الجمعة، 2 أبريل، 2010

قلم أزرق

"مش عارف ليه ساعات بلاقي أكتر من فكرة في دماغي أفكار غريبة يعني إيه علاقة طريقة رسم الموج و ووفاة جدتي ببعض ؟ ليه كل ما أفكر في واحدة أفتكر التانية"


"في يوم ما ماتت جدتي مبكتش عليها ولا حتى زعلت و لغاية دلوقتي رغم إني كنت بحبها جداً ... في الحقيقة عمري ما بكيت على حد مات و لا حتى زعلت ... هو أنا مبحسش بالموت ليه ؟؟؟ نفسي أعرف"


" طول عمري كنت بشتري الهدوم مع والدتي _ربنا يخليهالي_ كانت دايماَ مش عاجبها إختياري لأنها عايزة تجيبلي هدوم واسعة و مريحة و خامتها كويسة كنت برضى و بحمد ربنا بس جوايا كنت مستني اليوم اللي أجيب هدومي بنفسي ... دلوقتي بحكم إني عايش بعيد عنها بشتري هدومي لوحدي بس بقيت عايز الهدوم الواسعة المريحة اللي خامتها كويسة"


"بحب ربنا جداً و الطبيعي إني أحب اللي بيدعوا لربنا بس مش عارف ليه مش عارف أخرج من دماغي إن كل الشيوخ حفيظة و نصابين و بيبيعوا أعشاب طبية"


"من ساعة ما بعدت عن عيلتي و أنا بأكل أكتر و أنام أكتر و أعيش أقل "


"ضحكتي شبه ضحكة عم محمود و مشيتي شبه مشية مش فاكر مين بنطق حرف النون زي مروى و بسلم زي الممثل الفلاني مش عارف ليه حاسس إني سارق حاجة من حد رغم إني مش قاصد"


"بقكر كتير في الحب و إني أحب و عاشوا في تبات و خلفوا صبيان و بنات رغم كدة مش متخيل إني هبقى مسئول ولا أتجوز في يوم هو أنا كدة إنسان مش كويس؟؟؟"


"بنحب ربنا و عارفين إنه موجود ليه بنعصيه عقلنا بيروح فين ؟؟؟"
إرسال تعليق