الاثنين، 31 مايو 2010

عسل إسود


كإنسان غير سينيمائي زي حلاتي زيارة السينما بجد تعتبر حدث تاريخي ممكن يتسجل في السي في بتاعي زي ما إنتم عارفين الدي في دي أسهل بكتير على أي حال النهاردة رحت فيلم حلمي الجديد عسل إسود و أهي فرصة احاول انقضه
في البداية أول حاجة شدتني للفيلم إسمه أنا عن نفسي شايف إن الإسم مش لايق على الفيلم زي الإسم اللي الرقابة رفضته :مصر هي اوضتي ... بالنسبة لأن أغلب اللي شافوا الفيلم لهم نفس الرأي و مش شايف إن ده في اهانة لمصر هي أمي خالص على أي حال الإسم التني معقول بس مش زي المرفوض
بعدين البوستر الرئيسي كان بوستر لذيذ بيدل على فكرة الفيلم بس كان رأيي إنه يبقى فيه عناصر من الفيلم أكتر يعني بدل القلة و البطيخة كان أجمل منه البوستر اللي فيه الكاست كله
الموسيقى كانت حلوة طبعاً عمر خيرت عبقري بس الموسيقى حلوة لو هتذاكر عليها مثلاً أو تسمعها قبل ما تنام لكن مش متناسقة مع الفيلم ممكن لو شفت تناسق موسيقى ولاد العم مع جو الفيلم تعرف الفرق
السيناريو أكتر من رائع لا غبار عليه بجد و ده اكتر حاجة شدتني في الفيلم يعني مش لازم تقول إيحاء جنسي واضح زي سيناريوهات عمر طاهر لأ ممكن تقول حاجة توصل للناس و متزعلش حد و متخدشش الحياء و بالنسبة للشتايم الكتير فده العادي بتاع شاب أمريكي جداً زي البطل
التصوير محترم جداً و الإخراج متميز و إدوارد متميز أكتر من اللازم و الإختيار موفق جداً لباقي الأبطال خصوصاً لطفي لبيب و إنعام سالوسة

بس في حاجات بسيطة معجبتنيش زي مثلاً الإصرار على إن كل الناس عندها إصرار عدم إحترام المصري اللي زيهم حتى الراجل اللي في الهرم كانت أوفر بجد
و كنت متضايق إنه بيصلي و عنده تاتو يعني اهله كانوا كويسين و عرفوا يربوه على الصلا و معرفوش يقولوا له إن التاتو بيعزل الجسم عن الميا فمينفعش في الإسلام
و كان من رأيي إنه يرجع أمريكا مش لازم ترجع مصر و تعيش فيها علشان تبقى مواطن مصري بيحب مصر بجد

عموماً الفيلم ياخد أكتر من تسعة على مقياس عشرة و رغم الإمتحانات دي كان الفيلم بجد حضوره عالي جداً على الأقل في حفلتي و اللي بعدها و اللي قبلها
لو في يوم من الأيام كلامي ده وصل لحلمي فبجد ده أكتر فيلم إنتا مبدع فيه بعد اسف على الإزعاج


السبت، 29 مايو 2010

أنا مصري



تعرف المصري ده غريب يا أخي لما تلاقي صاحبك بيسب الدين لمصر و نفسه يهاجر و في يوم ماتش الجزاير شوية و يعيط من الحماس
لما تلاقي صاحبك ده بيتخانق مع واحد سعودي علشان أغنية الراب اللي شتمونا فيها
لما تلاقي عنده أغنية يا حبيبتي يا مصر

تعرف .. أنا فخور إن أنا مصري مش مصر اللي ظالمانا لأ بالعكس خالص مصر طول عمرها طيبة معانا بس إحنا اللي بناكل و ننكر من أيام الاخ مصر لما جه سكن في وادي النيل و إتسمت بإسمه و من ساعتها و هي مليانة خير و إحنا اللي هما المصريين اللي جرفنا أرضها و لوثنا ميتها و بهدلناها أخر بهدلة و بعد كدة نقول مصر ظالمة و وحشة و نعوز نهاجر منها

تعرف ... لما يكون واحد بتكرهه و تشوفه بيتضرب لغاية ما يجيب دم إنتا لو أصيل هيصعب عليك و لو قلبك إسود هتتشفى فيه كدة هي مصر حاسس إن الوجود كله ضدها بداية من ولاد العم لغاية الإخوان -لا ده مش تحوير- أيوة إخواننا العرب الأفاضل إتفضل إدخل شات متعدد الجنسيات و قول أنا مصري و شوف اللي هيحصل لك

في خدمة كانت جوجل عملتها إسمها إجابات جوجل شوف يا عم معايا السؤال ده
-يا أخي كل المطربين العرب غنوا لمصر إلا ما تلاقي مصري واحد غنا لبلد عربي

اللي يغيظك الإجابات
-المصريين ما عندهم وفا
-المصريين كدة
-شيرين الوحيد المحترمة اللي غنت
-والله أنا مصري و كاره مصر و أرغب بالعمل في الخليج تليفون:***********
-الإجابة حذفت بواسطة جوجل

هتقول لي دول قلة مستترة هقول لك لأ اللي في القلب في القلب الناس دي مش بتحبنا بجد

علشان كدة بجد مصر صعبانة عليا مش لاقية حد يدافع عنها غير في الكورة و بيدخل فينا إجوان كمان
أيوة انا مصري و بحب مصر و نفسي كلنا نبقى كدة
عايزك تقولها معايا بصوت عالي أنا مصري
بصراحة علشان أرضي ضميري مر شفت واحد فلسطيني بيحب مصر

الأربعاء، 26 مايو 2010

هو الشيب بعينه بغباوته بشكله العكر

فاكر أيام ثانوي كان عندنا قصيدة بتاعة حافظ ابراهيم إسمها صخرة الملتقى طبعاً كانت جميلة جداً بس ده مش موضوعنا الموضوع إن في بيت بيقول "اريك مشيب الفؤاد الشهيد ... و الشيب ما كلل المفرق"
طبعاً و المدرس بيقول البيت سألنا إيه نوع ما هنا طبعاً كلنا بدون استثناء قلنا إنها نافية
المشكلة بقى إن كتاب الوزارة قايل إنها موصولة ركز معايا كدة إنتا كانسان عادي مش مستشار لغة عربية فاهم إن الراجل بيقول للصخرة أنا قلبي شاب و اللي شاب هو شعري ولا بيقولها أنا قلبي شاب رغم إني لسة شعري مشبش

كبرت و أنا فاكر إن المشكلة دي قاصرة على كتاب الوزارة بتاع ثانوي لكن إتضحلي إني كنت واهم المشكلة طلعت في الناس كلها مرة كتبت قصة قصير المفروض إنها حزينة حزن السنين لقيت كل التعليقات ضحك بصراحة شكيت في نفسي رحت عرضتها على ناس كبيرة و ناس بتفهم و ناس مبتفهمش كمان كلهم أجمعوا إني نكدي أتاري إن المشكلة إن أول واحد علق كان مقتنع إنها بتضحك و اللي بعده محبوش يبانوا مش فاهمين فضحكوا و بقت قصتي الكئيبة بشكل أو بأخر كوميدية بحتة

نفس الموضوع حصل من فترة كتبت قصيدة واحد علق إن النهاية مفتوحة لقيت التعليقات كلها بتناقش موضوع أنا ليه سايب النهاية مفتوحة تعرفوا النهاية المفتوحة كانت إيه ؟؟؟ موت البطل

الثلاثاء، 18 مايو 2010

اللي ملهمش فيها بيتكلموا في السياسة و إحنا معاهم

أول ما جت على بالي فكرة الموضوع ده فكرت في العنوان حاجة عن السياسة قلت أخليها رأيي في السياسة
لقيت العنوان مش لذيذ و محدش من الأخر يهمه رأيي الشخصي
قلت أخليها السياسة في مصر لقيته عنوان مطاط و مبتزل أوي _حلوة مطاط و مبتزل دي _
بس يا سيدي و افتكرت إن شعب مصر اللي ميعرفش مين وزير الري بتاعه أحسن حاجة يبقى ملوش فيها
و من هنا و بمساعدة كوكا كولا جه الإعلان
جت مرة واحدة كدة هوجة كله بقى فهم في السياسة و رأيه إن في مؤامرات و خطط و الحاجات دي و اللي ساعد على الموضوع ده إن بقى في تعدد مرشحين لمنصب الرئيس في مصر بعد سنييييييييييييييييييييييييييييييييين بعدد سنين عمر جدتي اللي يرحمها كنا فيها بنبايع الرئيس الموجود فعلاً وإتعشت على كدة
جه يا سيدي الفترة اللي فاتت بقى في نعمان جمعة و أيمن نور و الراجل بتاع الطربوش اللي مش فاكر إسمه و الناس سخنت و قالت يللا سياسة و برضه محصلش حاجة و بقي الحال على ما هو عليه و الناس نسيت
لغاية السنة دي لما مرة واحدة البرادعي ساب حاله و ماله و طاقته الذرية و الناس عايزاه يبقى رئيس الراجل اللي كان جزء من إحتلال العراق و اللي عايش طول عمره بره بقى مرة واحدة خير من يمثل مصر
طبعاً في شخصيات تانية لمعت برضه زي الأخ حمدين الصباحي و اللي أنا شخصياً بحترمه كانسان لكن مش عايز أفقد احترامي ليه فمش هنتخبه للكرسي الكبير
و طبعاً عمر سليمان اللي امريكا متوقعة إنه هيرشح نفسه و نوعاً ما أنا متفائ بيه لولا إنه رجله و القبر
و أيمن نور اللي خلاص البساط إنسحب من تحت رجله
لاالمهم بقى جمال لو فاكرين زمااااااااااااان كان مبارك قال إن جمال ملوش في السياسة من ييجي خمستاشر سنة كدة و فجأة لقيناه ناططلنا في الصورة و مش عارفين إن كان يستحق و لا لأ نوعاً ما لو في بلد تانية و شاب في سن جمال و صل للمكان ده كان الوصف الوحيد له عبقري بس هنا الوصف الوحيد كوسة
و رأي رجل الشارع اللي هو المهم في السبوبة كلها غريب
شوف بقى يا سيدي
لو نعم لجمال : توريث
لو لأ لجمال : مش شايفين الصورة الكاملة
لو نعم للبرادعي : الراجل منعتبروش مصري
لو لا للبرادعي : هنبقى بنطفي نور التغيير الوحيد
لو نعم لنور : عميل أمريكا
لو لا لنور : الراجل إتعذب و اتبهدل لا يمكن يكون بيغشنا
لو نعم لعمر سليمان : مين عمر سليمان أصلاً
لو لا لعمر سليمان : إنتا متعرفش قيمة الراجل ده كفاية إنه قناوي
لو نعم لحمدين : حمدين راجل محترم مينفعش رئيس
لو لا لحمدين : حمدين أكتر واحد محترم للمنصب ده

و ده كله لو مبارك منجحش إبقوا قابلوني لو حد من دول قدر يتعدى 5% و يبقى الحال كما هو عليه زي المرة اللي فاتت