الأحد، 28 نوفمبر 2010

موضوع ملهوش أي علاقة بالإنتخابات

في البداية كل سنة و إنتم طيبين
النهاردة كان في انتخابات مجلس الشعب في أغلب محافظات مصر زي ما حضراتكم عارفين ( ده بإعتبار اللجان اللي إتلغت و اللجان اللي محدش عرف يدخلها و اللجان اللي وقفت أغلب الوقت ) .

أنا كنت مقاطع زي ناس - للأسف - مش كتير علشان كدة - نوعاً ما - لقيت مش من حقي أتكلم عن الإنتخابات .

بس برضه قلت لأتكلم و خلاص ,
مش لازم عن الإنتخابات ...

طبعاً زي كل خلق الله صحيت الصبح على صوت مندوب المرشح الوطني اللي عامل موكب للمرشح
و الناس ماشية وراه كتير جداً
اللذيذ في الموضوع إن الناس ماشية وراه علشان بيوزع لحمة
موضوع ملهوش أي علاقة بالإنتخابات 


كمان ساعتين لقيت العيال الصغيرة مالية الشوارع بمنشورات المرشحين كل واحد بيشرح للناخبين يعلموا عالورقة إزاي
العيال الصغيرة كانت بتلعب لعبة لذيذة خالص
كانوا بيبدلوا الورق مع بعض البيضا بنقطة و الخضرا بخمسة و الحمرا بعشرة
لعبة لذيذة و فرحت العيال دول أوي
موضوع ملهوش أي علاقة بالإنتخابات 


خالتي كلمت والدتي في التليفونو قالتلها تنزل تقف معاها في اللجنة بتاعة مدام هويدا
مدام هويدا الست الناس بيحبوها و رايحين كل واحدة تردلها واجب أو زيارة
محدش فارق عنده إذا كانت هتعمل اي خدمات و لا حد فارق عنده إن مدام هويدا وطني
الموضوع مش فارق عندهم عن طهور عيل أو فرح
موضوع ملهوش أي علاقة بالإنتخابات 

كنت قاعد بالصدفة امبارح مع واحد صاحب والدي و رد على تليفون و فتح السبيكر
الراجل اللي بيكلمه أكد عليه و قال له صدقني مش لازم تروح تنتخب ولا إنتا ولا أي حد مالعيلة أنا عندي كشف بكل الأسامي و أنا هظبطلكم الدنيا
الموضوع كله موضوع عائلات
موضوع ملهوش أي علاقة بالإنتخابات 


زي العادة مرشحين الحزب عملوا زفة قبل النتايج ما تظهر
بذمتكم ده موضوع له أي علاقة بالإنتخابات ؟

كنت في أول الشهر عامل موضوع صغير عن بداية الإنتخابات
كان في صور زي دي 
و ناس كتير طلبت مني أرفعها بالحجم الكامل
و بم أن الراجل ده قطعياً خسر فأنا رفعتلكم الصور أهي إتفضلوا


تعليق بسيط الصورة دي كنت رسمتها من شه ر و كنت فاكر إنها مبالغة جداً

إتأكدت إني دماغ بعد ما شفت اللينك ده 

كل سنة و إنتم طيبين  و كل تزوير و حضراتكم بخير

الجمعة، 5 نوفمبر 2010

هل هلالك شهر مبارك

كل سنة و إنتوا طيبين
هل هلالك شهر مبارك
طبعاً مش قصدي على شهر رمضان ... شهر رمضان مش دلوقتي خالص لو معندكش فكرة
و إوعى يكون عقلك راح لبعيد مش الفلانتين برضه
و لا بمناسبة كوباية الشاي بتاعة مبارك برضه

فكرتوني بكوباية الشاي
:)


على أي حال أنا قصدي شهر إنتخابات المجلس اللي هل علينا أهو
أول بشايره بدأت بالدعاية بتاعة المرشحين
ما بين جداول ضرب للعيال الصغيرين في المدارس ما بين ملصقات كل هدفها تشوه الحيطان

ما بين أمتار قماش تكفي نعمل كسوة لمصر كلها
ما بين قصايد شعر
أه و ربنا قصايد شعر
و يا ريتها قصايد بجد
الراجل الطيب ده بيوزع علينا كل يوم جمعة بعد الصلا قصيدة جديدة
و ربنا الراجل خلاني أخد موقف وحش جداً من المستقلين عموماً
قلت أرفعهم منها دعاية ليه و منها تشوفوا شوية من اللي الناس بتشوفه


المهم نوعاً ما
شهر الإنتخابات
اللي الطلاب بيفرحوا فيه بتقطيع دعاية المرشحين
اللي الكبار بيقبضوا فيه من جيوب المرشحين
اللي بتلاقي فيه صوابع الناس متلونة
اللي إختلف فيه الناس ما بين مقاطع زيي ما بين مغلوب على أمره ما بين مشارك و بقوة ما بين مزور هيفوز في الأخر
أهو جه
هل هلاله و بانت بشايره
كل سنة و إنتو طيبين و بصحة و سلامة
كل تزوير و حضارتكم طيبين

الأحد، 10 أكتوبر 2010

الساعة في إيدك كام و النبي ؟

ملحوظة * ممكن تدوس على أي صورة علشان تكبرها *
 إيه يعني لما الساعة بتتغير كل إسبوعين
مش كتير يعني!
إتخيل لو أكتر من كدة
مثلاً كانت الحكومة الذكية - جداً - إضطرت توجد حلول للمشكلة دي 
مثلا تعمل ساعة ذكية - جداً - 
و كان هيبقى في نقاشات هادفة كتير حول إن الساعة كام أساساً
و كان هيبقى في أفكار عبقرية كتير جداً
و هيبقى تحديد المواعيد معتمد على حاجات تانية خاااااالص غير الساعة
و ممكن نرجع للماضي أوي
و عموماً يعني إحنا شعب مش بنظبط مواعيدنا أوي
و الحكاية هتبقى جت بفايدة الناس عموماً منفضة للوقت
و ممكن تيجي حملات لمقاطعة الساعة أساساً
وقتها هتنقرض الساعات
و هتبقى مجرد إكسسوار مش أكتر
و هتختفي من اللغة مفاهيم مهمة جداً
بجد بجد بجد

الأربعاء، 6 أكتوبر 2010

في ذكرى 6 إكتوبر


في ذكرى مرور سنين كتيييير على نصر إكتوبر المجيد شوية خواطر كدة جت على بالي
يعني مثلاً في ذكرى أكتوبر بنغني رايحين في إيدنا سلاح

دلوقتي حتى سلاح التلميذ منعوه

في ذكرى أكتوبر بنغني إتقدم (معرفش ليه بصراحة)

دلوقتي البلد بتتقدم بينا :)

في ذكرى أكتوبر فاكر أيام ما كان محمد و مينا بيحاربوا مع بعض

دلوقتي بقوا بيحاربوا فبعض

في ذكرى أكتوبر فاكر لما عبرنا

دلوقتي فاكر كل مرة إتعبر علينا

في ذكرى أكتوبر وقتها كان يوم كيبور

happy yom kippur !

دلوقتي كل يوم مصر كلها واكلة خابور

في ذكرى أكتوبر بتحسر أوي بفتكر أيام ما كان في أبطال بجد
 و عظيمة يا مصر و مصر اليوم في عيد


الجمعة، 24 سبتمبر 2010

بالضبط كان يشبه الصورة - هدرا جرجس

  عن نفسي أنا مش من النوع اللي بيحب يجرب كتير و في العادة بحب أقرا لكتاب محددين و أتابع كل إنتاجهم و بسبب كدة صعب جداً لما بأقرا لإسم جديد و أصعب طبعاً لما إسم جديد يعلق معايا  ... و كان إسم هدرا جرجس 
   كنت قريت كتاب خالتي صفية و الدير مؤخراً متأخراً جداً عن باقي خلق الله و كنت مع واحد صاحبي بنتكلم عن الكتاب نصحني أجرب المجموعة القصصية بالضبط كان يشبه الصورة ...  و كان

وأمام غبطة البطريرك الباسط يده بالبركة، ليمنح درجة الأسقفية، لم يجد الأنبا أستفانوس سبيلاً لمنع نفسه من تذكر تلك الأمسية البعيدة حين ضربه أبوه بسن مؤخرة عصاه، وعندما ركع تحت قدمي البطريرك لم يستطع منع أصابعه، فتحركت لتتحسس مكان الجرح الذي ظل موشومًا به طوال حياته.

 تعرف شعورك لما تلاقي كنز ؟؟ أهو ده بالظبط كان شعوري
تعرف لما تبقى خايف تقلب الصفحة علشان الكتاب ميخلصش ؟؟

ولأنه لم ير من النساء غير صورة مريم العذراء المعلقة في صحن الكنيسة، أشار ناحية امرأة جميلة تبيع الجبن وسأل... من هذه...؟ فخاف أخوه لأن الصغير بدأ يعرف، وربما يتمرد، فانتهره قائلاً:
- لا تنظر لها... إنها الشيطان نفسه.
صمت الصغير وتابع السير، وبعد رجوعه للدير سأله أخوه الراهب...
- ها أخبرني ما الذي أعجبك في العالم...؟
قال الصغير:
- الشيطان.

ممكن تجرب - بعد بالضبط كان يشبه الصورة - مواقيت التعري لنفس الكاتب بس صدقني لازم تبدأ بالمجموعة دي و صدقني هتعجبك جداً 
 المجموعة القصصية متوفرة في ديوان و الشروق و عمر بوك ستور و أغلب المكتبات في وسط البلد 


الاثنين، 20 سبتمبر 2010

تغطية أخبار طابونة العيش الأثرية

*الخبر مش صحيح حفاظاً على مرارتي من الناس اللي كل ما أكتب حاجة زي دي يفتكروها بجد*
كشف إنهيار أرضي بمنطقة وسط البلد عن كشف يعد الأول من نوعه على مر التاريخ حيث ظهر للعيان جزء من طابونة عيش يعتقد أنها ترجع لبداية الحقبة التاريخية الحالية و قد تمكن مراسلنا من الإجتماع بالسيد المسئول الذي أكد أن الطابونة مسجلة بالفعل بالسجل التجاري في أوائل الثمانينيات و أرجع سبب إختفائها لإنهيار أرضي مماثل و قد وضح أن العمل على نقل الطابونة للمتحف المصري جارٍ على قدم و ساق ... الغريب في الأمر هو وجود طابور عيش أثري فيما يمثل كشف بيولوجي و إجتماعي نادر للغاية و قد وضح الدكتور الديدموني محسن دكتور المصريات و الأذن و الحنجرة لمراسلنا أن الكشف البشري يمثل أهمية تفوق أهمية الكشف المعماري حيث يعتبر التطبيق البشري الوحيد لنظرية لامارك حيث أثرت الوقفة الطويلة على الإخوة في الطابور مما سبب نمو بعض الأطراف ذات الإحتكاك المباشر مثل راحة اليد و لوح الكنف بالإضافة لنمو قدم ثالثة لدى بعضهم في حين أدى عدم الإستعمال لضمور بعض الأجزاء _عيب أقولها_ و لكن الأكثر ظهوراً كان تمدد المثانة و تدليها خارج الجسم فيما يعرف بمثانة طابور العيش لفت إنتباه مراسلنا أنا أحداً من الواقفين لم يبد إهتماماً بأعمال الحفر و إن رفضوا رفضاً تاماً أي محاولة لإخراجهم لأن ذلك سيخرجهم من الطابور قطعياً و قد حاول مراسلنا مخاطبة أحدهم و لكنه رفض قطعياً ظناً منه أن مراسلنا يحاول أخذ ماكانه في الطابور حاول مراسلنا الوصول لمنزل عائلة أحد الإخوة في الطابور و عند السؤال عن سبب عدم الإبلاغ عن فقده شهقت زوجته قائلة "إختفاء إيه كفانا الله الشر يا خويا ده في الطابور و راجع" .

الخميس، 16 سبتمبر 2010

قراءة في عقل مدون


ـ
1. من أرسل لك الدعوة؟
الصديق الكريم صاحب مدونة بني عبس أونلاين

2. ما هي كتب الطفولة التي بقيت عالقة في ذاكرتك؟
قصص الأنبياء للأسف مش متذكر طار النشر أو الكاتب لكن فاكر إنها كانت أول مجموعة أقراها و أنا طفل
3. مَنْ أهم الكتاب الذين قرأتَ لهم ؟
من الناطقين بالعربية: أحمد خالد توفيق , يوسف إدريس , عمر طاهر , محمود السعدني , أحمد رجب , بلال فضل 
 , و ناس كتييير جداًًًً بترتيب عدد الكتب اللي قريتها لكل كاتب
ومن الناطقين بغير العربية: أدجار ألان بو , فيكتور هوجو , شارلز ديكنز ,( لوف كرافت و شكسبير بس بحق ربنا مش بفهم لهم تقريباً حاجة ) برضه بترتيب عدد الكتب

4. من هم الكتاب الذين قررت ألا تقرأ لهم مجدداً؟

معتقدش إني قريت لحد لدرجة إني أكرهه أو أتوقف عن القراية ليه

5.في صحراء قاحلة، أي الكتب تحمل معك؟
بتفكرني بالسؤال بتاع الكلب اللي جنبه طبقين أكل على نفس المسافة  و جعان الإجابة فلسفياً إنه مش هياكل خالص و هيموت من الجوع
نوعاً ما هتبقى الإجابة كدة برضه


6. ما هو الكاتب الذي لم تقرأ له أبدا ، وتتمنى قراءة كتبه ؟كتير جداً صدقني بس يمكن الأهم إن في كتاب كتير عايز أقرا أكتر لهم يمكن اللي شاغل بالي دلوقتي السعدني الله يرحمه جداً


7. ما هي قائمة كتبك المفضلة ؟
بحب جداً أقرا عن الميثيولوجيا و مدمن قصة قصيرة لدرجة فظيعة


8. ما هي الكتب التي تقرؤها الآن ؟
10 كتاب مطبوع محطوطين عالسفرة و أكتر من 150 كتاب pdf ده غير اللي ناوي أشتريهم قريب 

* للأسف هوقف السلسة و مبعتش لحد علشان كل اللي عايز أبعتلهم إنتا بعتتلهم يا دكتور :(

الأربعاء، 15 سبتمبر 2010

عن بنت إسمها طل أتحدث

ياتوأم كل واحد من البشر , يامن تعمر هذا
الكون ,انت مثلي , أين ماكنت ,تحب مااحب وتكره ماأكره
أحب أن تعيش في سلام ,وأمن وأمان ,أحب أن أراك مشرقا
دائما بابتسامة تملأ الكون حبا ,وتملأ النفوس بهجة,يااخي
الانسان اين ثقافة الحب التي أمرتنا بها شرائع الله ؟!
أين ثقافة التكامل والتضامن بين الاخوة في الانسانية ؟!
لماذا هنا وهناك من لايجد الطعام؟؟
لماذا هنا وهناك ينتشر المرض ولايوجد الدواء ؟!
ياأخي الانسان لماذا ينتشر القتل والدمار هنا وهناك ؟؟
لماذا يموت البريء ويبقى المسيء؟!!
لماذا يموت البعض من التخمة والاخر من الجوع؟؟!!
ياحكماء العالم: أنا متأكدة أن قلوبكم لاتخلو من الرحمة والحب.
انتم وحدكم تستطيعون أن تعيدوا التوازن الى هذا الكون الخائف المرتجف .
أعطونا الطمأنينة والأمان لتخلدوا في قلوبنا.

( لا أقول لك وداعا ياأخي الانسان لأني معك دائما )

ده مش كلامي ... ده كلام بنت إسمها طل
تعرف يعني إيه حرية ؟؟؟
بنت عمرها أقل من 19 سنة - أصغر مني بشهر -
جميلة و ذكية و طيبة جداً على كلام أصحابها
كانت بتكتب ليك ... أه ليك
هو مش الأخ إنسان برضه ؟؟؟
أهو طل كانت بتكتب ليك إنتا بالذات عن نظام فاسد عميل بيبيع إخواته للعدو 
النظام طبعاً لازم ميعجبهوش إعتقل طل من تسع شهور دلوقتي و محدش عارف حتى مكانها 
على فكرة أنا مش بتكلم عن نظامنا أنا بتكلم عن النظام السوري الشقيق
شفت بقى أنا قصدي إيه ؟؟؟
ماهو اللي بيحصل لطل في يوم ممكن يحصل لي و يحصلك  


تعرف يعني إيه حرية ؟؟؟
يعني إن بنت إسمها أيات 
برضه طالبة جامعية
عندها كتب 
دي كانت تهمتها
معتقلة برضه من 8 شهور 

تعرف يعني إيه حرية ؟؟؟
كويس إنك عارف

مصادر


الثلاثاء، 7 سبتمبر 2010

معا للتغيير

موقع http://www.taghyeer.net/
بصراحة كتير أصحابي قالولي و شفته كتير عالفيس لكن كان الإندهاش إني أشوفه في المترو قعدت أكلم نفسي هتوقع يا واد يا أيمن ? طيب و هو في فايدة ? طيب و هما المليون اللي وقعوا عملوا إيه ? قعدت أكلم نفسي لغاية ما لقيتني في البيت قدام مراية الحمام لقيت نفسي بيقولي إيه يا عمنا مالك ? قلتله مش عارف أعمل إيه في موضوع التغيير ده بص لي كدة و قال أما ناس سخيفة دي إنتا يا عم مش بتغير عادي في البيت هنا لأ و بتغير التليفزيون و ساعات بتغير إتجاه المترو إنتا هتكفر بقى قلتله على رأيك و في ستات بتغير لعيالها و الناس بتغير عالبحر فجأة لقيته بيصرخ فيا و يقولي لأ لأ كله إلا البحر قلتله ليه يا عمنا ? قال لي إنتا وطني ? قلتله أيوة طبعا و أكتر من أي حد فيكي يا بلد قال لي إإلش بقى و كدة أنا قصدي حزب يا هندي قلتله لأ طبعا قال لي يبقى خلاص شيل حكاية البحر دي من دماغك خالص قلتله ليه يعني هو الحزب بس يغيروا عالبحر ? قال لي هو عموما الحزب يغيروا في حتة عالبحر بقى في الشارع ملكش فيها أما إنتا بقى فأخرك بيتكم يا بابا قلتله إهدى يا عم نرجع لموضوعنا إيه رأيك نمضي على موضوع التغيير ده قال لي والله شكلهم هيغيرولك يا بعيد و إنتا مش عارف تغييرهم وحش إزاي قلتله لا يا عم ما هو أنا مش هوقع لوحدي ده في مليون واحد وقعوا و بعدين ماهو التغيير ناموس الحياة فيها إيها لما الريس ي... لقيته مرة واحدة قاطعني و قال لي لأ لأ تفها من بقك و هو العشرة تهون غير على إبن الحرام ? قلتله يا عم ماهو الواحد من هو صغير يصحى الصبح يروح المدرسة يشوفه كبر شوية في الشغل هيشوفه يركب المترو لازم يشوفه يجيب الجرايد يشوفه قال لي بقى يا جاحد بزمتك العشرة دي تهون ? ده إنتا مش بتشوف أبوك كدة قلتله و بعدين يعني ماهي الحياة مطينة بطين قال لي الحياة مش تبع التليفزيون المصري قلتله شوف بقى مين اللي بيإلش قال لي يا عم مرة من نفسي و إيه بقى اللي مش عاجبك في الحياة قلتله يا راجل بقى بذمتك إنتا بتدرس 45 سنة علشان تطلع دكتور و في الأخر تاخد 200 جنيه و لا التضخم الفظيع و لا الطوارئ اللي محكومين بيها من 30 سنة قال لي ما هو هو ده الجحود بعينه بقى بذمتك إنتا مش بتتعلم ببلاش و بتتعالج ببلاش يبقى إيه يعني لما يبقى مرتبك في نفس الحدود دي كنت لسة هفتح بقي قال أيوة أيوة ما إنتا مواطن جاحد بتدرس خصوصي و تتعالج خصوصي ذنب الحكومة إيه إن إنتا جحش مش فاهم و ذنبها إيه إنك بغل مش عارف تتعالج عندهم ? و إيه حكاية التضخم دي ما هو الحكومة بتسعى سعيا حثيثا _ حلوة حثيثا دي _ لتسديد الديون و تخفيض الأسعار و الحاجات دي و بعدين أبو علاء الراجل مش سوبر ماريو ولا إنتا بقى هتفتري قلتله طيب و الطوارئ قال لي هو إنتا إسمك طارق ? قلتله لأ قال لي ناوي تسمي ابنك طارق ? قلتله لأ قال لي يبقى بتسأل ليه قلتله ياخي أم الألش و الواحد صايم قال لي خلاص يا عم متتحمقش كدة أوي الطوارئ دي لحمايتنا يابا من الناس الوحشين ده أنا لو من أبو علاء كنت اعدمت الناس كلها في ميدان عام قصاد الناس وصلت للنقطة دي و افتكرت إني مستعذتش بالله من الخبث و الخبائث استعذت بالله وقمت أوقع و على فكرة إنتا كمان هتوقع ماهو إنتا مقرتش ده كله و متوقعش
http://www.taghyeer.net/

الأحد، 29 أغسطس 2010

عيل عبيط

عيل عبيط
كان فاكر عنده بصحيح
حاجة تانية غير حلمه
عيل صغير 
ريشته فضة و دمعته
حافرة الطريق على خده من كتر البكا
و من يحس
بدمعته
طول ما الدموع ملهاش حس
عيل صغير
روحه حلوة و قلبه كنز
حسه راح من الغنا
و لا حد سامع غنوته
مسكين
ولد
من غير سند 
ملهوش مكان
...
عيل عبيط
بيضرب على البيبان
بعزم قوته
و قال صابر على عيشته
ما بين تباريح
ما بين تفاريح
ما بين الغم بيواصل
و لا واصل 
و لا مقرب
و متغرب
ما بين دنيا  بترفض حتى أحلامه
ما بين قلبه 
ما بين نفسه
ملهوش مكان
...
عيل عبيط
برغم الدمعة متبسم
و بيغني
الليلة يا سمرا
و يتمنى
تكون ليلته
و لا بتكون
و متأكد
و لا هتكون
و شوف عباطته بيواصل
ما بين الدمعة على خده
ما بين عنده
ما بين حلمه
و لا واصل و لا هيوصل
ملهوش مكان

الجمعة، 27 أغسطس 2010

المقال اللي إتنشر في الأهرام الإسبوعي



20  سبب لتتأكد من إن الأتوبيس الذي تركبه مصري 100%

1 لا تنتظر في المحطة الاساسيه ( خليك أول الكوبري و أخر الكوبري و بعد الإشارة و عند البنزينة و عند نعمة )
2 الاوتوبيس فاضي ورا ( مع ان ورا ده زي علبه السلمون حاول أن تقنع التباع بالعكس )
3 تجميع الأجرة بشكل ودي ( لموا مع بعض يا جماعة عشان الزحمة ) ( التباع مش عارف يرجع ورا اصلا )
4 السواق يدخن بشراهه ( مع ان هناك لافته عريضه تقول ممنوع التدخين )  (احضار السجائر مهمة التباع )
5 الباب مفتوح بشكل دائم ( نصف الركاب راكبين "شعبطة" )
6 التباع ينادي على المحطات برغم أنها مكتوبة على الأتوبيس (عدم إقتناع من الركاب)
7 الراكب يسأل التباع "رايح رمسيس ده ؟ " برغم إن المحطات مكتوبة على الأتوبيس و برغم إن التباع ينادي على المحطات  (انعدام ثقة)
8 النشالين
9 الأدعية و الأيات القرأنية و الأحاديث المعلقة حتى على الزجاج الأمامي ( لا أعلم حتى الأن الطريقة السحرية التي يرى بها السائق الطريق )
10 البنت المنتقبة المتسولة ( إنتقلت مؤخراً للمترو )
11 الأغاني الشعبي طوال اليوم عدا فترة الصباح ( الشيطان و العبد و أنا مش عارفني )
12 في فترة الصباح قرأن كريم أو ابتهالات  ("علشان البركة)
13 الرجل الذي يصرخ في الموبايل (بتقول إيه يا عباس هاه هاه يا عباس أأأأأأه صباح النور يا عباس)
14 لو جلست نظر الواقفون لك بغل شديد و لو وقفت نظر لك الجالسون بتعالي - أه والله-        ( "الشعلقة" من الباب حل لا بأس به أحياناً )
15 لا يقف في الأشارة ( أعتقدإن السواق عارف مواعيد الإشارات )
16 لازم تتعلم النط ( الوقوف هنا ممنوع يا بشمهندس نط واحنا ماشيين )
17 أحد البابين لا ينفتح ( رأي السواق: ما اللي قدام مفتوح حلو أوي )
18 أنت الوحيد الذي يتهم بالتهرب من الأجرة ( أعتقد أن شكلك "يدي على بلطجي" )
19 السيدة التي تطلب منك حمل ابنها كي تعطي التباع الأجرة ( غالباً يبقى معك حتى محطة نزول والدته وغالبا بيعملها عليك قبل ما والدته تاخده )
20 الباعة الجائلين و الدراويش ( بنص جنيه روق دمك بنص جنيه مكانش حد غلب و مدد حي مدد مدد )




الأربعاء، 25 أغسطس 2010

حاجة تفقع

في البداية أنا بعتذر لكل اللي هيقرا المقالة دي عن مرارته اللي هتنفقع
و بتمنى يكون عندك أي حاجة تساعدك توطي ضغطك
و يا ريت يعني يكون جنبك دكتور باطنة كويس إنتا عارف المرارة غدارة

كلامي بالأحمر لون مصر اللذيذ و كلام المسئول بالإسود المنيل بنيلة

المقال الأصلي 

 اعتبر المستشار عدلي حسين، محافظ القليوبية، تكرار انقطاع المياه وأزمات الكهرباء وارتفاع الأسعار، تضاعف من ثواب الصائم، واصفا أزمات المياه بأنها "إنذار إلهي للمصريين يستوجب ترشيد الاستهلاك في ظل خلافات دول حوض النيل، والتي تسعى للانتقاص من حصة مصر التي تكفي بالكاد".


مدد بركاتك يا سيدنا ده إنذار من ربنا طبعاً و لا تقصير و لا ري ملاعب جولف و لا الحاجات دي كلها 


وقال حسين، خلال محاضرة ألقاها أمس الاثنين، أثناء مشاركته في فعاليات ملتقي الفكر الإسلامي بالحسين الذي تنظمه وزارة الأوقاف، وحضره الدكتور محمود حمدي زقزوق وزير الأوقاف: "سوء الاستهلاك يعد أيضا هو السبب الرئيسي في أزمة انقطاع الكهرباء، التي تتطلب بدورها حملة ترشيد"، وطالب المواطنين بضرورة أن "يعذروا الحكومة ويعطوها فرصة حتى العام المقبل لمواجهة هذه المشكلات الطارئة"، مؤكدا أن "تواكب مشكلات الحر والمياه والكهرباء وارتفاع الأسعار مع الصيام في شهر رمضان، يضاعف من ثواب وعفو الله على المواطنين".

قال يعني البعيد بيصوم أساساً

وأضاف: "أنا أشعر كمسلم مؤمن أن الحرائق في روسيا والسيول في باكستان وأفغانستان والتي شردت الملايين، رسالة إلهية تحذيرية للإنسان الذي زرع القمح ليستخلص منه الوقود الحيوي والبنزين للسيارات، بدلا من الغذاء في تصرف غير أخلاقي، وهي كذلك إشارة إلهيه تدعونا للتوسع في زراعة القمح بأي صورة لنزيد من إنتاجنا ونرفع اكتفاءنا الذاتي، ويصبح اعتمادنا على الاستيراد في أضيق نطاق".

و بدلاً من زراعة القمح بيستوردوه و بدل ما يستهلكوا الغاز بيصدروه لإسرائيل

من جانبه قال وزير الأوقاف إن المشكلات التي نواجهها "تواجه كافة الدول النامية وسببها الرئيسي الزيادة غير المحسوبة في السكان، مقابل ثبات موارد الدولة من الضرائب وقناة السويس والسياحة والجمارك والثروات المعدنية لتلتهم كل هذه الموارد".



زيادة السكان اللي الحكومة مش عارفة تعمر مترين في بعض في الصحرا من ساعة التنين  و السياحة المضروبة اللي حتى الإمارات اللي مفيهاش غير بحر بقت أحسن مننا و حتى قطر اللي مفيهاش غير البتراء بقت من عجايب الدنيا




المشكلة بجد إنك بعد ما تقرا مقال زي ده عايزك تحب الدنيا و تبتسم و تروح تملى جركن الميا سعيداً منشكحاً لأ و كمان تنام بدري علشان النور اللي بيقطع و تبل الأرض و الحيطان و تفتح الشبابيك منشكحاً برضه علشان مفيش كهربا في بلد السد يشغل بيه تكييفك 


الغريب فعلاً إن لسة في ناس بتصدق 
أنا كمواطن صعيدي عارف و متأكد من إن إنقطاع الكهربا و الميا شئ مش غريب أبداً يعني مثلاً لو الميا إستمرت ييجي إسبوع بأتصل بالأعطال أقولهم عاملين إيه مسمعناش حسكم من إسبوع الميا مش بتقطع لعل المانع خير يا رب


و لو مش كل شهر إتحرق جهاز من أجهزة البيت الصيني كلها بسبب حكومتنا المستوردة الرشيدة بروح أطلع شوية فلوس صدقة و أحمد ربنا و أشكر فضله


معنى إنه يقول إن ال"أزمة" طارئة و هتتحل خلال سنة فده كأنه بيقول لنا أنا بضحك عليكوا يا أولاد ال"أزمة"


و من الأخر ليه بيتسند على حيطة الدين لما تخلص حججه ؟؟؟
يعني ده اليوم السنوي اىللي الحكومة بتطلع سبحتها من الدرج بدل ما تكمكم ولا إيه ؟؟؟

السبت، 14 أغسطس 2010

عن شعب " بيلعب في الميا " أتحدث

في تمام الساعة الخامسة من مساء أمس كنت كالعادة أقوم بالتفييس سعيداً منشرحاً إلى أن إنقطعت الكهرباء , بالطبع هو حدث تقليدي إلى أبعد مدى و لكن حين يكون قبل المغرب بأقل من ساعتين لا شك في أن ذلك عمل إجرامي خطير يكاد يماثل الإنتحار بالنسبة للمسئول عنه . لك أن تتخيل عدد الصائمين - أصحاب الدعوة التي لا ترد - الذين سوف يذكرونه هو - و اللي جابوه - بخير عند الأفطار , لم يطل الوقت كثيراً حتى بدأت في الغرق في محيط من العرق الصعيدي اللزج - جداً- فقمت "كالشاطر" الى الحمام لأفتح صنبور الماء فلا تعبرني قطرة واحدة توحد ربنا , أرجعت الأمر في البداية إلى زيادة الضغط على المياه فبالتأكيد الشعب كله عن بكرة أبيه تحت "الدش" في ظل إنقطاع الكهرباء و لكن سرعان ما أدركت أن المياه مقطوعة بالفعل - في هذا الوقت و مع إنقطاع الكهرباء - خرجت من الحمام و أمسكت سماعة التليفون و أدرت الرقم الذي أحفظه من كثرة الإستخدام "أعطال المياه" لأجد الرجل السمح بارك الله فيه يجيبني بأن المسألة مسألة تصليحاتو صيانة ,و لأني أعلم و عن تجربة أن السبب الوحيد لديهم لكل المشاكل في الدنيا هو أنها مسألة تصليحات شكرته شكراً لذيذاً و أغلقت السماعة حتى دون أن أسأل عن الكهرباء لم أكن أعلم بطبيعة الحال كمواطن غلبان أي إصلاحات هذه التي تبدأ في الماء و الكهرباء معاً في الخامسة مساءاً و لكنني بطبيعة الحال خمنت ان السبب هو زيارة مسئول "ما" أو أن الكهرباء في جرجا منفدة على المياه . على أخر رمق من بطارية موبايلي لجأت إلى العالم الإفتراضي الجميل المبهج لأجد أن الكهرباء إنقطعت لفترات متقطعة في عدد من مدن الصعيد و الماء مقطوع بالفعل في نجع حمادي يعني المسألة ليست مسألة تصليحات لم يكد أذان المغرب ينطلق حتى عادت الكهرباء أعتقد أن المسئول خاف من الدعوات التي سوف تنهال على رأسه إن لم يعدها جريت مسرعاً إلى الحمام لأجد أن الماء لا يزال مقطوعاً قلت لنفسي " يا واد يا أيمن إتقي الله يعني هم تاعبين نفسهم و بيصلحوا المواسير اللي من أيام الخديوي هش على حد قولهم و إنتا معترض إصبر يا واد يا أيمن " إنتظرت حتى غفوت قرب العاشرة لأستيقظ قرب الثانية صباحاً لأجد و يالقدرة الله الماء لا يزال مقطوعاً إنتظرت حتى السحور و ضربت طبق الفول المعتبر مع زجاجة الماء المعدني ال2 ليتر و بعد سماع أذان الفجر و صلاة الفجر عدت لأجد الماء و يالحكمة الله لا يزال مقطوعاً و حتى وقت كتابة هذا المقال في السادسة و النصف صباحاً لا يزال مقطوعاً قلت لنفسي " يا واد يا أيمن إنتا بتتلكك و الله يعني الناس دخلوا على الشيفت التالت بيعملوا تصليحات على حد كلامهم و إنتا وغد بتعترض" على أي حال في ختام المشهد الجميل السابق لا أعلم حقاً الفائدة الفعلية من ترشيد الكهرباء و الماء معاً في وقت واحد فعلى حد علمي لم تقم أي حكومة أعرفها بترشيدهما معاً طوال تلك الفترة و إن كنت أعتقد أن هناك شيئاً ما خطأ في تلك الحملة "الذكية" التي تسببت في خسائر مقدارها 200 مليون جنيه بسبب إنقطاع الكهرباء المتكرر عن مصانع شبرا الخيمة حسبما ورد عن لسان رئيس المدينة هذا غير الأجهزة الكهربائية "بتاعة الشعب " التي إحترقت نتيجة تكرر انقطاع التيار عليها ثم عودته بدون علم منا بساعات إنقطاعه أو عودته أعتقد أن العائد من تلك الحملة أقل بكثير من الخسائر فلا أعتقد أن الحملة "الذكية" قد أقنعت أحداً بضرورة ترشيد الإستهلاك ...
لأكون منصفاً قد تكون حملة ترشيد الكهرباء الإجبارية مجدية إن لم تكن "ذكية" لهذه الدرجة أما بالنسبة للمياه فالحكومة تذكرني بيوسف اليهودي صاحب بئر روما الذي إشترى سيدنا عثمان نصفه فالمسلمون يخزنون الماء لليوم التالي و إن لم تنقطع المياه أهدروا كل الكمية المخزنة كي يملئوا مخزونهم بماء جديد لا أعلم إن كانت الحكومة تعتقد حقاً أننا شعب أحمق أو سفيه " بيلعب في الميا " لذلك رشدوا إستهلاك الماء "غصب عن عين التخين" من الشعب بطريقتهم "الذكية" إن كنا شعب سفيه فعلاً فالأجدر بالحكومة ان توعي الشعب و ترشده بطريقة جدية و بطريقة تقيهم شر دعوة الصائم في نفس الوقت التي ستذكرهم بخير - هم و اللي جابوهم - الغريب فعلاً هو خبر توقف الحكومة عن حملة الترشيد الإجباري رغم كل هذا الإنقطاع حتى و إن كان الإنقطاع بسبب الإصلاحات فعلاً ألم يكن من الأجدر القيام به أثناء فترة الترشيد منذ أيام أعتقد أن الحكومة بم أنها ذكية فإنها تقوم بإشتغالنا "

الجمعة، 13 أغسطس 2010

سمراء

 1
"يومها كانت تجلس مع صديقاتها تتغنى بلحن ما , لطالما أعجبت بالفتيات ذوات الصوت الحسن . عصبية كما يبدو من إنعقاد حاجبيها طيبة كما يبدو من إبتسامتها الدائمة . لم يكن من السهل التقرب إليها و لكني فعلت المستحيل حقاً . رقيقة سمراء جميلة عصبية كالقطط علمت فيما بعد أن عصبيتها ترجع لكونها إسكندرانية و أن لها أصولاً نوبية ورثت منها الطيبة و اللون الأسمر لم يطل الوقت كثيراً حتى ضاقت المسافة بين قلبينا كل شئ فينا على إستعداد للصراخ أحبك , صارحتها بحبي ... و صارحتني ".

2
 
"يومها تشاجرنا إتهمتني بأنني مجرد مغامر أحببت فقط تجربة الشعور بالإرتباط بفتاة سمراء , أقسمت أنني لست كذلك ... صارحتني أنها تمقت نظرات الناس إلينا و تكره رأيتهم يتهامسون عند نظرهم إلينا و تكاد تموت قهراً حين يسخرون من حبنا , أقسمت أني لا أهتم إلا بها فصرخت في ألا ألعب دور القديس ضممتها ... فبكت".

3

"يومها لم أستطع النوم جلست أفكر في ما قالته لي لكم كانت نفسي قاسية معي عندما وجهت إلي نفس الإتهامات , لكم أحسست بالضعف حين لم أستطع تبرئة نفسي لقد جال بخاطري أن حبي لها بالفعل يتخلله بعض المغامرة لا أدري إن كنت حقاً مجرد مغامر يري التجربة فقط! لم أكن حقاً أصدق أنني لا أهتم بنظرات الناس كنت أحياناً أغضب و أحياناً أشعر بخيبة الأمل و لكني أقسم أني لم أتهم حبنا بشئ قط ... إنما الناس".

4

"يومها ذكرتني بمرور عام على موعدنا الأول لم أدري كيف مر العام سريعاً هكذا و ذكرتني بذلك اليوم أيضاً حين تشاجرنا فحكيت لها عن اليوم الذي لم أنم فيه قط فحكت لي عن عدة أيام لم تسطتع فيها النوم أيضاً .. أخبرتني عن نظرات الناس و قالت شيئاً ما عن كرامتها قلت لها أنني لم أعشق سواها قالت نفس الشئ غير أنها لم تعد تحتمل ما بين كبريائها و عذاب نفسي افترقنا لكني أشهد الله لم أحب سواها".
 

الثلاثاء، 10 أغسطس 2010

شكلك رمضان أوي

بما إن بكرة أول يوم في شهر رمضان المعظم قعدت أفكر في رمضان من ييجي إسبوع ...
رغم إن السنة دي عندي إمتحانات في رمضان كله - و العيد كمان و الله - بس تحس كدة إن حتى الإمتحانات في رمضان غير .
تحس كدة إن الشعب كله من أدان الفجر قرفان و تعبان و متضايق و جعان و خرمان و منيل بنيلة و بيشتم و يتكلم في السياسة و الدين و كل ما يمكن إنه يحرق الدم عالصبح ^_^ ... بعد الفطار تحس إن الناس دي كلها إختفت و حل محلها شعب طيب أمور غلبان ملوش هم في الدنيا غير 3 حاجات " الأكل , المسلسلات , النميمة " و أهمهم المسلسلات إتخيل إن الشعب الغضبان بسم الله ما شاء الله بقى ملوش كلام غير عن شيخ العرب همام و فوازير ميريام فارس و بياكل لما يشبع و مقضي الليل كله يضرب كنافة و قطايف لغاية السحور و ولا ليه في السياسة و لا الدين و لا أي نيلة و كل اللي بيعمله إنه ينم و يجيب في سيرة الناس طول الليل على القهوة أو في قعدات الستات أو حتى تويتر :) و كمان اللي يغيظ أوي إنه منتظم في صلاة التراويح و الفجر في المسجد و إبقى قابلني لو شفت نص العدد ده - ولا حتى ربعه و الله - في صلاة العصر .
و الفيس طبعاً بيكون رمضاني عالأخر يعني التاجات تكتر أوييييييي لكل الصور الرمضانية يعني فوانيس بمختلف أشكالها و أنواعها و أحجامها أنا عن نفسي كل الناس عملولي تاج في راس أبوتريكة تخيلوا بقى اللي ذيقف على أبوترؤيكة يطلعله إسمي :) المهم إن التاجات بتبقى عشرين واحد مثلاً و تلاقي الراجل الطيب اللي عمل التاج عامل لك تاج ييجي في خمس صور و كل العشرين واحد بيقولوا على الأقل كومنت واحد و هو بيرد في كومنت واحد بحسبة بسيطة بقوا 200 كومنت شوف لما تدخل الصبح عغالفيس تلاقي بالصلاة عالنبي 200 كومنت و في الأخر و لا كومنت ليه علاقة بيك
أنا عن نفسي كإنسان خفاشي ليلي مش بشوف من رمضان غير كل خير الصراحة يعني أنا أفتكر من أيام إبتدائي عمري ما نمت بالليل و من ساعتها و أنا مرتاح أخر راحة مع رمضان .
الناس كلها بتقضيها زيارات في رمضان لأ و الغريب إن كل الناس فاكرة إن بما إنك عزمتهم عالفطار يبقى هنتسحر مع بعض أكيد يعني بياخدوا اليوم لكشة واحدة و يا ويلك لو أبديت إمتعاضك هتبقى بخيل و معفن و مش مضياف أنا كإنسان أعشق الأكسجين و أكره ثاني أكسيد الكربون - على رأي د.أحمد خالد توفيق - دي معايا بتفرق جامد علشان كدة بقضي أغلب رمضان صايع في الشارع من بعد الفطار .
من الحاجات اللي بحبها في رمضان إن فيه طقوس غريبة أوي بيعملها الشعب بالكامل مش فرد و لا إتنين لأ بتبقى مظاهر عامة يعني مثلاً
الناس اللي بتتدين أوي في رمضان و البنات اللي بتتحجب رمضان بس و الرجالة بجلاليبهم اللي مش بتظهر غير في رمضان - أفهم أنا إيه علاقة الجلاليب برمضان ؟؟ - و بياعين السبح و المصاحف اللي كلهم منتقبيات و أصحاب لحى في المترو و الأتوبيسات يعني مش رب رمضان هو رب السنة ؟؟ طيب ليه الهطل ده ؟؟
و كمان المكسرات و الفانوس أموت و أعرف إنك تجيب إختراع إتوقف إستخدامه من قرون و تعلقه في البلكونة و لا في الشارع خالص لمجرد إنك تبقى جبت فانوس إيه علاقته برمضان و لا المتفجرات اللي إسمها مكسرات بلاوي سودة من شأنها تدمير أي دايت محترم خصوصاً مع الإستخدام الغريب ليها في رمضان و تلاقي الراجل جايب لعياله بمرتب شهرين مكسرات قال يعنهي العيال مش هتفرح غير بمكسرات يعني إيه علاقة المكسرات برمضان برضه مش فاهم

برضه بستغرب إن الموظفين من صباحية ربنا قرفانين يعني يبقى الواحد صاحي الساعة 4 و إتسحر و يا دوب الساعة 7 يبقى عصبي و جعان و قرفان و ينكد عليك نكد الكفار و يخليك تسب 100 دين ليه طيب علشان صايم و متايق و قرفان .

بس برضه رمضان شهر الكرم يعني تلاقي سواق التاكسي ممكن يروحك ببلاش لو قبل الفطار بحاجة بسيطة علشان تفطر مع أهلك و شوف بقى لو قابلت نفس الراجل ده في أدان العصر ممكن توقفه يسبلك الدين و يمشي من غير حتى ما يسأل إنتا رايح فين و لا كمان الراجل الطيب اللي بيرمي نفسه على عربيتك علشان يديك تمرة تفطر بيها و لا يهمه موت و لا عاهة مستديمة و لا أي حاجة و بما إن رمضان شهر الكرم فالشحاتين بيكتروا أوي يعني أنا في بلدي في حوالي خمسين شحات معروفين بمناطقم بصحة إحتياجهم بكل حاجة تلاقي سبحان الله في رمضان في وجوه جديدة و ناس أول مرة تشوفها و كله بيلقط رزقه  و تلاقي كل قهوجي فاتح تندة صغيرة بتاعة بليلة و كل فرن بقى فيه بقدرة قادر ماكينة كنافة و قطايف و كل الناس كدة غريب جداً بيبقى شكلها رمضان أوي يعني حاسس لو صورت واحد صورة ممكن تشوفها بعدين تقول دي كانت في رمضان لأن شكله فيها رمضان أوي :)

السبت، 7 أغسطس 2010

عصفور مهاجر للسما

عصفور مهاجر للسما
يمكن ما بين سطرين تشوف كل الكلام
لكن مفيش غير كلمة واحدة تهمني
عندي الكلام مبيسويش لو لفظ حر موسطهوش
كل الكلام ميخصنيش
يخصني بس إني أفرد جناحي لأخر قدرتي
رغم إني مش غاوي إني أطير
لكن جناحي يهمني
كرامتي محتاجة جناحين
لو خايف أحلم يبقى إيه فايدة وجود الأمنيات
افرد جناحك حتى لو مش عايز تطير
و بعلو صوتك غني غنوة عن حريتك
زعق و قول عايز جناحي ميتتنيش
مش زي الفراخ في قنهم في حكم المدبوحين
فارقة على السكين يادوبك شئ مفيش
حتى النواح مبينوحوش
إختارو من بين المناطق صوت جبان
باعوا حياتهم لجل بيت
باعوا جناحهم
لجل تشبع بطنهم
و يا ريت نفع
في زي إنك تبقى مالك كلمتك ?
مالك تطير حتى لأخر دنيتك
مالك شعورك بالوجود من غير قفص
عصفور مهاجر للسما
ما هو صوتي مخلوق لجل أغني و يتسمع
و جناحي مخلوق يتفرد
ما أنا أصلي مخلوق لجل أعيش
عصفور أنا
صوتي برغم الضعف
واصل لأخر المدى
بزعق بكل قوتي
عصفور أنا
جناحي بيوصل للسما
لما بتطلب إني أطير
غاوي غنا
غاوي أشوف الشمس من فوق البيوت
غاوي السما
رغم إني مش غاوي إني أطير
جناحي لازم لجل ما أوصل للسما
رغم إني مش غاوي إني أطير
حياتي محتاجة جناحين

الأربعاء، 4 أغسطس 2010

10‏ فوائد للمطرب التامر

1‏ - بيطلع غلب الناس :
 شوف كام واحد بيشتمه (شتيمتي كفاية تدخله الجنة)

2‏ ‏- خلاك تعرف الفرق بين المطرب التامر و المطرب العادي المحترم اللي ممكن تسمعه
يعني في مطرب تامر و مطرب تامر شوية و مطرب محترم مش تامر

3‏ - خلاني أنا و غيري كتير نلاقي حاجات كتير نكتب عنها
زي المقال ده مثلاً

4‏ ‏- خلاك تعرف العيال الفرافير :
 اتخيل شريك(ة) حياتك من بتوع تمورة تمورة إحنا بنحبك يا تمورة

5‏ ‏- سهل علينا نقاطع بيبسي
والله بجد من ساعتها و أنا مقاطع بيبسي

6‏ ‏- أثبت نظرية الشعاع
 "لو تعرف تامر هتعرفها"

7‏ ‏- أصافة للغة صفة جديدة هي صفة تامر
"مثال" : فلان ده تامر أوي أو أنا هعمل على فلان ده تامر "أي هتسهتن عليه"

8‏ ‏- أكيد والدته فرحانة بيه

9‏ ‏- بيوفر للمصريين موضوع متجدد للرغي

10‏ ‏- اتوفر للميكروباصات كمية كبيرة من الشرايط المنسوخة الرخيصة اللي بتحسسهم إنهم مش شعبي أوي يعني

الأحد، 1 أغسطس 2010

مصر بقى طعمها ... جمبـــــــــــري

إفرحوا يا مصريين و النبي لأ لازم نفرح مصر عقبال عندكم بقى طعمها جمبـــــــــــــــــــــــري
ده على أساس إن كام مليون مصري يعرفوا طعم الجمبري من الأساس و كمان إيه الفرق بينه و بين طعم الفراخ المتبلة بالضفاضع و لا طعم ورق العنب بالكسبرة و الكمون
أنا قبل ما أظلم شركة الشيبسي اللي مش هقول إسمها ^_^ جبت كيسين بطعم الجمبــــــــــــــــري أكل و أفكر ده طعم إيه شوية شبه طعم الشطة و اللمون بس من غير شطة ... شوية شبه طعم الفراخ بالنعناع مش عارف أحدد بصراحة جبت أصحابي و حاولت أختبرهم واحد منهم حلف بربنا إني حاطط على الشيبسي حاجة و واحد قال لي ده بطعم الديك الإسكندراني و واحد قال لي إنه فراخ - أه والله - على أي حال بغض النظر عن طعم الجمبـــــــــري و مشاكل الجمبــــــــــري  بقت هوجة في البلد كل شركات الشيبسي عملت طعم الجمبري و برضه ملهوش طعم ولا لون و المصييـــــبة إن شركة تانية عاملة إعلان معفن إنها أول من عمل الجمبري - كدب والله - و لا شركة تانية بتقول إنها أول مرة شركة شبسياتكو المتضلعة  - بتتريق عالإسم - تعمل خل بملح  و أخيراً جمعتهم ببعض و أحمد و منى و النظام ده على أساس إن خل و ملح اللي من أيام الخديوي هش ده كان خدعة مثلاً و لا  الألعن و الأضل إن الناس برضه بتشتري
أنا لو شفت الراجل العثل صاحب فكرة الإعلانات دول ممكن أعدمه عالخازوق والله

السبت، 31 يوليو 2010

وطني

ما أنا برضه بقول عنها
مهياش أم
و لا القمحي مهوش لونها
و لا حتى الطيبين ناسها
و لا كل اللي يتقال عنها
بيوصفها
دي بالنسبالي شئ تاني
دي أغلى من دشليون أم
دي مصبوغة بلون الدم
و ناسها تعبوا مالطيبة
خلاص الطيبة بطلناها 
من بدري
يا وطني عشانك مستعد أقتل
و أكسر 100 صورة فبرواز
و 100 تمثال و 100 خناس
و ألف صنم
منيش محتاج غير الله مدد
منيش محتاج معونة حد
منيش محتاج غير إنتي وطن
ما لما أصرخ و أتكلم
يقولوا ضد مصلحتك
و خاين أو منيش فاهم
خلي الفهم علشانكم
و لو إني أكون مصري 
بإني أسكت و متكلمش
و أشوف وطني قصاد عيني
بيتباع حتى مستفهمش
أو أبيعك و أبيع نفسي 
فأنا برفض لقب مصري

خواطر واحد مسافر بلدهم

* القطار لا يأتي في موعده إلا إذا تأخرت أنت .
* أحس أن جميع بائعي الترمس قد تخرجوا من مدرسة خاصة بهم بل و أحس أحياناً أنهم يملكون نفس الحنجرة .
* برغم أني لم أغب سوى عدة شهور إلا أنني وجدت أن الصغير صار شاباً و الشاب صار رجلاً و الرجل قد هرم و أغلبهم مات .
* ينظرون إليك كضيف يكلمونك كضيف يعاملونك كضيف إذاً فلتكن مجرد ضيف , صدقني هذا أسهل من أن تقنعهم بالعكس .
* من المحزن حقاً أن تتحول الأماكن إلى مجرد ذكريات .. الأصعب هي أن يتحول الأشخاص كذلك .
* أعجب حقاً عندما أجد أن لدي أصدقاءاً لم أكن أعلم حتى بوجودهم .
* الهدوء في مدينتي الصغيرة يقتلني حرفياً.
* سريري القديم مريح فعلاً لكن الذكريات المتعلقة به هي ما يمنعني من الإستغراق في النوم .
* الأشخاص كاللوحات الجميلة يجب أن تظل على مسافة كافية منهم كي ترى الصورة جميلة واضحة ... إن اقتربت كثيراً لن ترى سوى بقعاً من الزيت .
* أدركت الأن فقط خطأي عندما قمت بعمل جدول زمني لزيارتي ... لن أكرر هذا الخطأ  .
*في الشارع الذي أسكن به قططاً أكثر حتى من البشر - أنا أكيد من ذلك - من الغريب حقاً أن تلك القطط هي الشئ الوحيد الذي لم يتغير منذ تركت منزلي القديم .
* الأن فقط أدركت أن الوقت يمضي أسرع مما أظن .

الأربعاء، 21 يوليو 2010

لسع مع الصيف



نوعاً ما أنا إنسان شتوي جداً مش بحب الصيف و لا الحر ولا الهدوم الخفيفة و لا البنات اللي وشها ملحوس ميك أب لأن الشمس بوظته و لا الحاجات دي كلها ... يعني الصيف بالنسبالي كارثة بكل المقاييس يعني بالنسبالي السنة فصل لذيذ إسمه الشتا و فصل وغد إسمه الصيف و فصلين بيستهبلوا في الوسط ما بين الصيف و الشتا إسمهم الربيع و الخريف يمكن من أيام حار جاف صيفاً مقطقط معتدل شتاءاَ و أنا مش بحب الأخ الحار الجاف ده تماماً ...

يمكن من اللي بيساعد الصيف على إنه يكون وغد إن عنده أحلى مساعدين في شقتي ... هحكيلكم بالتفصيل عن عذابي مع مساعدين الصيف

أولاً
 اللمبة بتاعة التلاجة
عندي تلاجة إيديال تمانية قدم بما إنها شقة عزاب أنا و صاحبي بس ساكنين فيها قالتلاجة التمانية شغالة و زي الفل المشكلة بقى لمبة التلاجة عندها حالة غريبة من الإستعباط يعني الواحد يقوم من أحلاها نومة علشان ريقه ناشف بفعل الوغد الصيف يروح يفتح التلاجة علشان يشرب اللمبة متشتغلش 
شوف الغلاسة بتاعة اللمبة يعني الصبح تبقى منورة و ملعلعة و بالليل تطفي و أرجع أقفل التلاجة و أخبط مشوار للكبس أولع النور و أروح أفتح التلاجة تاني علشان أشرب 
شوف يا أخي الإستعباط

ثانياً  
المروحة 
عندي إسم الله على مقامك مروحة أثرية وارثها عن الولية اللي مأجر منها الشقة -  أيوة والله أثرية - و سبحان الله مصنوعة من الحديد - أيوة والله من الحديد - بحيث إنها تسخن و تطلع هوا سخن إنما إيه ولا أجدعها دفاية ... المشكلة بقى إن المروحة نفسها مقتنعة إنها دفاية  يعني بتعمل أحلى شغل أحلى شغل يعني تشغلها مفيش مس دقايق تسن و تبقى نار حتى متعرفش تحركها 

ثالثاً 
بتاع الدليفري 
بما إن الجو حر و الواحد مش مستعد ينزل يتسلخ في الشمس ده فدايماً و أبداً بأطلب دليفري و الغريبة إن كل ما أطلب من أي مكان يجيلي يا إما الأوردر غلط يا إما ناقص يعني مثلاً إمبارح طلبت من محل سمك جنبي بوري مشوي و رز صيادية و طحينة 
بعد ما جه و حاسبته و الموضوع تمام بفتح الأوردر لقيت بلطي مقلي و عيش و مخلل كلمت المحل قاللي يا باشا سوري الشواية بايظة و محبيناش نبعت الدليفري مان بإيده فاضية و الله يا باشا رضاك هدفنا .. بعد ما كنت هشد في شعري أكلت و حمدت ربنا لأني كنت جعان بجد .- والله الموضوع بجد - 

و بعد ده كله ألاقي ناس بتحب الصيف ياخي يخرب بيت ده صيف

المروحة العبقرية الأثرية الحديدية

الثلاثاء، 20 يوليو 2010

حداداً على بطل

فكرت كتير أكتب إيه حداداً على بطل بجد نفسي أبقى مكانه 
فكرت قلت يمكن أعرّف الناس اللي لسة معرفوهوش ... لقيت مصر كلها عارفة مين خالد 
قلت أحسن أحط الصور بتاعته ... بس مش كفاية و أنا شخصياً شايف إن ده إنتهاك حرمته كميت و كشهيد
في الأخر قلت إن خالد أكبر بكتير من كدة 
الموضوع متخر بس ربنا أعلم إني كنت عايز أعمل حاجة أو أكتب حاجة جديدة و مقدرتش 
في أربعينك يا خالد يا سعيد بدعيلك من قلبي ربنا يسكنك الفردوس الأعلى إنتا كنت الشرارة اللي صحت ناس كتير 
في أربعينك يا خالد ميهمنيش إنتا كنت إيه و ميهمنيش كل اللي قالوه عنك و ميهمنيش اللي هيتقال كمان أنا مش مستعد أصدق عنك حاجة  كفاية إن ربنا فوق بيك ناس كتير و نفسي بجد ربنا يجمعنا كلنا بيك شهداء فدا مصر

الأحد، 18 يوليو 2010

تامر و الأغاني اللي بتقلع

لو لاحظت معايا أنا مش بحب الأخ تامر ده و لا بطيق خلقته بس بحترمه ... أه والله بحترمه بيعرف إزاي يخليني أضحك إلى حد السخسخة لا بجد عليه دماغ دماغ يعني
من يومين كدة كنت كاتب بتتريق على إن تامر بقى سفير الطفولة و هيروح يعغير للعيال بمبرز و كدة و مكنتش ناوي أكتب عن المقال اللي كتبه في الأهرام بس والله مش قادر أطاوع نفسي و لازم أخليكم تقروا مقالته العصماء اللي مفيهاش ولا خطأ لغوي واللي موضوعها هادف جداً وثقافية إلا حد بعييييييييييد ... كلامي بالأحمر زي العادة

كتبت تنبيها في ألبومي الغنائي الأخير بخصوص اغنية‏'‏ كام واحد فينا‏'‏ يقول‏'‏ الرجاء من كل من تنطبق عليه حالة الأغنية أن يتجنب سماعها مع شريكة حياته‏.
لا تشرب الدواء الدواء فيه سمٌ قاتل
لأنني لاحظت أن كلمات الأغنية شديدة الواقعية. فهي تتحدث عن شيء واحساس خطير بداخل الأشخاص خصوصا المتزوجين‏,‏ وهذا الاحساس لم يتحدث فيه صاحبه‏.‏ الأغنية كلامي ولحني‏..‏ والحقيقة كان إدراكي لحجم صراحة الأغنية كبير جدا ومقلق للغاية من عواقب سماع الأغنية‏.‏
كلامه و لحنه ... تبقى مسروقة 
و عايز أعرف حجم إدراكه بالصلاو عالنبي كدة قد إيه حيث لاحظت أن هذه الظاهرة الاجتماعية منتشرة حينما جلست مع شخص وتحدث عن زوجته وقال‏'‏ مش هي اللي كانت في خيالي‏'‏ والعكس أيضا‏,‏ وجمعيهم يؤكدون ان سبب استمرار العلاقة دون حب هو الابناء‏'‏ الخلفة‏'..‏ ووجدت نفسي أمام شريحة كبيرة من المجتمع تزوجت دون حباً فهناك من تزوج فتاة دون ان يحبها ولكنها من وجهة نظره تصلح أما وتنتمي لأسرة مشرفة‏.‏
أحد الأشخاص بقت ظاهرة منتشرة ؟؟ و أحد الأشخاص بقى جويعهم يؤكدون
ركز و النبي على تزوجت دون حباًوهناك أيضا من تزوجت شابا لا تحبه ولكنه مرتاح ماديا‏,‏ وهناك من تزوجا بشكل متسرع لمجرد احساسهم بأنهم سيكونون في منتهي السعادة وخصوصا في العلاقة الحميمة‏
علاقة حميمية يا كثوفي
يتفاجأ كلا منهما بعد فترة قصيرة أن الزواج لا يتعلق بهذه المسألة فقط ولكنه مسئولية كبيرة لكلا الطرفين واحترام متبادل بينهما‏..‏ وهات وخد‏.‏
يتفاجأ ثم يندهش فيستوعب و هات و خد يعني زي السكينة في الحلاوة
فقررت ان أكتب أغنية‏'‏ كام واحد فينا‏'‏ وتحديدا بعدما اكتشفت في معظم الحالات ان الزوج كان يتمني انسانة أخري والزوجة تتمني رجلا آخر بسبب الحب بالعقل وحسبة الأمور فتزوج كل منهما وبداخله مشاعر حب لشخص أخر بالقلب ولكن بسبب الأبناء فكل منهما يكتم سره بداخله‏.
قرر يكتب يعني جاب كوباية الشاي و قفل على نفسه الأوضة و قعد يفصل في الكلمات و لا اجدعها ترزي
وكلمات الاغنية تقول‏:‏
‏'‏ كام واحد فيناعاش مع واحد مكنش بيمتناه
واضطر يقبل حب مكنش في يوم ليه ولا كان علي هواه جوايا احساس بيموتني
ومشاعري اعمل ايه فيها احساس بيخنقني واعمل ايه دي حاجة مقدرش اتكلم فيها
وخصوصا بعد لما بقا بينا حاجات لازم نكمل ونعيش ليها
بيبقي في حضني وبين ايديه وعقلي وقلبي مش وياه
مع حد تاني كان نفسي هو مكانه وانا ابقا معاه
ودي اخرت اللي يحب بعقله ويلغي مشاعره ويحبسها
ومشاعري اعمل ايه فيها احساس بيخنقني واعمل ايه دي حاجة مقدرش اتكلم فيها
وخصوصا بعد لما بقا بينا حاجات لازم نكمل ونعيش ليها
في مرة حبيبي غلط في اسمي سالته ورد وقال مقصدش
مش يمكن برضه حاسس هو نفس الاحساس وانا معرفش
يلا اديني خرجت حاجات جوايا حاسسها ومبتشفش‏'‏
الحلزونة يما الحلزونة
وأذكر انني في أحد الجلسات مع الأصدقاء‏,‏ كنت أقول أني كتبت أغنية كلامها الذي سبق ذكره وكان بجواري صديق لي وزوجته وعندما بدأت أغني الأغنية وجدت الفتاة‏'‏ تبكي مر البكاء‏,‏ وشاهدها زوجها وقال لها في منتهي الغضب‏'‏ المفروض بقي انا الشخص اللي بتبقي في حضنه وتفكري في حد غيره وتتمني تكوني معاه؟‏'‏ وقامت مشاجرة كبيرة بينهما فشعرت بأني لابد أن أضع هذا التنبيه‏.‏
يا دين أمي عالنــــــــــــــــــــــــــــــــــــــــــتش
وعلي الجانب الآخر قمت بغناء أغنية‏'‏ اخترت صح‏'‏ وكان مضمونها انني أحببت بقلبي انسانة‏'‏ اخترتها صح‏'‏ واكتشفت انها جرحتني أكبر جرح في حياتي يعني أيضا منجرحتش إلا لما اخترت صح‏.‏
يعني بيقولنا عمو تمورة ولا كدة نافع ولا كدة نافع
وذلك يعني ان الذي يحب بعقله يعيش في جرح‏,‏ والذي يحب بقلبه يعيش أيضا في جرح آخر‏,‏ فغنيت الموضوعين لأنهما موجودان بشكل ملحوظ أتمني أن يقل عددهم ويزيد عدد المتزوجين السعداء الذين عبرت عنهم بأكثر من أغنية مثل‏'‏ لو هكون غير ليك‏,‏ اطمن‏,‏ قفلت قلبي‏,‏ يا أنا يا مفيش‏,‏ لأول مرة‏,‏ تعرفي‏'.‏
لا لا للللا دا دا دددا يا رومانسي يا أمور يا تمبورة
ولكني في النهاية فنان وأحاول أن أعبر عن قضايا المجتمع الخاصة بالمشاعر والاحاسيس في الأفراح والأوجاع آملا أن أكون منفذا لهم يتنفسون عن طريقه حتي لا يحدث اختناق وانفجار في المشاعر مثلما كتبت ولحنت وغنيت أغنية‏'‏ أنا مش عارف اتغير‏'.‏
فنان بيحط العيش في الفُن و يطلع الغيش من الفُن




و في النهاية أسيبكم مع فقرة من الفن الجميل مع تمورة الأمور أوي