الأربعاء، 30 يونيو، 2010

إسمه محمد - قصيدة


كان كاتب إسمه و عنوانه
على جلدة كشكول متقطع
و حاططها في جيب الجينز شمال
 أسامي الناس اللي في قلبه
أكتر مالنوتة على موبايله
و الساعة في إيده بتتقدم
و غريبة ده عمره ما إتأخر
و ميدالية من مفتاح واحد
و الخط التاني في محفظته
و تلات أربع جنيهات فضة
و علبة مناديل
...
لابس شال و إحنا في عز الحر
و قميص أبيض بس مكرمش
و شراب مش ماشي على الكوتشي
أحلامه بطول شعره المنكوش
غريبة إنه بيحلق دقنه
...
مش متضايق بس مكشر
و إيديه في جيوبه مبيشلهاش
و سماعة مبيسمعهاش
و منزلها على رقبته
...
إسمه محمد
...

لماذا نكره فيتنام

مش بكره في حياتي قد اللي بيقول حاجة من غير دليل يعني مثلا بيقولك يا سيدي - أهي بيقولك دي في حد ذاتها مصيبة -
هو يعني إيه بيقولك و لا مين بالظبط اللي بيقولك و لا يعرفك منين علشان يقولك
 يعني صاحبك يرسم الوش الجد و يتكلم كأنه من قادة المافيا الأفاضل و يقول " بيقولك يا سيدي اليابان عندهم تنانين بيربوها في بيوتهم " و يحلفلك إنه شاف واحد ماشي رابط تنين في سلسلة ...يا حمدي يهديك يرضيك ... أبداً في تنانين في اليابان و الناس بتربيها في بيوهم
إيه جاب السيرة دي بس ?
امبارح كان في واحدة عندي على الفيس كاتبة "نص لبه" كانت مستغربة إن الرجالة المصريين مش ممكن يحبوا البنات السمرة و إن كل اللي بنقوله ده تصنع و إن إحنا عنصريين وجزم من جوة و في ناس كتير علقوا عليها و مناقشات بقى و حوارات و ناس معترضة و ناس بتستنكر و ناس بتشجب و ناس بتعيط كمان
طيب مين قال لك كدة ولا مين وصلك المعلومة دي ما أنا أهو راجل عادي جدا و شرقي يعني و عادي عندي و كذلك ناس تانيين كتير أعرفهم متجوزين و سعدا و عادي الموضوع حتى مش محتاج تعليق هي مسائل فردية بحتة و موضوع شخصي بالكامل
و كمان الأخت مردتش على الناس اللي بيتاقشوا كأنها كاهنة من كهنة الحكمة هبطت لثوان ثم عادت إلى أرض الحكمة الخفية مش عارف بجد هي جابت معلوماتها دي منين ???
يعني أنا كتبت قلت على الفيس ليه المصريين بيكرهوا فيتنام ... محدش سألني جبت المعلومات دي منين ولا حد همه مصادري بس بيناقشوني و بيقولوا لأ إحنا مش بنكره فيتنام و كدة المشكلة إن في حاجات ممكن تبان صح أو تكون على هوا المستمع يعني مثلاً لو قلتلك إن المانيا وصلت فيها نسبة الإنتحار ل 50% والله هتلاقي ناس صدقتني لأن عنده قابلية للتصديق
مش عارف الناس اللي بتنشر الحاجت دي بتبقى قاصدة مثلاً و لا بتيجي معاها صدفة و لا إيه بالظبط ؟؟؟
زي مرة قبل كدة برضه واحد كتب عن سبب تفضيل المصريين الشاي عن القهوة سألته هو إنتا عندك إحصائية على الكلام ده ؟؟؟
قال لي يابني الناس كلها عارفة إن المصريين بيحبوا الشاي عن القهوة
مرة سواق تاكسي كان بيناقشني مناقشة جادة ليه الصعايدة أطول من الفلاحين !!!!
و مرة كان في واحد صاحبي مصمم إن يوم الخميس بيبقى حر عن باقي الإسبوع و حتى رافض المناقشة
لو في حد في الدنيا نفسي أشوفه و أتخانق معاه و أضربه - أكتر من خدمة عملاء موبينبل - فهو الراجل اللي بيقولك ده لو حد يعرفه منكم يحذره مني هجيب فتحي و الرجالة و نيجي نموته

تحشيش جريدة الجمهورية "الجزء التاني" - الحقيقة وراء الجمهورية ^_^

للمرة التانية على التوازي بنشر مقال من جريدة الجمهورية "من غير تعديل" المقال مسخرة و الله خلاص قربت أتعود على قراية الجمهورية كنوع من الإصطباحة
الكلام اللي بالإسود على لون الحتة التحتانية من علم مصر للجمهورية :/
و على الجانب الأيسر بوزن تمانين كيلو كلامي أنا باللون الأحمر -_-





جرت أمس محاولة فاشلة لإرهاب جريدة "الجمهورية" ورئيس تحريرها محمد علي إبراهيم..
و ماله إرهاب الناس دي عالية بجد مسمية الإعتراض المحترم إرهاب أومال لو المتظاهرين ورولهم العين الحمرا و كسروا حاجو كانوا قالو إيه ؟؟؟
 ظاهر عدد محدود لخليط متنافر من قوي المعارضة أمام مبني الجريدة بشارع رمسيس احتجاجاً علي تغطيتها لوفاة الشاب خالد سعيد الذي ابتلع لفافة بانجو وأثبت الطب الشرعي وجود آثار للحشيش ومخدر الترامادول في دمائه..
ركز في البوقين دول كدة
خليط متنافر يعني ده معناه إن كل قوة المعارضة بتكرهكم ؟؟؟ يعني إنتوا حزب أساسي مش بتنشروا بحيادية زي ما بتقولوا ؟؟
قاد المتظاهرين أحمد سعد دومه الناشط والمدون وبمشاركة بثينة كامل الإعلامية الشهيرة وعايدة سيف الدولة ذات الميول الشيوعية وضياء الصاوي المنتمي لحزب العمل المجمد نشاطه والمحسوب علي جبهة مجدي أحمد حسين.. وكان أبرز الإعلاميين من الفضائيات العربية مصطفي كفافي من قناة "الجزيرة" الذي حاول التسجيل مع صحفيين بالجريدة لإظهار التعاطف الشعبي مع خالد سعيد الذي زعم المتظاهرون أن الجمهورية شوهت سمعته لكنهم رفضوا طلبه. 
لأ مش شوهت سمعته دي نهشت قبره و أكلت لحمه ميت و مصمصت عضمه كمان بحب كلماتهم أوي محسسني إنهم فعلاً مستغربين و إن المتظاهرين وحشين و أشرار و كدة 
عكست الهتافات انفلاتاً خلقياً وترويعاً للصحفيين وأصحاب الفكر..

 دد المتظاهرون شتائم للصحافة القومية منها "قولوا للسلطة تلم كلابها.. وثورة مصر بأيدي شبابها" و"ياصحافة أمن الدولة.. الصحف القومية عار للديموقراطية".. وندد المتظاهرون بتقرير الطب الشرعي مرددين "لا شرعي ولا طب.. التحليل كدب * كدب".. ورفعوا لافتات تندد بوزير الداخلية وبالقيادة السياسية. 
ده إنفلات خلاقي ؟؟؟؟؟ ؛*** أهي الكلمة دي إنفلات خلاقي مني دلوقتي 
استمر تواجد المتظاهرين نحو الساعة. وتردد أنهم سيكررون التظاهر في أماكن أخري هذا الأسبوع بالقاهرة والإسكندرية ضد السلطات والنظام وصحيفة "الجمهورية"..

يا جبانات خايفين من الكلام ؟؟؟؟
 تعد هذه المظاهرة تحديداً أول مظاهرة للإرهاب الفكري ضد صحيفة مصرية..
و ده دليل إنكم جبتم أخركم مع الشعب
الطريف أن مدبري التجمع ينادون بالحرية والديموقراطية والرأي الآخر. لكن يبدو أنهم يريدون أن يقتصر ذلك عليهم دون غيرهم. 
الغريب إنهم بيكدلوا الكدبة و يصدقوها يعني إذا كان إنتم خايفين من مجرد هتافات في مظاهرة يبقى إحنا اللي مش عايزين حرية الرأي و إذا كان إنتم بترفضوا حتى النقاش يبقى إحنا اللي أوغاد و ولاد كلب




بالله عليك ياخي حلفتك بربنا إنتا مضحكتش لغاية ما عامت فشتك من المقال ده ؟؟؟
الصحف القومية أم الرأي الحر


بالنسبة للي مقروش الجزء الأول من السلسلة يتفضلوا من هنا ---> المظاهرة و المرسيدس

الثلاثاء، 29 يونيو، 2010

هتفضل كدة

هتفضل كدة
عقلك غريب
في بر تاني
سارح لوحدك
من غير كلام
...
هتفضل كدة
يومك بيومك
و مفيش أمل
و مفيش اماني
مفيش نظام
...
هتفضل كدة
قلبك يا قلبك!
فاضي و شريد
و لو اتسألت
تقول تمام
...
هتفضل كدة
شوقك لدنيا
من غير حدود
يا عم روح
يا شيخ حرام

الاثنين، 28 يونيو، 2010

نص الليل

في نص الليل ولا فيش نوم
أخدت طريقي للشارع
طريق معرفش ودا لفين
بفكر فيا و فنفسي
في قلبي اللي مشورته
في مستقبل ملوش ملمح
يا أمي على هدة الحيلة
منيش قادر
أنا مروح
ساعتها بس نمت قتيل

الأحد، 27 يونيو، 2010

تحشيش الجمهورية "الجزء الأول" المظاهرة و المرسيدس ^_^

أولاً كدة المقال ده إتنشر في جريدة الجمهورية و مش عارف مين اللي كتبه ولا عايز أعرف
 للي بالإسود على لون الحتة التحتانية من علم مصر مش كلامي ده اللي هم نشروه
الكلام للي باللون الأحمر على لون الحتة الفوقانية من علم مصر ده تعليقي على المقال بما إنهم قلبوها حمرا
علشان الأمانة أنا مغيرتش في المقال رغم الإستفزاز بتاعهم




أعطي السكندريون درسا قاسيا للبرادعي وأنصاره من جمعية التغيير بغيابهم عن المسرحية السياسية التي أعدها مع رفاقه بمسجد سيدي جابر حيث كان يروج أن الملايين سوف يكونون في انتظاره ولم يزد عدد من انتظره علي 400 شخص.
إذا كان اللي في الصورة بس ييجي خمسمية يخرب بيوتكم طيب حتى إكدبوا كويس
أقولكم حل كويس هما ماكانوش 400 هما 421 واحد و كان في 2 توأم يتحسبوا بواحد
كما كشف غياب الإخوان عن ساحة المسجد وحضور عدد لا يزيد علي 100 منهم عن الموقف الحقيقي للبرادعي في الشارع ولم يتجاوز عدد الذين تجمعوا لاستقباله 400 نصفهم من حركة 6 أبريل والغد الذين حضروا من القاهرة مع أيمن نور والبرادعي للتغطية علي خفوت الاستقبال. 

ياراجل
لأ الإخوان مجوش اللي جم المحظورة و كانوا خمسة و تسعين بس
وقد تحولت صلاة الجمعة إلي هرج ومرج بفعل أنصار الجمعية الوطنية للتغيير حيث تجمعت فتيات جميلة اسماعيل وبثينة كامل بمدخل المسجد ومنعن المصلين من الدخول ووزعن منشورات الحركة وطالبن بعقد لقاءات تليفزيونية للحديث عن خالد سعيد.
أيوة صحيح هم إتجمعوا و شغلوا أفلام من إياها للمصلين كمان

 يا راجل إتقي ربنا بقى بذمتك دي كدبة تكدبها

اعتلي شباب الحركة سور المسجد مطالبين بسرعة انهاء الصلاة.. وفي داخل المسجد لم يكن الأمر مختلفا حيث فوجيء المصلون بأحد أنصار الحركة يحاول أن يصعد المنبر لولا أن المصلين تصدوا له.
وبعد الصلاة انطلقت الهتافات التحريضية لأنصار جمعية التغيير والغد و6 أبريل ولم يستمعوا لنداء إمام المسجد بتأجيل الهتافات لدقائق احتراما لجنازة كانت بالمسجد ورفض أعضاء الحركة طلبه وانطلقوا في هتافهم حتي خرج من المسجد أبطال مسرحية العرائس السياسية أيمن نور وحسن نافعة وأسامة الغزالي حرب وحمدين صباحي وصابر أبو الفتوح يرفعون أيديهم لأعلي في حركة مسرحية يؤديها الممثلون عند تحية الجمهور 

لأ مش بس كدة لأ و كان في جمهور بيسقف و كان في راجل بيقطع التذاكر بس مكنش في راجل بكشاف علشان الدنيا شمس أساساً

وعلي مسافة قريبة كان في انتظارهم أبو العز الحريري الذي حرص علي الظهور علي خشبة المسرح بالهتاف ضد النظام ولم تستمر الوقفة أكثر من نصف ساعة ولم يتصد الأمن للمتظاهرين وتركهم في حرية كاملة.
ووسط التزاحم من أعضاء الحركة حول أبطال المسرحية خرج الدكتور البرادعي من المسجد بسرعة ليخترق الكردون الأمني دون أن يرد التحية علي أنصاره وتوجه إلي مطعم جانجل بسيارته المرسيدس الفارهة ليتناول غداءه مع أبطال المسرح العبثي.
هو أنا مش بحب البرادعي لكن ليه يعني يجيب سيرة العربية يعني هو سارقها من مال الحكومة مثلاً زي ناس تانية ولا جايبها من جيب والدك؟؟؟ و الراجل عنده برنامج و كويس إنه راح للمتظاهرين مش سابهم كدة يتظاهروا 


تاركين شباب الحركة تحت حرارة الشمس الشديدة يطلقون الهتافات المدربين عليها وهم يرفعون صور قتيل البانجو خالد سعيد.
مدربين هاه أيوة مدربين و بعدين هم عاجبهم الشمس إنتا مالك ؟؟؟


ووسط الزحام ظهرت جميلة اسماعيل التي أعلنت أمام كاميرات التليفزيون ان تقرير اللجنة الثلاثية التي شكلها النائب العام لاعادة تشريح جثة خالد سعيد وانتهي إلي أن الوفاة بسبب ابتلاعه لفافة بانجو لا يخصهم وانهم سيضعونه في سلة المهملات في تحد غريب لسلطة القانون واجراءاته مدعية انهم يشكلون لجنة ثلاثية أخري من أطباء من خارج مصلحة الطب الشرعي لتشريح الجثة.

الراجل مستغرب ليه يا وحشين ترفضوا تقرير اللجنة الثلاثية المعد مسبقاً ليه ترفضوا تقرير باين زي الشمس إنه متفبرك ليه ترفضوا تقرير حتى مكلفوش نفسهم يكدبوا فيه أقولكم توفيراً للوقت اسألوا واحد دكتور إمتياز يقول لكم رأيه في التقرير ده

أعلن أيمن نور لعدد من أنصاره علي كافتيريا بمنطقة استانلي انه يقوم بتجميع مبلغ 120 ألف جنيه لاعطائها لأحد الأطباء الشرعيين الذين خرجوا للمعاش لاعداد تقرير مغاير لتقرير الدكتور السباعي.

هو أنا بصراحة مسمعتش و بصراحة مكنتش هدفع بس حتى من غير رأي حد أنا متأكد إن التقرير مزيف طبعاً و الحكومة معندهاش نية تقبل رأي حد تاني

كان البرادعي قد توجه لمنزل أسرة خالد سعيد بكليوباترا حيث قدم تعازيه وكشفت تلك الخطوة منه والاهتمام الأمريكي بالقضية معلومات جديدة حول أسرة خالد سعيد وهي ان شقيقه أحمد الذي سافر إلي أمريكا منذ سنوات كان قد تنازل عن جنسيته المصرية ليحصل علي الجنسية الأمريكية وأصبح اسمه اليكسندر ستيفان 

أنا عن نفسي لو هاجرت هغير إسمي علشان أبقى طبيعي وسط الثقافة اللي حهاجر ليها
و بعدين هو جريمة إن الواحد يغير إسمه ؟؟؟ 
و بعدين أحمد غير جنسيته مال خالد بالموضوع ؟؟ ولا الحكومة بتاخده بذنب أخوه ؟؟
وعندما حاول خالد سعيد السفر له غير اسمه أيضا إلي خالد استيفان وسجله في ادارة الهجرة الأمريكية. الغريب ان أعضاء الجماعة المحظورة وقفوا خلف تلك القضية الكاذبة الخاصة بوفاة خالد سعيد برغم علمهم بجنسية شقيقه وتنازله عن الجنسية المصرية. 

ما هو أي حد بيسافر برة بيعمل كدة مش مشكلة يعني
و بعدين الإخوان جماعة دينية مالهم هم بالجنسية و الإسم ؟؟؟؟




الجمهورية دول ناس عالية والله 

الجمعة، 25 يونيو، 2010

مين اللي قتل خالد

طبعاً مش محتاج أعرفك مين خالد محمد سعيد ... الأخ من البرتغال يعني ولا إيه ؟؟
مش مصدق إن الموضوع قرب يخلص و يبقى ذكرى مش فاضل منه غير شوية صور و فيديو ولا إتنين و بعد ما كانت مظاهرات حماسية قلبت صامتة و ناس تزور والدة خالد ؟؟؟ بيعملوا دعاية الكلاب على حساب خالد و والدة خالد مثلاً ؟؟؟
فكر معايا كدة الولد موتوه إتنين مخبرين العيب في مين ؟؟
المخبر ... اللي بيسمع كلام ظابط أعلى منه كأنه قرأن من إله مقتدر ؟؟؟
صاحب السيبر ... اللي قال لهم كملوا ضرب برة ؟؟؟
الناس ... اللي متكلموش ولا سألوا في إيه ؟؟؟
الظابط ... اللي لو مشتغلش في الأزرق مشش هيأكل عياله و اللي والده باع اللي وراه و اللي قدامه رشوة علشان يخليه ظابط ؟؟؟
وزير الداخلية ... اللي ناسكنا بالطريقة دي ؟؟؟
الطب الشرعي ... اللي خلى خالد حشاش ؟؟؟
النظام ... مش محتاجة كلام  عن النظام  ؟؟؟
إحنا ... اللي ساكتين ؟؟؟
إنتا ... اللي متعرفش حقوقك ؟؟؟
أيوة مش بس المخبرين اللي قتلوه 

إنتا و أن و كل مصر قتلت خالد و خصوصاً إنتا

الخميس، 24 يونيو، 2010

لا تراجع ولا إستسلام

أكيد زيي شفت إعلان الفيلم الجديد بتاع مكي
للمرة التالتة التعاون مع نفس البني أدمين برضه نفس المخرج و المؤلف بصراحة أنا أينعم بحب مكي بس الفيلم شكله رخم تنين يعني مش كفاية محمد سعد لأدوار الهبل ؟؟؟ بالظبط نفس طريقة أداء محمد سعد في كركر كوبي باست بقى لا تراجع ولا إستسلام ده غير أصلاً الفكرة مهروشة سبعة و أربعين ألف مرة و لازم طبعاً مكي يغني أغنية راب كيوت تحسسك إنه بيغنيها لعيال في إبتدائي شكلنا مش هنعيش لغاية ما نشوف مكي بيمثل قصة مكتوبة بجد مش مأخوذة من فكرة تانية مستهلكة ... أكيد هنزله من النت مش هدخله سينما و ده علشان فيه دنيا سمير غانم بصراحة ^_^


الإعلان للي لسة مشفهوش

تحديث
من باب الأمانة الفيلم أجمل بكتير من التريلر ممكن أعتبر و بكل إنصاف مكي هو نجم ال parody film في مصر
أسف إني حكمت عالفيلم من التريلر
رغم إن التريلر المفروض يبقى عنوان الفيلم و أكبر عامل جذب ليه
و أتمنى يبقى تريلر فيلم مكي الجي أجمد


و على فكرة دخلته سينما مع هاني صاحبي

الأربعاء، 23 يونيو، 2010

وقفة صامتة - مسرحية ذات فصل واحد -

الشخصيات : محسن : ضابط
                كاظم : ضابط ذو رتبة أعلى

مشهد داخلي 
غرفة أنيقة يتوسطها مكتب أنيق عليه لافتة ثمينة مكتوب عليها كاظم بحروف مذهبة يجلس خلفه رجل رياضي في أوائل الخمسينيات يرتدي زي بذلة كاملة تبدو عليه الصرامة  يقلب أوراق ملف متوسط الحجم
( صوت طرقات على الباب )
- إتفضل يا محسن
يدخل محسن من الباب في بذلة رسمية شاب وسيم رياضي ذو ملامح باردة
يؤدي محسن التحية العسكرية ثم يتقدم ليقف أمام المكتب 
-أتفضل يا حضرة الظابط
يجلس محسن
-ها إيه الجديد ؟؟
=الراجل بتاعنا في الجروب إياه بيقول إنهم هينظموا وقفة صامتة على الكورنيش يا فندم 
-عظيم 
=نروح نتصرف يا فندم
-لا لا يا محسن سيبهم 
=بس يا فندم ده الصحافة من كل مكان هتصور الوقفة
- عظيم 
يبدو عدم الفهم على محسن
يضحك كاظم 
-إنتا لسة جديد يابني
=تلاميذك يا فندم
-العيال دول هيكسروا حاجة ؟؟ لأ ولا هيعملوا حاجة يبقى سيبهم بس حط شوية عساكر ينظموا الموضوع بس لو عملوا حاجة هنلمهم و نقول عليهم قلة مستترة
= و لو معملوش يا فندم
- يبقى كويس هيبقى الإعلام صور حرية الرأي عندنا أدي الحرية ولا بلاش (يبتسم) و هما هيبقى خليهم يعتبروا إن ده حاجة مؤثرة و يبقى كبيرهم يقفوا ساكتين
= و الموقف بتاع العالم
(بغضب) 
- متخفش العالم بيصدق التقارير الرسمية أكتر من الوقفات الصامتة دي
= والبرادعي رايح معاهم يا فندم
يرجع كاظم ظهره ليغوص في مقعده الوثير
- يتفضل
= و هيجمهع توقيعات
- يجمع 
ينظر محسن بعدم فهم 
-قول لي يا محسن جمع كام توقيع 
(لا يقول شيئاً)
 -شفت بقى الناس بتخاق يا ابني
=بس يا فندم
- في أسوء الظروف لو جمع و كمان يا سيدي اترشح و بعدين ؟؟ و هما اللي إترشحوا عملوا إيه ؟؟
يقترب منه كاظم قليلاً 
- متخفش يا محسن إحنا عارفين بنعمل إيه
ستار

الثلاثاء، 22 يونيو، 2010

تامر و القرن و القدس وأشياء أخرى

استفذني جداً خبر تكريم تامر في مهرجان القدس العربي
مرة واحدة كدة بقى تامر صاحب مواقف في القضية الفلسطينية علشان راح غنى في القدس يااا سلام
يختي كميلة
و اللي زاد عن الحد إنه بيقول إنه رفض لقب أمريكي من مسابقة إسمها بيج أبل ميوزيك كانوا هيسمه "أسطورة القرن"
يا لهوي 
مش هي هي المسابقة اللي قال إن عمرو دفع فلوس علشان يروح فيها وم كان شوية و يكشف شعر صدره و يروح يدعي عليه في أم هاشم دلوقتي بقى رفضها ؟؟؟
ده غير ده كمان إيه حكاية إسطورة القرن دي ؟؟؟
اسطورة القرن ؟؟؟ ده القرن أساساً بدأ من مفيش عشر سنين لحق يبقى ليه اسطورة العندليب قعد يغني كااااااااااااام سنة و في الأخر بقى نجم الجيل شوفوا تامر ابن يومين و بقى إسطورة القرن حتة واحدة
قعدت أنا أتطقس ورا الموضوع وسألت العيال عن المسابقة دي حتى لو إشاعة واحدة أبداً مفيش و بعدين عمركم سمعتم عن مسابقة امريكية بتدي اللقب ده أساساً ؟؟؟
ده غير إنه قال إنه مشتركش فيها علشان فيها مغني إسرائيلي 
يا سلام يا أختي يا حلوة بجد الناس دي أموت و أعرف مصدقاه إزاي 
بصوا يا جماعة انا عندي حوالي ألف واحد أصحابي ما بين الفيسبوك على تويتر على تاجد على الحاجات دي تعرفوا شفت كام واحد بيحب تامر ؟؟؟ 5 أه والله 5 بيحبوه الحب الشديد بتاع تيموز تيموز وأعرف أكتر من خمسمية بيكرهوه
أنا عمري في حياتي القصيرة ما شفت حد ليه جمهور من الكارهين جمهور بجد مش هزار يعني كان في جروب عالفيس من 130 ألف إسمه كارهي تامر حسني تصدقوا دي 130 ألف لغاية ما الإخوة الأفاضل التيمورية سرقوه

في النهاية أنا هكتفي برد من أخت أردنية كان كاتب كومنت في الموقع اللي نشر الخبر تحت إسم بنت الأردن بعنوان كذب الكذبة و صدقها بيقول
ما بعرف يعني كيف مهرجان بكرم متل هاد يعني قبل كم اسبوع كان يحكي انو اخدها و عمرو دياب دفع فلوس لحتى سحبها منو ولا عرف انو رح ينكشف قلبها وطنية على شو اسطورة و تكريم

في الأخر بحب أقول له عاش تامر عاش يللا روح حارب اسرائيل بالدرع اللي أخدته مش بتاع قضية أوي كدة ؟؟؟ روح دافع عنها يا تيموز

تامر حسني رفض لقب أسطورة القرن بسبب الإسرائيليين



تامر حسني رفض لقب أسطورة القرن بسبب الإسرائيليين

أول حفل زواج مصري على الفيسبوك بالكامل

الفيسبوك زي ما إحنا شايفين مش واقف لحظة عن ابهارنا من يومين تلاتة كنت قاعد عالفيس وصلتني دعوة فرح الغريب في الفرح ده إنه بالكامل عالفيس 
أدي نص الدعوة
دعوه لحضور حفل زواج فيس بوكى يوم الجمعه 25 يونيو الساعه 12 ونص مساء على الفيس بوك


الجمعه 25 يونيو الساعه 12 ونصف مساء حانستقبل عريس الفيس بوك احمد نصار الناشط السياسى وعضو الجمعيه الوطنيه للتغيير ومدير مركز نصار للقانون وحقوق الانسان


احمد حايحتفل معانا بجوازه هو وعروسته اونلاين ومباشره على هذا الجروب ولمده نص ساعه حتى الواحده صباحا

لأول مره نعمل حفله الجواز وتقتصر على الفيس بوك فقط وده بسبب تدهور الاوضاع الاجتماعيه والسياسيه والاقتصاديه داخل مصر ... حانحتفل هنا على الفيس بوك وسط العالم الحر والشباب الذى لا يقهر

احمد رفض يعمل حفله بفندق فى وقت 99% من المصريين مايقدروش يدخلوا الفندق يتعشوا او حتى يشربوا فنجان شاى فى كافيتريا الفندق بسبب ضئالة دخلهم

احمد رفض يعمل حفل زواج ومصر كلها تعيش حالة عزاء مفتوح بسبب تعذيب ومقتل خالد سعيد على يد ضباط ومخبرين قسم سيدى جابر

احمد رفض يعمل حفل زواج بسبب استشهاد اخيه نقيب طيار عمرو عراقى نصار وانه لن يكون موجودا بجواره

حانعمل حفل زواج على الفيس بوك وحايكون فيه نقوط واللى ينقط بأقل من خمسين جنيه حانقطعععععه

كل الفيس بوكيين معزومين ومستنيينكم كلكم فى اولى حفلاتكم على 

الفيس بوك

طبعاً لفتة جميلة من أحمد و سالي إنهم يعملوا أجمل يوم في حياتهم إن شاء الله حداد على خالد و على أخوه الشهدا 
طبعاً من أحمد و من كاتب المقال كلكم معزومين أشوفكم بقى هناك إن شاء الله


الاثنين، 21 يونيو، 2010

كوبي باست

من و أنا صغير كنت بحب مجلة بلبل بتاعة أخبار اليوم أوي كنت بجيبها تقريبا من ساعة ما بدأت
كان في علاء الدين بتاعة الاهرام بس كانت شوية اكبر من سني
و في ماجد بس اختلاف ثقافة الكاتب كان مهول
 في يوم لاحظت في قصة من القصص إن في حاجة غلط .....
ركزت شوية لقيت إن الشخصية ملعوب في فتحة الفستان بتاعها شايلين الخط بتاع الصدر خالص كنوع يعني من الأدب مش لازم الطفل المصري - حفظه الله و رعاه - يشوف واحدة بصدرها
 كان عندي حوالي 13 سنة في الفترة دي و كنت لسة عيل مش فاهم حاجة بس كنت بكره اللي يضحك على عقلي مسكت المجلة فصصتها لقيت إن في شخصيات لابسين لبس مش تمام - مايوهات اجاركم الله -
فالراجل المراجع مبوظ الرسمة بهدوم كروكي مخلية الصورة تقرف
ساعتها مكنتش اعرف فرنسي علشان كدة مكنتش فاهم إن القصص كلها متاخدة كوبي باست من مجلة فرنسية توقيعها جنب القصة نفسها و كنت وقتها مستغرب إن المراجع بيلغبط شغل المصمم بدل ما يقول له بينهم و بين بعض بلاش يا فتحي ترسم حاجات مشينة كدة - حلوة مشينة دي - 
لما دخلت ثانوي وقع في إيدي عدد من نفس المجلة و اذهلني بجد كم التعديلات اللي بتدخل على القصص
يعني مثلا أي كحوليات بتتحول لشراب أو ساعات عصير و أي علاقة غير شرعية بتبقى شرعية غصب عن عين التخين و ده كوم و تغيير القصة كوم
يعني كان في قصة واحد كان عايز يهزر مع المدام و يحضنها على فجأة فهيقع في حفرة في الجنينة و هو في الطريق و دي حرية شخصية و مراته مفيش مشاكل لأ ليه و ليه يحضنها المراجع العبقري خلاه عايز يحذرها إن في مسمار في السور علشان متقطعش الفستان شوفوا العنكشة القصصية ده غير انها مكنتش لابسة فستان فلبسها فستان كروكي و حتى مكلفش نفسه يرسم مسمار في السور
....
و نفس الموضوع مع ترجمة الافلام اتخيل إن واحد كان فاكر تبا لك كلمة أبيحة بجد و بيسألني إزاي ربنا يقول كلمة أبيحة في القرأن ? ? و هكذا دواليك الترجمة بجد بتبهدل الابداع انا نفسي بجد يكون في راجل دماغه صرمة قديمة تبع الجهة اللي بنترجم منها و ميقبلش بأقل من ترجمة حرفية للنص الاصلي

نرجع لموضوع قصص الاطفال لو رأيك إن طفلك المصري المصون - حفظه الله و رعاه - مش ناضج كفاية إنه يشوف فتحة صدر في فستان رغم إنه بيشوف في التليفزيون ألعن مليار و 300 مليون مرة - تعداد الصين - يبقى خلاص سيب ثقافة الغرب للغرب و بطل تنقلها يا وغد منك له و ركز في شغلك وارسمله إنتا قصص منقبات بيشربوا عصير و فتحي واقع في الحفرة اللي في الجنينة

الأحد، 20 يونيو، 2010

دعاء بماذا تفكرين دعاء بماذا تحلمين

و أنا قاعد بتويت جت في دماغي مرة واحدة قصيدة المساء بتاعة إيليا عمرك حسيت كدة إنك بتتوحم على قصيدة و نفسك تقراها أهو هو ده الشعور بالظبط قلت أدور عليها كتبت الجزء اللي حافظه منها و عملت سيرش
و جوجل حبيبي جابلي ييجي سبعة و عشرين مليون نتيجة كتر خيره
و فتحت أول النتايج 
و يال هول ما رأت عيني 
دا دا دم
قصيدتي الجديدة المساء بهديها لحبيبتي الغالية دعاء
يا لهوي حد سارق المساء بتاعة إيليا
مغير إسم سلمى لدعاء و مغير فيها شوية حاجات علشان يخزي العين و يضيف حسنات الأخت دعاء
عارف والله في كلام أبيح كتير كان على لساني بس أنا هديت أعصابي و قلت أكيد حد رد على الكاتب الوغد و قال له إنتا وغد و لص
أكتر من خمسين كومنت بيشكروا في القصيدة و كاتبها 
و طبعاً مفيش حد خاااااااالص من الخمسين عارف إن دي بتاعة إيليا
حصل معايا برضه مرة قبل كدة كان واحد صاحبي على الفيس حاطط قصيدة لنزار بس مش كاتب إنها لنزار هو كاتب القصيدة و بس كدة و عامل للناس تاج
و شوف بقى يا سيدي الناس اللي تقول له رااائع إنتا فنان يا حودة
يا محمود إنتا مبدع كلماتك ساحرة
و اللي يغيظك تلاقي حد كاتب إستمر جيد أو حد كاتب بالنسبة لمبتدئ معقولة
دي بتاعة نزار يا إخوانا 
قلت للواد قال لي كله عند العرب صابون سيبهم يهطلوا على عماهم

بجد الموقفين إستفزوني أكتر من بعض 
بالنسبة لمبتدئ معقولة قال
ده لو فتحي كان إداه قلمين والله

السبت، 19 يونيو، 2010

مبارك نقطة مصر

سمعت من الناس اللي بيسمعوا عن موقع مبارك.مصر و أكيد شفت الموقع الفكسان اللي ممكن أي أهطل في اعدادي يعمل زيه في ساعتين و نص و قريت المقالات اللي إتكتبت و كدة

كانت مصراوي كتبت إن ده أول موقع بلغة تانية غير العربية 
و إن مبارك الامل و مبارك المديحة و الحاجات الفكيسة دي
شوف يا سيدي اللينك ده
أو مثلاً شوف كدة ده 
أو شوف كدة ده
 شفت بقى وصلت ل"غشاخخ" قال مبارك يطرح أول نطاق غير لاتيني قال
لو ركزت شوية هتلاقي إن المسألة كلها عبارة عن البونيكودينج "الترميز" اللاتيني اللي بيرادف كلمة مصر
لما بتدور على كلمة مصر على محركات البحث إنتا مش بتدور على مصر مصر لأ بتدور على اللي بيقابلها باللاتيني اللي هو 
xn--wgbh1c
و زي ما في
.com , .net , .me .pl .eg .uk
إيه اللي يمنع يبقى في
.xn--wgbh1c

إشترينا الرمز ده يا سيدي و بقى ينفع نبيع نطاقات فيه و على فكرة السعودية أخدت الخطوة دي قبلنا و خلتها ببلاش أيوة ببلاش مش زي مبارك اللي خلاها للشركات
إدخل من فايرفوكس لو عندك فايرفوكس إكتب مبارك.مصر هتلاقيها بتتحول لxn--mgbb2a2eg.xn--wgbh1c
شوف هو ده الموقع اللي عليه الضجة دي كلها
xn--mgbb2a2eg.xn--wgbh1c
و عموماً من ناحية جدية شراء الكود ده بالشئ الفلاني مين غير العرب بيكتب عربي ؟؟؟
يعني مواثع هنعملها هتبقى للعرب بس و ده لو دخلوها مش عارف موقع وزارة كذا و موقع مبارك.مصر ده كمان اللي قفلها

أنا لو معايا فلوس كنت إشتريت كود المغفل xn--mgb2bvakcd
و عملت موقع أسميه فتحي.المغفل http://www.xn--pgbg2dub.xn--mgb2bvakcd/

  أحط فيه صورة فتحي بس 
وأخلي الدخول للشركات ^_^

الجمعة، 18 يونيو، 2010

امتحان الثانوي ب ب ببب باااااااطل باااااطل

كل يوم شكاوي من صعوبة امتحانات الثانوي و الناس ما صدقت و الصحافة عايزة جنازة و تشبع فيها لطم و العيال تعيط و اهلهم يدعوا و يكشفوا شعرهم و صور بقى و منشتات و تدوينات و افتكاسات و و ليه ده كله علشان الإمتحانات صعبة 
نشوف الشكوى من إيه يقولوا الإمتحان أغلبه فوق مستوى الطالب المتوسط يعني المشكلة عندهم مش في نوع الاسئلة ولا من المنهج -و ده المهم-لأ كل المشكلة إن الإمتحان صعب ... يعني الإمتحان صعب على إبنك بس يا حضرة الأفندي يجاوبك في حزن لا يلبس أن يتحول لغضب و يدعي و يتحسبن على المسئولين الله ينتقم منهم و يقولك صعبوها على ولادنا كلهم 
يا سلام
يعني الإمتحان الصعب اللي على الكل ده مش هو هو بل و أحسن بكتير علشان يزود الإنحراف المعياري بتاع النتايج .. معرفش أنا الناس بتفكر إزاي
أنا كنت في ثانوي والله -على ما أذكر يعني- و جالنا إمتحان فيزيا عايز واحد عبقري عبقري يعني الإمتحان جه صعب جداً -على قياس الناس- و أخد مننا الوقت كله و كلنا مخلصنهوش ... العيال طلعت تعيط و الأبهات تدعي و الأمهات تكشف شعرها و ناس أغمى عليها و طلبة إنتحرت .... و بعدين ؟؟؟ ولا حاجة لو حسبتها هي هي النتايج نزلت شوية يعني اللي كان هيدخل طب ب100% دخل ب96% لكن مفيش أي فرق و كذلك كل الكليات طيب ليه الدوشة و الهبل ده ؟؟؟
يعني الناس عايزة الإمتحان سهل بغباوة و كل الطلبة تجيب 100% مثلاً ؟؟ يقولولك لأ بس يعني ميجيش صعب أوي كدة ... و إيه الفرق يا جماعة الموضوع نسبة المقاعد لعدد الطلاب مش أكتر و طول ما هو مفيش كوسة -الحمد لله تقريباً التنسيق الحاجة الوحيدة في مصر اللي مفيهاش كوسة- يبقى خلاص متدوشوش دماغنا ...دي إيه الناس دي ؟؟؟

دايب أنا

دايب أنا
دقيت بيبانكم يابو سنة لولي
ردوا و قالولي : أوامرك إيه ؟
قلت : الحلال
ردوا و قالولي : لساه صغار
قلت الرموش و العين صابوني ولا 100 عيار
قالوا اصطبر
قلت الشوق فات القليب متقاد بنار
قالوا استحي
قلت الحلال مفيهوش حيا
قالوا نضيف على قايمة الخطاب خطيب
و انا اعمل إيه يا أبو سنة لولي
دايب أنا

الأربعاء، 16 يونيو، 2010

مقتنع ؟؟؟

بتصحى الصبح تفطر و تشرب كوباية الشاي لوكنت من الناس اللي بتفطر
بعدها تنزل تركب عربيتك لو عندك عربية أو تحشر نفسك بقدرة الله في المترو معرفش أنا إزاي
و تروح شغلك أو كليتك
لو مترو تحمد ربنا لو عربيتك و خصوصاً وسط البلد هتاخدنص ساعة كمان علشان تركن و بعدها تدفع الأتاوة للسايس
و يا ويلك لو مدفعتش 
تروح كليتك تدرس أسوأ مناهج في العالم و أغبى طرق تدريس في الكون غالباً أو تروح شغلك تمارس عمل روتيني أحمق - أيوة أحمق- حتى لو عايز تمشي عدل مش هتقدر لأن الطريق نفسه مش سالك
بعد ساعات طويييييلة من الشغل الغير مجدي تقريباً -ده لو مزوغتش مع اللي بيزوغوا- تروح تجيب عربيتك من المكان اللي ركنتها فيه أو تحشر نفسك تاني في المترو 
تنزل تجيب لوازم البيت و اللي هتروح تلاقي البياع ضحك عليك في نصها و طبعاً مش هترجعهاله لإنك طيب و غلبان
تطلع شقتك تحاول تنام ساعتين قبل شغلانة بعد العصر أو قبل كورساتك لو كنت لسة في كلية
تنزل تاني تركب عربيتك أو تحشر نفسك في أتوبيس يوديك الكورس 
نفس الدكتور اللي في الكلية بس هنا سبحان الله بيشرح و بيبقى صاحبك كمان 
بعد ما تتهد كورسات أو بعد هدة الحيل في شغلك التاني تروح لعربيتك تلاقيها إتكلبشت
 تدفع عشرة جنيه بتخرفش للعسكري هيفكها
إنتا و ماشي في الشارع مش بتقرب من الظباط رغم إنك عارف إن إنتا محترم و كويس
لحرامي ينشلك تخاف حتى تروح تبلغ عنه
وتفضل تروح بيتكم
تروح بيتكم تسمع التليفزيون أخبار تحرق الدم بجد و جرايد حكومية صفرا و جرايد معارضة سودة تسمع شوية للشريط المنسوخ من شريط منير اللي إشتراه صاحبك و بعدها قبل ما تنام تروح تبص في المراية و تقول دي مصر حبيبتي بكل ناسها بالراجل اللي بياخد اتاوة بالراجل اللي غشك بالكلبش بالزحمة بالظابط بالحرامي و هتفضل أمي و هفضل أحبها السؤال : إنتا مقتنع ؟؟؟

الاثنين، 7 يونيو، 2010

مرة واحد مصري

"لازم نبص للنص المليان لو النيل راح هيبقى عندنا اكبر مقلب زبالة في العالم "
"ابتديت اخاف على ساويرس من ساعة ما طلعت اشاعة إنه هينضم للوفد"
"أي خطأ كان الأكبر لما انفصلنا عن السودان ولا لما انفصلنا عن سوريا ?"
"وجهة نظر الشعب في اللي بيقول بحب مصر إنه منافق تصدقوا الوطنية انقرضت للدرجة دي"
"أكتر القصايد اللي قريتها ركاكة اللي اتكتبت في حب مصر اموت و اعرف اللي بيحبوا مصر بجد فين ?"
"لا أثق في وطنية البرادعي ولا إخلاص حمدين ولا بطيق نور أساسا يبقى بجد مفيش أمل ولا حتى عمر "
"إذا كان دكتور طب بشري بيدي كورسات يبقى مدرس ثانوي يعمل إيه ?"
" حياتي في شبرا اقنعتني أن "الدوشة" هي الاصل أما الهدوء فهو ما يستدعي النظر من الشباك "

الأربعاء، 2 يونيو، 2010

الموت وحيدا- قصة قصيرة

نظرت للجسد المسجي على السرير في تخاذل التفتت لترى ابنها الأكبر يكتب شيئا ما يخص عمله على ما يبدو حين دخلت ابنتها الصغرى من الباب و قد تهيأت للا شئ تزى ابنتها الوسطى تصنع شئ ما في المطبخ نظرت لصورة زوجها الراحل ثم نظرت مرة أخرى للجسد المسجي على السرير نفس الوضع الذي قبضت عليه منذ 3 ساعات لقد ماتت وسط ما تبقى ممن تحب و لكنها الأن فقط أيقنت أنها ماتت وحيدة