مستغرب جداً ليه كل ما أشغل التليفزيون على برنامج توك شو ألاقي شعبولا يمكن أنا حظي سخيف يمكن هو حظه سخيف !؟
مستغرب جداً من عمر طاهر لما استضافه في مصري أصلي و قعد ييجي خمس دقايق لكل سؤال يحاول يفهم شعبولا هو يقصد إيه بالسؤال و في الأخر شعبولا يجاوب حاجة هطلة خالص و مياخدش الدرجة طبعاً و أخر الحلقة يطلع مصري أصلي علشان بصوت مشروخ دمر أغنية عبد المطلب و غناها
....
إمبارح بالصدفة بغير القناة لقيت شعبولا في برنامج مش عارف إسمه مع مذيعة مش فاكر إسمها بتسأله عن موقفه من كوتة المرأة
:/
هو معرفش يعني إيه كوتة المرأة طبعاً
و بعد ما المذيعة فهمته قالها إن المرأة لازم تقعد في البيت بدل الزحمة وسط الرجالة :)
اتفقعت مرارتي و قمت أنام أخويا أحمد قال لي إني متفرجتش على حاجة و إن البهاريز كانت ورا
...
على لسان أحمد " شتيمة في البرادعي .. واجب شكر و عرفان لزكريا عزمي .. تفضيله عمرو موسى لرئاسة الجمهورية .. و إنه لا ينتوي الترشح طبعاً "
أنا عاوز أعرف مين اللي بيسمع للراجل ده ؟ مين في الدنيا بيتمزج أوي بإييييييييييه بتاعته دي ؟
بلاش مين بيسمعله مين يعرفله أسامي 5 أغاني بس ؟
غير أنا بكره إسرائيل طبعاً :)
لما دورت عليه عالنت لقيت صفحة ويكيبيديا بتقول إن أغانيه فيها طابع سياسي
ما هو طبيعي إن أي حد يغني لإسرائيل يبيع في بلد شعبها بيكره إسرائيل !
حد يقول لي نقطة واحدة بس في صالحه .. ليه بيستضيفوه يسألوه أسئلة سياسية و إقثصادية و إجتماعية
...
جو من الكآبة و كراهية الدنيا والناس بيجيلي لما بتستضيوا الراجل ده
و معتقدش إن أنا لوحدي !
أرجوكم ضيعوا ساعات الهوا في حاجات تانية ضيعوا فلوس الإعلانات في حاجات أقل فقعاً للمرارة حتى جيبوا حمام و طيروه أنفع للبشرية .. و أهو الحمام رمز السلام برضه و كدة
هناك 3 تعليقات:
تقريباً هما بيسألوا الأسئلة دي كنوع من المجاملة لشخصيته (اللي هيا المفروض مرحة ولطيقة) :)
شخصية ؟؟ ومرحة و لطيفة ؟؟ إنتا متأكد إنك بتتكلم عن شعبوللا ؟
aywaaaaaaaaaaaaaaaaaa nfs el 7ala ely btgely ama ashof el ragel da
إرسال تعليق