السبت، 17 يوليو 2010

عن الظابط اللي إتشرح

مقال شفته من شوية عن "6سائقين يمزقون ضابط شرطة حاول منعهم من اغتصاب فتاة" 


المشكلة بقى إن المقال إنتشر قوي و ناس دعت لتكريم الظابط و ناس قالت ده لازم يترقى لوا و ناس بتقول أدي الرجالة ولا بلاش


طيب أنا عندي سؤال بسيط جداً : هي مش دي مهنته برضه اللي بيقبض علشانها مرتب و بياكل منها عيش ؟؟؟


يا سيدي أنا معاك إن السواقين لازم يتعدموا في ميدان عام و إن الراجل عمل الصح بس ... هو الصح بقى غريب لدرجة إنه يتكرم ؟؟


و بعدين تعالى معايا إزاي واحد معاه طبنجته الميري - ولا كان ماشي من غير سلاح سعادته - و إتكتع تكتيعاً شديداً من 6 مسلحين بمطاوي ؟؟؟ و بعدين يعني هو مش قال نزل كل الركاب و إدالهم الأجرة ؟؟؟ أمال البنت دي قعدت ليه ؟؟ الخبر مفتكس تزوير أخر إفتكاس يعني من الأخر ميخشليش من عقل


إنت مصدق ؟؟؟ ده بقى يرجعلك إنتا و إفرض مصدق أنا معاك إسمع البوقين دول


كل إسبوعين يطلع فيديو لظابط بغتصب فتاة أو يبهدل اللي جابوها ضرب و يوم ما واحد يعمل شغله - اللي هو المفروض يعمله عادي يعني - تلاقي سبعتلاف واحد نقل الخبر و بقى بطل و مازنجر و ادهم صبري و الحاجات دي 


هتقولي مش في نوبتاجيته و مش وقت خدمته ... يبقى ليه الخبر بيتفشخر فشخرة شديدة إن الأخ ظابط ؟؟؟ يعني لمؤاخذة كدة أعذرني على غباوتي لما الموضوع يبقى في نفس فترة أربعين خالد سعيد يبقى المقصود إيه 


و الكومنتات اللي باينة أمن دولة جداً يراها الأعمى و البصير كأنهم بيقولوا نياهاهاها إحنا أمن دولة بس مستخبيين


مش عارف يمكن أنا دماغي بتشطح ساعات بس الخبر مش مبلوع بالنسبالي 






تحديث 
بعد ما كتبت الموضوع لقيت حد متناوله أحسن مني بألف مرة هو صاحبي برضه الحمد لله يعني الموضوع في بيته

هناك 10 تعليقات:

Hossam Hassan يقول...

بص يا سيدى هو فى الخبر قال انهكان معاه السلاح وضرب 9 طلقات فى الهواء

اى نعم انا معاك انه واجبه

بس فى حاجتين
زى مانت قولت ده كان برا نبطشيته

والحاجه التنيه ده ظابط امن مركزى مش ده شغله

ده اللى بيضربنا فى المظاهرات يعنى :D

Unknown يقول...

أه ما أنا بتتريق يا حسام قصدي طول ما كان معاه سلاح إزاي قدروا عليه و لا هو كوكو الضعيف اوي كدة
و برضه دي النقطة التانية عمُنا النقيب ده عايزين يطلعوه بطل علشان نحب الأمن المركزي و نتعاطف معاهم في الفترة دي بالذات

Eman Awad يقول...

اللهم لا شماته

الله يرحمه ويرحم خالد سعيد

Unknown يقول...

مامتش و دي مش شماتة أبداً يا ريمي الموضوع إن إحنا بنقول إن دي نصباية من أجل جلب التعاطف أو على الأقل فرقعة إعلامية علشان برضه جلب التعاطف

غير معرف يقول...

بص يا ولدي ..
برده الموضوع مش داخل دماغي بربع جنيه ! .. بس يعني حتى لو حتى حقيقي .. الموضوع لا صلة له برتبته أو الجهاز اللي منتميله .. لو أنا اللي كنت في الموقف ده .. كنت هاعمل كده برده .. الموضوع مش مستاهل .. الراجل بطل ومحترم وإنسان .. بس مش عشان ظابط شرطة .. لأ عشان هوّا ابن بلد وعمل الصح ..
اللي بيحصل ده .. استغلال للموضوع لصالح حد مش هوّا البطل الحقيقي .. البطل الحقيقي البني آدم اللي في الراجل ده مش جهاز العادلي ..

Unknown يقول...

الله يفتح عليــــــك و ألف خط تحت " و ده لو الموضوع حقيقي "

أنا و هؤلاء يقول...

بص يا ايمن مفيش ثوابت ومينفعش نعمم ان الجهاز كله زبالة لسه في ناس كويسة ولازم نسلط الضوء عليها يمكن الباقي يتكسف علي دمه ويحترم نفسه وسواء مفبرك ام لا فدي وقناعة كل شخص

Unknown يقول...

يا مهاب زي ما ليو قال الموضوع "لو حقيقي" يبقى البطل الإنسان المواطن مش الظابط يعني الفرقعة الإعلامية دي كلها حرنكش

Unknown يقول...

الخبر فعلا شكله غريب
لو هو حقيقي يبقى الله يرحمه بس مش عارفة ليه مش بالعاه

Muhammad Al-Ansary (@iOrto) يقول...

لا شك أن المبالغة في وصف الواقعة بالشكل اللي شفناه (حاجة كده زي الحاجات اللي بنشوفها في ملحمة الحرافيش) يخلينا نشك والفار يلعب في عباعيبنا (جمع عبنا) من ناحية القصة دي

بس أولا وأخيراً واقعة زي دي (لو كانت صحيحة) فكل الفضل فيها ينسب إلى الشخص اللي قام بيها، يعني الداخلية مش من حقها تتفشخر بحاجة زي دي