الأحد، 28 نوفمبر 2010

موضوع ملهوش أي علاقة بالإنتخابات

في البداية كل سنة و إنتم طيبين
النهاردة كان في انتخابات مجلس الشعب في أغلب محافظات مصر زي ما حضراتكم عارفين ( ده بإعتبار اللجان اللي إتلغت و اللجان اللي محدش عرف يدخلها و اللجان اللي وقفت أغلب الوقت ) .

أنا كنت مقاطع زي ناس - للأسف - مش كتير علشان كدة - نوعاً ما - لقيت مش من حقي أتكلم عن الإنتخابات .

بس برضه قلت لأتكلم و خلاص ,
مش لازم عن الإنتخابات ...

طبعاً زي كل خلق الله صحيت الصبح على صوت مندوب المرشح الوطني اللي عامل موكب للمرشح
و الناس ماشية وراه كتير جداً
اللذيذ في الموضوع إن الناس ماشية وراه علشان بيوزع لحمة
موضوع ملهوش أي علاقة بالإنتخابات 


كمان ساعتين لقيت العيال الصغيرة مالية الشوارع بمنشورات المرشحين كل واحد بيشرح للناخبين يعلموا عالورقة إزاي
العيال الصغيرة كانت بتلعب لعبة لذيذة خالص
كانوا بيبدلوا الورق مع بعض البيضا بنقطة و الخضرا بخمسة و الحمرا بعشرة
لعبة لذيذة و فرحت العيال دول أوي
موضوع ملهوش أي علاقة بالإنتخابات 


خالتي كلمت والدتي في التليفونو قالتلها تنزل تقف معاها في اللجنة بتاعة مدام هويدا
مدام هويدا الست الناس بيحبوها و رايحين كل واحدة تردلها واجب أو زيارة
محدش فارق عنده إذا كانت هتعمل اي خدمات و لا حد فارق عنده إن مدام هويدا وطني
الموضوع مش فارق عندهم عن طهور عيل أو فرح
موضوع ملهوش أي علاقة بالإنتخابات 

كنت قاعد بالصدفة امبارح مع واحد صاحب والدي و رد على تليفون و فتح السبيكر
الراجل اللي بيكلمه أكد عليه و قال له صدقني مش لازم تروح تنتخب ولا إنتا ولا أي حد مالعيلة أنا عندي كشف بكل الأسامي و أنا هظبطلكم الدنيا
الموضوع كله موضوع عائلات
موضوع ملهوش أي علاقة بالإنتخابات 


زي العادة مرشحين الحزب عملوا زفة قبل النتايج ما تظهر
بذمتكم ده موضوع له أي علاقة بالإنتخابات ؟

كنت في أول الشهر عامل موضوع صغير عن بداية الإنتخابات
كان في صور زي دي 
و ناس كتير طلبت مني أرفعها بالحجم الكامل
و بم أن الراجل ده قطعياً خسر فأنا رفعتلكم الصور أهي إتفضلوا


تعليق بسيط الصورة دي كنت رسمتها من شه ر و كنت فاكر إنها مبالغة جداً

إتأكدت إني دماغ بعد ما شفت اللينك ده 

كل سنة و إنتم طيبين  و كل تزوير و حضراتكم بخير

الجمعة، 5 نوفمبر 2010

هل هلالك شهر مبارك

كل سنة و إنتوا طيبين
هل هلالك شهر مبارك
طبعاً مش قصدي على شهر رمضان ... شهر رمضان مش دلوقتي خالص لو معندكش فكرة
و إوعى يكون عقلك راح لبعيد مش الفلانتين برضه
و لا بمناسبة كوباية الشاي بتاعة مبارك برضه

فكرتوني بكوباية الشاي
:)


على أي حال أنا قصدي شهر إنتخابات المجلس اللي هل علينا أهو
أول بشايره بدأت بالدعاية بتاعة المرشحين
ما بين جداول ضرب للعيال الصغيرين في المدارس ما بين ملصقات كل هدفها تشوه الحيطان

ما بين أمتار قماش تكفي نعمل كسوة لمصر كلها
ما بين قصايد شعر
أه و ربنا قصايد شعر
و يا ريتها قصايد بجد
الراجل الطيب ده بيوزع علينا كل يوم جمعة بعد الصلا قصيدة جديدة
و ربنا الراجل خلاني أخد موقف وحش جداً من المستقلين عموماً
قلت أرفعهم منها دعاية ليه و منها تشوفوا شوية من اللي الناس بتشوفه


المهم نوعاً ما
شهر الإنتخابات
اللي الطلاب بيفرحوا فيه بتقطيع دعاية المرشحين
اللي الكبار بيقبضوا فيه من جيوب المرشحين
اللي بتلاقي فيه صوابع الناس متلونة
اللي إختلف فيه الناس ما بين مقاطع زيي ما بين مغلوب على أمره ما بين مشارك و بقوة ما بين مزور هيفوز في الأخر
أهو جه
هل هلاله و بانت بشايره
كل سنة و إنتو طيبين و بصحة و سلامة
كل تزوير و حضارتكم طيبين