دخلت الشقة محمد محسن مندوب شركة شرق الوادي للتسوق المنزلي معك أينما كنت أنا بعرض على حضرتك جرس باب بصوت تتر مسلسل نور ده غير ..." ...
دخلت من الباب على أوضتي أغير هدومي " حضرتك أكيد هتسأل أنا إزاي دخلت أوضة حضرتك علاء جاد المولى مندوب شركة شرق الوادي معك أينما كنت بعرض على حضرتك السرير أبو 4 أدوار أيوة يا فندم أربع أدوار و بأسانسير ..."...
استغنيت عن فكرة تغيير هدومي و ولعت سيجارة و فتحت التليفزيون "... شركة شرق الوادي معك أينما كنت و نواصل عروضنا العرض ال119 طقم ملاية السرير ال59 قطعة و مرتبه هدية ..."...
قفلت التليفزيون و دخلت اطفي السيجارة في الحمام " حضرتك أكيد هتسأل أنا بعمل إيه في الحمام أنا مرسي ممدوح مندوب شركة شرق الوادي معك أينما كنت بعرض على حضرتك الحمام المحمول و معاه هدية طقم حفاظات و جراب نضارة و محفظة جلد سحلية و ...) ...
طفيت السيجارة في الحمام و دخلت أشرب كوباية شاي فتحت النملية " حضرتك أكيد هتسأل أنا إزاي قاعدة في النملية أنا دعاء زينهم مندوبة شركة شرق الوادي معك أينما كنت بعرض على حضرتك طقم اطباق ام العيال ال9700 قطعة و معاه هدية 99 معلقة تقليب و 14 ملاحة و شياطتين و ..." ...
اكتشفت ان الكفايين الكتير مش كويس فتحت الحنفية أشرب " حضرتك أكيد هتسأل أنا إزاي دخلت الحنفية حضرتك أنا عبدالسلام أمين سباك و مندوب شركة شرق الوادي معك أينما كنت حضرتك أكيد محتاج فلتر الميا ال74 مرحلة الجديد من شركة شرق الوادي ..." ...
قفلت الحنفية و نزلت من الشقة و في محطة المترو وقفني واحد و قالي" حضرتك مندهشتش ليه من وجودنا في شقتك انا سامي أحمس مندوب شركة شرق الوادي معك أينما كنت بعرض على حضرتك جهاز الاندهاش مظهر انيق و بيشتغل بحجر ساعة و ..."...
ركبت المترو قعدت جنب بنت تحفة قلت يادي النيلة لتفتكرني بتحرش بيها وأنا مش حمل أدفع غرامة ولا حمل حبس وقفت و قلت اقعد راجل كبير في السن شوية قالي " يابني انتا أكيد خايف تتحرش بالبنت دي بس ده مش علشان انتا محترم لأ ده علشان المشكلة اللي في البلد أنا بعرض على حضرتك الحبه الفوشيا من شركة شرق الوادي معك أينما كنت الحج عثمان عبدالسلام مندوب شركة شرق الوادي معك أينما كنت" !!!