كان كاتب إسمه و عنوانه
على جلدة كشكول متقطع
و حاططها في جيب الجينز شمال
أسامي الناس اللي في قلبه
أكتر مالنوتة على موبايله
و الساعة في إيده بتتقدم
و غريبة ده عمره ما إتأخر
و ميدالية من مفتاح واحد
و الخط التاني في محفظته
و تلات أربع جنيهات فضة
و علبة مناديل
...
لابس شال و إحنا في عز الحر
و قميص أبيض بس مكرمش
و شراب مش ماشي على الكوتشي
أحلامه بطول شعره المنكوش
غريبة إنه بيحلق دقنه
...
مش متضايق بس مكشر
و إيديه في جيوبه مبيشلهاش
و سماعة مبيسمعهاش
و منزلها على رقبته
...
إسمه محمد
...
هناك تعليق واحد:
حلوه اوي يا محمد
فيها رتم كويس اوي كأنها اغنيه لمحمد منير
واحلي حته عجبتني فيها احلامه بطول شعره المنكوش
يعني لو حلق يبقي احلامه راحت ؟
جميله يا محمد بس كنت عايزه اعرف هو حصل له ايه بعد كده
إرسال تعليق